Даршлим шел дус гьалаб дурабул­хъес­кабиибсири ну­шала газета, суненира даргала миллатла культурала ва рухIла давла бархIиличи-бархIи чебирцIахъуси. Лебтанилра ба­луливан, газета мез мяхIкамдирнила, илди гьа­ладяхI дашахънила бекIлидиубти хьулчназибад ца саби. Республикала жамигIятла-политикала га­зета сабливан, илини дарганталацунра ахIи, дагъис­тан­ланталара гIямрула лерилра шалуби си­пат­дирутири, газета бучIантази аргъбаибти масъул­та­чила, сагати хабуртачила, дубурлантала сар­хиб­де­шу­начила балахъули.
Ил сунела тарихла манзиллизиб газетали мез мяхIкамдирнила шайчибси сунела мурад ахъли бихули калун или чIумали бурес рирус. СенахIенну саби акIубси бархIиличибад газетала маргь бягIубирули редакциялизиб бузули калун даргала пагьмучебти журналистуни, поэтуни-писательти: ГIяхIмадхан Абу-Бакар, Ильяс ХIусейнов, Сулайбан Рабаданов, Гъа­зи­мя­хIяммад Юсупов, Ражаб Адамадзиев ва гIуррара бахъал цархIилти машгьурти дарганти. ХIера, саби декIар-декIарти лугъатунала вакилти биалра, илдас мез гьаладяхI дашахънила ва мяхIкамдирнила тIа­ла­буни детерхахъес имканбакIиб. Набра илдазибад ца­цабехIтачил рузес кьадарбиуб. Чис гьанбиркусири машгьурти писательти-поэтуначил, журналистуначил гьар бархIи къаршириркес, илдачил ихтилатрикIес рирус или. Амма кьисматли дила бузери илдачил цIацIали бархбасахъун.
Ну хIянчила ракIибси замана ГъазимяхIяммад Жаб­рагIилович редакторли узусири. Ил дебали малхIямси, уркIи гьаргси, сунела санигIят дигахъуси, гьарилличи чеветаибси адам сайри. Ил мурталра хIялалси хIянчилизи ахъили, газетализиб хатIа хIебиахъес даим чекайзурли вири. Нуша жагьил специалистунас ил дудешгъунара вири, гьарил нушала зугIяла гьунчибикахъес кумекбируси, гьар секIайзир нуша гIердурцуси.
Нуни балуливан, лебилра хIянчизартас Гъази­мя­хIяммад ЖабрагIиловичли дахъал гIяхIдешуни дарибти сари: дигалли бузерилизиб гIеббурцули, дигалли хъали-цIала масъултазиб, дигалли уркIила гьав ахъбурцули. Илала чихъти устадешла халати дуклумала удир нуша, хаслира – жагьил хIянчизарти, чIумаси къалализир дузутиван кабилзи, илцадра ил гьарилличи чеветаибси, уркIи изуси бекI редактор сайри.
Сунела бунагь-хатIаличивад Аллагь чевверхаб, ил дебали гIяхIси адам ва дарган девла пергер уста вири. Чум дус ардукьялра, иличила шалати гьанбикуни уркIилизир даимлис кавлан. Иличил дарх нушаб насихIятуни дурули, бузерилизир гIердурцира Запир Харбиловли, МяхIяммад Рабадановли, Ражаб Адамадзиевли, ГIябдулкьадир МяхIяммадовли, ГIиса ТIагьировли, Шамхал Шамхаловли, гьаннара нушачил рарх рузуси ПатIимат Кьурбановани. Баркалла биаб илдас нуша журналистла бузерила дигIяндешуначи бурсидарнилис. Дила халаси игъбар сабри илдигъунти бархкьябани дигиличил алавруцни ва икьалабирни.
Илдала халаси бузерила сабухъ саби гьанна нушачира баибси. ХIера, ишбархIира редакцияла хIянчизартани, жумягIли гьачам газета балкьарахъули, даргала шимала аслу-мина, гIядатуни сипатдирули, мез гьаладяхI дашахънилизи белгиси пай кабирхьули саби.
