МяхIячкъалализиб Россияла бургъантани СВО-лизир трофейлис дикахъибти дявила техникала выставка бетерхур. РФ-ла оборонала Министерствола Югла шайчибси дявила округла сипта хIясибли дурабуркIуси халаси кьадрила выставка абхьиб ДР-ла премьер-министр ГIябдулмуслим ГIябдулмуслимовли ва чедиб гьанбушибси дявила округла гIяскуртала командирла къуллукъуни заманалис дузахъуси Владимир Кочетковли.

Премьер-министрла гъай хIясибли, гечбируси выставка чумал баз Югла шайчибси Россияла шагьуртази биахъули саби.

«Россия – дила тарих» бикIуси тарихла паркла майдайчир 20-личирра имцIали Украинала ва НАТО-ла улкнала декIар-декIарти техника гьаладихьилри: Америкала бронетранспортёр «Брэдли», немецунала дявила машина «Marder», Британияла БТР «Spartan», Украинала танк «Булат». Экскурсияби дурадуркIантани гьарил техникаличила баянти дурулри.

Трофейлис дикахъибти дявила техникали РФ-ла Ярагъладарибти ЦIакьанала сархибдешуни гIячихъдирули сари, илкьяйдали нушала бургъантала игитдеш ва дявила устадеш ахъси даражаличир диънира чебиахъули саби. ЧебяхIси ВатIа дергъла дусмазиб хала дудешунани кьяйдали нушала бургъантанира СВО-лизир душма техника цIали игахъули сари. Выставкаличир гьаладихьибти техникали Россияличи, нушала гIярмияличи  пахрубирахъули саби ва чедибдеш нушала бирниличи умутбирхьахъули саби.

«Нушала бургъантала игитлати баркьудлумачила нушани хъумуртуси ахIен. Илданира чула хала дудешунала гIядатуни даимдирули сари», — буриб премьер-министр.

«СВО-лизир гъабзадеш дакIударни багьандан гIяхIцад дагъистанланти пачалихъла шабагъатуначи лайикьбикили саби, илдазибад 12 – Россияла Игитла уличи.

ИшбархIи хIушани нушала гIярмияла дявила баркьуди ва сархибдешуни чедиулра. Западла улкнала ярагъ ва техника дячIес хIейрути, чIумати диъниличила хабурти иш гьакIлизирра дугIла диъни якьинбиуб», — викIи В.Кочетков.

Выставкаличи бахъал адамти башулри ва халаси иштяхIличил техника хIердирулри.

      П.Мирзаева