Лавашала районна поликлиникализиб ункъли секIал балути адамти бузули саби. Илдазибад цацабехIти бахъхIи бузули саби. Гьар бархIи илдас, чула хIянчи бирнила дурабад, психологла къуллукъунира дузахъес гIягIнибиркули саби: зягIипсиличи лехIирхъес, ил паргъатвирес, се-биалра гIеббурес, аравирниличи умутбихьахъес. ИшбархIи тамашала, гIур саригъуна агарси, районна поликлиникала хирургияла кабинетла тухтур (медсестра) Муслимова ГIяйшат Халимбековначила бурес дигулра, суненира адамла хIял-тIабигIят цаибси мерличир чедиуси.
ГIяйшат Халимбековна акIубси ва халакараибси сари Лавашала районна Лавашала шилизир. РиштIахIейчирд ил халкь арабирес илдас кумекрикIес хьулрикIусири. СанигIят чеббикIес замана баибхIели, рахъхIи пикрихIерикIули, илини медицина декIарбариб. Избербаш шагьарлизир медицинала курсани тамандарили гIергъи, тухтур ретаур ва гьанна хIялалси санигIятлизир 57 дус рузули сари. Илала бузерила гьуни 1969 ибил дуслизиб Лавашала районна больницализиб бехIбихьибсири. Ил туберкулезла иза шайчирси тухтурли рузусири. 1989 ибил дуслизир, гьанна сари рузуси, хирургияла кабинетлизи рузес шуррухъун. Ил заманала бухIнаб сецад-дигара хирургуни барсбиуб, амма ГIяйшат Халимбековна рарсхIериуб, ил гьаннара халкь багьандан рузули сари. ЛугIи касес хIейрар иличи башути зягIиптала. Гьанналауб илини мурад хIебарибси ца адам кахIелун.
«Дила санигIят наб дебали дигахъис, иличи пахрума риркьулра, сенахIенну ну халкьлис гIяхIдеш барес рузулра, — буриб ГIяйшат ХIялимбековнани. — РиштIахIейчирад наб тухтурла санигIят дигахъусири. ЦархIил санигIятличила пикрилра рикIуси ахIенри. Медсестра, дила пикрили, зягIипсиличи бегIлара гъамси адам сари: зягIипсиличил барх илини лебилра гьуни ихъули сари, ва ил сагъвирахъули сари».
Жагьли лерай ил хIянчиличи ракIиб ва сецад-дигара адамтас медициналашалси кумек гIеббаахъиб. Илала бегIлара мягIничебси хьул — адамлис кумекбирнилизиб сабри, цархIилтала —арадеш мяхIкамбирнилизиб.
ГIяйшат Халимбековнала хIянчиличи иштяхI ва гъира бегI гьалаб сунечил барх бузутани ахъбурцули саби: «Нушала барх бузути хIянчизартала гIяхIси, даршуси кьукья саби. Нушала-ургар гIяхIти бархбасуни кадизурли сари, сенахIенну зягIипли вакIибси адам аравиубли «баркалла» викIухIели дебали уркIи разибирули бирар. ВегIла хIянчили гьарли-марти разидеш, кьабулдеш дихухIели, секIайчил цугбуцес хIейруси, ахъси хIял саби ил.
ГIяйшат Халимбековна — уркIи хIялалси, гIяхIти хIял-тIабигIятла адам сари. Илини сунела хъалибаргличилара, тухумличилара хъумуртули ахIен. Ил ралути адамти иличи гьар даим хъарихъути саби, сенахIенну ил сегъуна-дигара манзиллизир кумекбарес хIядурли риъниличила балули саби. Ил ралутаницун ахIи, лебилра районна халкьли хIурматбиру.
Сунела санигIятличи дигиличил, уркIи кабихьили рузни багьандан, ил чуйнара-сера ХIурматла Грамотабачил шабагъатларарибси сари.
ЧеалкIуси наслулис, жагьилтас, санигIят декIарбарес пикрибикIутас ГIяйшат Халимбековнани къияндешуначибад уруххIекIахъес насихIят гIеббурули сари: «Илди лерти сари мурталра. Илдачирад чедидикес диадалли, лебилра дунъяличиб чараагарли гIягIниси санигIятличи хIушани диги кабирхьидая. Рахли замана гIелабяхI чарбарес имкан лебли биалри, нуни гьатIира дила санигIят чеббиркIаси, сенахIенну наб ил дебали дигахъис. Ил наб — лерилра секIал саби», — бурули сари ГIяйшат Халимбековнани.