Буралли, газетала БархIи сабливан кабизахъурси августла 9 – нушала газетала бекI редакторли узули калунси, гIур «Дагъистан» Этномедиахолдингла руководитель ветаурси, ва бусягIятла замана ДР-ла печатьла ва багьахънибала шайчибси Агентстволис бекIдеш дируси Юсупов Арсен ГъазимяхIяммадович акIубси БархIира саби.
Арсен ГъазимяхIяммадовичли хIябцIали дусличибра имцIали хIянчи барили сай журналистикала кьялилизиб. ГIяхIцад дусмазиб илини халати устадешличил дарган мезли дурабулхъуси жамигIятла-политикала «Замана» газеталис бекIдеш дирутири, илала кьадри-кьимат республикализирцунра ахIи, улкала даражаличира адикахъили. Дагъистан Республикала СМИ-бала Ассоциацияла председатель, РФ-ла ЖамигIятла палатализибси регионна СМИ-бала бузери дурусбиркахъуси советла член, ДР-ла культурала урибси хIянчизар А.Юсуповли гьуни чебиахъуси замана газетали улкала декIар-декIарти конкурсуначир жигарла бутIакьяндеш дариб, лебил Россияла «Прессала мургьила фонд» бикIуси конкурслизир цаибти мерани дуциб. Гьарли-марли, конкурсла экспертунани даргантас ил гьарли-марли дурхъаси гIяхIялли бетаурси газета сунела бучIантас дебали пайдаласи биъниличила бурулри. Гьайгьайрагу, улкала лугIилашал дахъал СМИ-бала ургаб даргала газета гIяхIтигъунти изданиебала къяйлизи кабатни даргантасцунра ахIи, арагIебли Дагъистайсра чихъси кьимат беднилизи халбарес вирар.
ИшхIелла технологияби гьаладяхI дашуси, сайтани ва социальный сетаначи хаслира имцIали пикри бяхIчииуси замана газетаби мяхIкамдарес, илди миллатлис культурала хазнали калахъес дебали къиянси ва мягIничебси хIянчи саби. Амма ил шайчибра Арсен ГъазимяхIяммадовичли асарчебси тяхIяр балбуциб: лерилра миллатла изданиеби цаси, уржибси кабизлизи цаладяхъиб ва «Дагъистан» бикIуси Этномедиахолдинг акIахъуб. Илала бузерила хьулчилибиубси, бекIлибиубси бетуцра республикала миллатла мезани мяхIкамдирниличи ва гьаладяхI дашахъниличи бяхIчиаибси саби. «Печатьла изданиеби мурталра дузар. Гьаларван хIедузар, амма илди кавлан. Нушаб Интернетлизир дузесра чебиркур. Лерилра майдунти ва соцсетани пайдаладирес, вегIла изданиеби калахъес хIяжатли сари. Чинаб хIербирули биалра, миллатунала вакилтани, нушала сайтлизи бухIнабухъи, чула мезаначил дурадулхъути сагати хабурти дучIес, передачабачи хIербикIес имканти алкIахъес гIягIниси саби. Илди лерилра секIал гьунчидикахъес хIяжатти сари. Гьарил редакциялис мини-холдинг бетаэс чебиркур», — бурибсири А.Юсуповли журналистуначилси ихтилатлизиб.
Этномедиахолдинглис бекIдеш дируси замана Арсен Юсуповли сагати сиптаби, проектуни дузесаиб, чулара кумекличил миллатла СМИ-бала журналистунала ургабси даражала алапа ахъбуцес, изданиебала сайтаназир дигести дарсдешуни кадикахъес имканбакIахъибти. Сунени бекIдеш дируси кабизла сабухъчебси ва асарчебси хIянчи чебаили, республикала руководстволи Арсен ГъазимяхIяммадовичличи ДР-ла печатьла ва багьахънибала шайчибси Агентствола руководительла къуллукъуни хъардариб. Буралли, гьар-чинаралра багалати сагадешуни акIахъес къайгъичевси ил ишбархIира гIяхIти хIясилти чедиахъули узули сай, адамти гьар бархIилати гIямрулизиб бяхIигути масъулти арзахъес икьалабирули, илди гIеббурцули.
Газетала юбилейличил бархбасахъи, нушала бархкьяби ва газета бучIанти мубаракбирулра. Даргантала анкъила гIяхIси гIяхIялван абицIули, нешла мез гьаладяхI дашахъули, гьатIира даршани дусми калаби, ахIерси газета!