ЧIанкурбела ши мерлабиубли саби дубуртазиб. Ил, кIел диштIати махьилизибад цалабикибси саби;
I-ибил — Кьячкалык, 2-ибил — УбяхI ЧIанкурбе. Кьячкалык жяв замунтазиб бетаурси саби. Ил мерлабиубли саби Буйнакъск шагьарличибад 27 километрла гьарахъти мер-мусаличиб. Къумукъла мезличибад шурбатурхIели, илис гечбиубтала мер бикIули саби. Гьалаб илаб къумукъланти хIербирули калунтири. Жяв замана, дяви кабикили, гIямрулис урехи акIубхIели, илди лебилра Кьячкаликлизи гечбиубтири, шила у илкьяйдали бетаурси саби.
Шила адамти бузери дигути ва гIяхIялдеш дирути саби. Илдани хIяйван-къача адилкьа, хъуми ва унхъри дузахъу.
Жявти замунтазир зумали дирути чябхъинтазибад берцес багьандан, шила шанти вацIурбразиб, алав-гьалавти мер-мусаличиб минабирес бехIбихьиб.
Ванзала бутIни дутIиб вацIа-хIярила ургар гьаргти мераначи. Илар детаур Къадарлантала бекIлидиубти далцути хъумала майдунти.
Шантала иличила дурути дахъал буралаби, бакьалаби, хабурти лер. Илдазибад ца хIушабра гьалабирхьулра.
Къыз-тIашличила бурала
Шилизибад чумал километрла гьарахъли, Кьакьашурализи аркьуси гьунила дублар къаркъала хьунул адам тIашли сари, бекIличиб гIяндра сарра.
Халкьли бурни хIясибли, жяв замунтазив дубуртазив ца хан хIерирулри. Ил дебали давлачевси ва машгьурси сайри. Ханна дахъал далцути ва делгIути ванзурби, унхъри, маза-масла, хIяйван-къачала хIункьри дири. Илала цайли цаси исбагьи рурси лерри.
Рурсиличи гIяшикьиублири ханна хIяйван-къачаличи хIеруди бируси букIун урши. Урши дебали гIяхIизур ханна рурсилисра. Илис букIун уршилис шери рукьес дигулри, амма рурсила бегIти къаршили кабизур. Гьанналауб биубси ахIенри ханна рурси мискин уршилис шери реднила анцIбукь.
БегIтани пикрибариб рурси унраличивси ханна уршилис шери редес.
Иличила багьурхIели, рурсили сунес гIягIнити секIал касили гIяндлизи дигьун, кьанси дугила замана, гьарахъси хъарахълизирад дурарухъун ва уркIили чеввикIибсиличил гьаррухъун.
Ил хабар багьурси ханни, рурси руцили карушахъес хъарбариб. Сунес гIергъибикибти чебаибхIели, рурси бусраврухъун: «Я Аллагь! Ну рубкIуси риасли, къаркъа ретаахъаба». Илкьяйда исбагьи рурси, Аллагьли къаркъа ретаахъурсири. Гьаннара ил, азирцад дус, бекIличиб гIяндра сарра дубуртазир тIашли сари.
Жасмин Шайхаматова
