Кубачила шилизиб някъла устадешла бегIтала хIурмат халаси саби ва чеалкIуси наслулизира ил баркьуди гIебасахъес гIярбукIанти къайгъилизиб саби. Ишди бурхIназибра Кубачила искусствобала школала бучIанти машгьурси мургьила гьимиртачил чимари (бахрома) дируси Зайнабли ХIяжиламмаевачи гIяхIладли бякьун. Гьанна Зайнаб ил санигIят 40 дусцадхIи бузахъули саби.
Ил санигIят бузахъухIейчирадли Зайнаб ХIяжиламмаевани бузерила гIяхIцад ганзухъуни ахъибти сари. Гьала-гьала някъ-някъли някьиш лукIутири, гIур биалли, чимари бирусири. ГIергъити 15 дус биалли хасси станок пайдалабирули саби. Ил станок балкьаахъурси саби илдигъунти хIянчи кункдирахънила мурадличил.
Зайнабли дурхIнас иштяхIличил баянти гьаладихьиб сунела бузерила бетуцличила ва багьахъур ил хIянчи бузахъес багьандан сабурцун баибси ахIен, къиян кабихьесра чебиркур или. Ил санигIятли чебетаибдеш, чекайзурдеш ва санигIятличи диги тIалабдирутира сари рикIулри ил.
Рурсбас устадешла дарс чебиахъухIели Зайнабли чебетаахъили хIяжатдиркути ваяхI далкьарахъниличирадли рехIрихьили, балкьарахъуси секIал таманбиайчи хIянчила башриличила буриб. ДурхIни иштяхIличил лехIбизурлири Зайнабли дурути баянтачи. Илини давлачерти баянтачил сунела бузерила гьарил бетуцличила, къияндешуни дяхIяэс кумекли дирути далилтачила ункъли иргъахъулри.
ГIярбукIла хьунул адамтани мургьила гьимиртачил демхурли дирути някьиш ва чимари Кубачила миллатла палтарла ца бутIали детарути сари. Зайнабли чидил хьунул адамли сегъунти чимариличилти кIузри дихутил баянбирулри. Шери хIебякьунти рурсбани илди 4-5 сантиметрла, хъабиубти хьунул адамтани биалли, 12-14 сантиметрла сари пайдаладирути рикIулри ил. Илкьяйдали хьунул адамтала палтар хIясибли чидил сегъуна кьамла ва бетуцла хьунул адам сарил белгибарес имканти алкIули сари.
Зайнаб ХIяжиламмаевани рурсбала гьарил хIянчира ахтардидариб ва илдас санигIят ункъли бяркъни багьандан баркалла багьахъур. Илала гъайли рурсбира, гьайгьайрагу, уркIичеббиахъуб. Илини рурсбас челябкьлализирра дахъал сархибдешуни диубли дигниличила аргъахъиб.
Зайнаб ХIяжиламмаевачибадли чарбухъи гIергъира рурсбала иличила хабурти кадурхули ахIенри. Илала пасихIдешли ва уркIила ванадешли рурсби тамашабиахъублири. Илкьяйдали гьунибаъниби дурадуркIнили наслубачирад-наслубачи диути дурхъати гIядатуни ва санигIятуни давлачердикIахъу ва гьаладяхI дашахъу.
Пагьмучебти устназибадли гIибрат кайсули, рурсбанира чула устадеш ункъдиахъес кьасбирули саби. Илкьяйдали гIярбукIантала гIядатунира устадешла бетуцра гьаладяхI дашахъес имканбикIули саби.
«Илгъуна гьунибаъни рурсбас багьудлуми дедлугни ва устадеш гьаладяхI дашахъес имканти алкIницун ахIенну, ил Кубачила культурала бетуц мяхIкамбирниличи кайцIуси ганзра саби. Устначил гьунибиухIели уркIичеббирути чеалкIуси наслула вакилтас санигIятуни руркънила далилти чедетаахъили пайдаладарес ва творчестволашал гьалабяхI арбукьес имканти алкIули сари.
Кубачила шила хIурмат-кьимат ахъдуцибси миллатла кьадричебси давла илкьяйдали мяхIкамбирни нушала бузерилизибра лебгIеб хIяжатси бетуцли бетарули саби. Нушани кьалли ункъли балулра илдигъунти гIядатунани культура белгиси жураличи биркахъниличила ва чеалкIуси наслулис чула хала бегIтала гIямрула ва санигIятунала хьулчни дяркъес имканбикIахъниличила.
Илдигъунти устадешла бетуцуни наслубачирад-наслубачи диахъули, нушани Кубачила тамашала тарих даимбирахънила мурадличил хьулчни кадирхьулра нушаб гIергъи бакIибти наслубас багаладиахъес багьандан», — буриб искусствобала школала директор Раисат БяхIяммаевани.
Дахадаевла районна администрацияла пресс-служба
