Аэродромлис ­къарайучир: ­секьяйдали ­ардашулри дявила ­урхьула авиацияла бурхIни
Хабарагарли сиренала тIама бакьибхIели, нуша 20 секундла духIнар машинабазир диэс хIяжатлири. ДекIардеш аги хIерила манзил сабрил яра дугела. Дявила авиацияла аэродромличиб нуни цIа дилшахъанна къуллукъ бузахъусири. Ил манзиллизиб гьачамалра цIадикнила анцIбукь хIебиуб, амма мурталра ибкьти аги-кьяйдаличи нуша хIядурли дирутири. Дебали тамашаласи къуллукъ сабри ил.
Гьар жумягI аэродромличир цIадиркнила анцIбукьуни пикридирутири. Илдигъунти хIялумцIлабазибадцун ахIенри нушала къуллукъ цахIнабиркуси. Ила кадурхутири: самолет урцуси гьунчиб къараулбирни, самолетунала заправкабачи хIерудибирни, стоянкабачир тIашти техникабачи къараулбирни ва цархIилтира.
ЧеимцIаси пахру сарри нушала – «Ураганти». Илди мургьи-бухъутIа рангла машинаби гьарил шайчирад хIяжатти гIягIниахълумани гIердуцибти дири. Нушани илди ункъли дяркъурра ва къалабали пайдаладирес бурсидиубра.

«Нушала къуллукъла философия»
Нушази мурталра бикIули бири – бегIлара гIяхIси цIадикнила шайчибси анцIбукь – цIа хIедикни саби. Ил багьандан мяхIкамдешла далдуцуначил нушани халаси замана буркIули дирехIери, аэродромла гьарил гIямзи балусири….
Нушани летчикунас урехиагардеш калахъутири. Се-биалра вайси анцIбукь бетаалли, кумек мякьлаб лебни илдани балусири.
ИшбархIила манзиллизив аэродромла цIа дилшахъантачи хIерикIухIели, дахъал дарсдешуни нуни чедиулра, амма къуллукъла мягIна ца саби: хъярхъдеш, жавабкареш ва вегIла бузериличи пахручебдеш.
Нуни къуллукъбируси манзиллизиб цIадикнила анцIбукь хIебиуб. Ункъли хIянчи бузахънилис ил анцIбукь сабабли бетарули саби. Амма сегъунти-дигара аги-кьяйдаличи нуша хIядурли дирутири. Гьанна бусягIят къуллукъбирутас сабур ва гьарбизуни дулгулра.

ГIябдуряхIман ИсмягIилов