Адам акIубхIейчирад Аллагьли илис мезра дарх дедлугули сай. Нешла ниъличил дарх илди адамла уркIилизи минакадирули сари. Мез хIедалули гIергъи, дебали къиянни бирар вегIлис дигуси аргъахъес. Гьарил миллатла чучи хасти мез лер.
Амма гIергъити вецIал дусла бухIнаб мекелли халаси урехи акIубли саби нешла мез детихънила. Илис сабабли бетаурли саби хъулиб бегIти чула биштIатачил нешла мезли гъайхIебикIни, илди имцIали телефонтала ва телевизортала асарлиуб урус мезлицун гъайбикIни. КIиэсилгъуна - школабазир сягIятуни камдарни. Пикридухъенаягу, жумягIла духIнар кIел дарс сари чедаахъибти. Се аргъахъес вирара мугIяллимли кIел сягIятла бухIнаб.
ГIергъити чумал дус, цар­хIилти миллатуналаван, даргала мезлара илгъуна тяхIярла урехи акIубли саби. Ил багьандан республикала даражала де­кIар-декIарти далдуцуни, «жу­руга столани», диктантуни, кон­ференцияби дурадуркIули сари. Гьаларванра орфографияла кьяйдурти низамличи душили сагадариб, гьар дус лебил даргантала цахIнабси диктант дурабуркIули саби, илдала лугIилизир – мезла масъултас хасдарибти конференциябира.
Чумал жумягI гьалабли илгъуна гьунибаъни бетерхур ДГПУ-ла Дагъиста филологияла факультетлизибра. Илаб цалабикилри дарган мезла диктант белкIес. Балбуцлис сиптакарти сабри факультетла декан Зайнаб ГIямарова, Дагъиста мезанала кафедрала заведующая ПатIимат ХIябибуллаева, Дагъиста литературала кафедрала доцент Рашид БяхIяммадов, мезанала кафедрала доцент Раисат ЧIапIаева ва цархIилти преподавательти.
Савли университетлизиб халаси сакIубдешри, унзала гьалаб миллатла палтарли бегIбарибти студентунани гьар вакIибси жагали кьабулирулри, гьар миллатла вакилти чидил кабинетлизиб сабил гIеббурулри, ила гьуниббалтулри.
СягIят вецIал дикибхIели, лерилра аудиториябазиб диктант бехIбихьес гьалаб, илала бутIакьянчиби мубаракбарес вакIилри ДР-ла миллатла политикала ва динна къуллукъунала шайчивси министр, Россияла игит Темирлан ГIумарович АбутIалимов, университетла ректорла заместительти ва факультетла декан. Илдани лебилра цалабикибтас гьарбизуни далгун.
Илкьяйдали даргантала гьалаб гъайбухъун РАН-ла ДФИЦ-ла отделла заведующий, филологияла гIилмуртала кандидат, поэт, фольклорист Хизри Юсупов, «Дагъиста хьунул адам» журналла бекI редактор, поэт Хамис Шамилова ва иш белкIла автор.
Диктант дебали саркъахъили белчIун Раисат ЧIапIаевани. Балбуц ахирличи бикили гIергъи, факультетла преподавательти ва студентуни жагати далуйтачил ва берклумачил гьунибаиб.
Дирхулра, илдигъунти гьунибаънибани дарган мез гьаладяхI ардукес кумекбирниличила. Халаси баркалла багьахъес дигулра чедиб гьанбушибти вакилтас, уркIби разидируси байрам дураберкIни багьандан.

Кьади ГIялисултIанов