Дунъяличив хIерируси гьарил инсаннаван, Сергокъалала районна центральная больницала тухтур Муъминат ГIябдусамадовалара закла хьанцIдешлизиб дугели ухуси сари-регIси зубари лебниличи ну вирхулра. Ил зубарли гIямрулизир черхIералкIахъи гьаларяхI рикули хIеррируси, уркIецIила малаикван адамтала гIямрулис къарауйчи каризурси пергер хьунул адамличила саби иш дила белкIра. Сари-регIси зубарли гIямрулизи умутуни хьурадирули 100 дус калес кьадарбараб сунес ЧевяхIси Аллагьли. Сари акIубси Лавашала районна МикIхIила школализир ручIухIелил Муъминат ГIябдусамадова тухтур ретаэс хьулрикIусири. Ил хьулли уркIилизи хьурадарибти дуклумани школа таманбарибси жагьси рурси 1973 ибил дуслизир Дагъиста пачалихъла медицинала институтлизи киб. Ункъли ручIули илини 1979 ибил дуслизиб вуз хъараахъур, Каспийск шагьарлизибси больницализиб интернатура белчIи, терапевтла санигIятличил регIриуб. 1981 ибил дуслизир Сергокъалала больницализир рузес рехIрихьиб. 2015 ибил дусличирад районна центральная больницала терапияла отделениела заведующаяли рузули, районна шимазиб хIербирутала хIурмат сархиб. Ил чебяхIси категорияла тухтур, арадеш бихIнила шайчирси отличник сари.
РФ-ла терапевтунала цалабяхъла член сарси М.ГIябдусамадова районна больницала бекI тухтурла, ДР-ла арадеш бихIнила шайчибси Министерствола шайзирад Баркаллала кагъуртачи лайикьрикили сари.
М.ГIябдусамадовани гьуни чебиахъуси уржибси коллективлизиб отделениела халалгъуна медсестра ПатIимат ГIяликьадиева, медсестраби Айханум ХIяжиева, Айханум Сулайбанова ва Жавгьарат МяхIяммадова бузериличибли декIарбулхъули саби.
М.ГIябдусамадовала адамтачи уркIецIили бицIибси уркIиличила набчилси ихтилатлизиб буриб УбяхI МулебкIила шила администрациялизи кабурхуси ГIяйнурбимахьилизив хIерируси ДР-ла урибси учитель НурбяхIямма НурбяхIяммаевли.
— Хапли зягIипикили, терапияла отделениелизи каркьибхIели, илабти тухтуртани камси заманализив сагъварира, — викIи ил, — Муъминат ГIябдусамадовани дила урцецуни, жихIла пушягI демдни белгибариб, хIяжатти дармунтачил 10-12 бархIила ухIнав сагъиахъубли, хъули вархьира. Баркалла балахъулра терапияла отделениелизиб бузути медицинала хIянчизартас, илдала бузери гIеббурцуси больницала бекI тухтур ГIяли БяхIяммадовлис ва илала заместитель ХIяжимурад ХIяжиевлис.
Муъминат ГIябдусамадовас баркалла балахъути белкIани дучIухIели, отделениелизиб сагъбирули калунти сергокъалаланти узби МяхIяммад ва МяхIяммадрасул МяхIяммадовхъала, ИсмягIил-Кьади МяхIяммадовла, Амай МуртузагIялиевала, Избербашлизивадси МяхIяммад Гичихановла ва бахъал цархIилталара пикруми аргъира.
Чуйнара терапевт Муъминатла хIерудилиув сагъирули калунси наб иш белкI илис багъишладарибти чархарала дугьбачил таманбарес дигулра:
Мургьила багьаличил
ГIямрула дякь ихъуси,
ХIед ну деза викIулра
Муъминат, тухтур рурси.
Муъминат, районнизиб
ХIела кьимат леб халал,
ХIуни сагъбарибтани
Бируну хIела хIурмат.
МалхIямси дев, ванал хIер
УркIецIи дарх дихуси,
ЧевяхIси Гиппократла
Хъялис хIу сарри марси.
Тухтурла дурхъаси у
ХIуни ахъли бихулри,
Кагибси хIянчилизиб
Диги-хIурмат сархилри.
Муъминат, хIед цайналра
ГIягIнимабикаб дарман,
ХIечибад акIубтани
Марараби хIу хIяйран.
ХIерамсурли рузахъес
Аллагьли хIед ахъри габ,
ЗягIипти сагъбирахъес
Багьудира цIакьра габ.
Казимбек Рабазанов, УбяхI МулебкIи
