Халкьанала культурала ва ардякьунти наслубазибадли касибси рухIла, гIямрула, яшавла кабизла мягIничебси бутIали детарули сари мез. Илдазир дихIути сари тарих, гIядатуни, наслубачила гьанбикуни ва рухIлашалти давлуми. Дахъал миллатунар Россиялизир мезани мяхIкамдирнила хасси мягIнара лебси саби.
Кубачила дурхIнала искусствобала школализиб бучIанти культурала ардякьунти наслубазибадли касибси рухIла, гIямрула, яшавла кабизличил тянишбирни илдас бяркъ бедлугнила мягIничебси бутIали бетарули саби. Искусствола ва гIядатунала кумекличил педагогунани дурхIнас чула хала бегIтачила баянти ункъли дагьахъес, илдала культурала хIурматбирес ва Россияла цархIилти халкьанала культураличил тянишбиахъес имканти алкIахъули сари.
 Россияла халкьанала мезанала БархIилис хасдарибти далдуцунала дазурбазир Кубачила дурхIнала искусствобала школализиб нешла мезличи ва культураличи дурхIнала диги алкIахъниличи бяхIчиаибси гьунибаъни бетерхур. Педагогуначил барх дурхIнани нушала улкала халкьанала мезаначила ихтилат дураберкIиб, илди ГIяхIмадхан Абу-Бакарла уличилси музейлизи бякьун.
Музейла заведующая Зайнаб Каннаевани дурхI­ни нешла ва урус мезаначил произведениеби лукIуси писательла творчестволичил тянишбариб, адамла гIямрулизиб мезла мягIничебдешличила баянти гьаладихьиб.
 Балбуцла дазурбазиб дурхIнани аргъиб мез руркънила гIяхIдешличирли вегIла хала бегIтачила баянти дагьес, культураличил бархбас кабизахъес ва ардякьунти наслубазибадли касибси рухIла, гIямрула, яшавла кабизла хIурматбирес хIяжатли биъниличила.
Илдигъунти далдуцунани кумекбиру дурхIнази дахъал мезанала бетуц нушала улкала гьарли-марси давла биъниличила багьахъесра, сабира мяхIкамли бихIес ва наслубачибадли-наслубачи биахъес хIяжат­си биъни.