Дагъистайчила ва дагъистанлантачила арагIебли дунъяличибра балули саби викIалра, хатIа бетхIерар.
Нушала асил уршбала гьунартачила хабурти дурули, чеалкIуси наслуличирад-наслуличи диули сари, илкьяйдали бирар гьаннара гIергъира, сенахIенну илди гьарил аги-кьяйдализир гъабзадеш чедиахъули, чеахъбикIули саби. Улкала чидил гIямзилаб гьанагар анцIбукь кабикалра, нушала Дагъиста уршби итмаданал кумекличи музабухъи, адамтала гIямру уцахъули сари. Чум диуба анцIбукь хIеркIлизи, шиннизи кабикибти хьунул-дурхIя дагъистанлан гIяхIгъубзнани берцахъибти анцIбукьуни. Ил манзил нушала уршби чула гIямрулис урехи лебниличи ца минутлисалра пикрибулхъули ахIен. Илдала хIилизи гъабзадешра асилдешра алкIу-алкIукад минадиубтиван кадилзули сари.
Чина рукьясра, чичил гьунираасра, нушалаван уркIби гьаргти адамти къаршибикибти ахIен. Дагъистайзиб вегIла ва урхIла балагь лебси ахIен. Лерилра вайти-гIяхIти дарх, уржили бекIкадиру, лерил секIал гIягIниси тяхIярли гьунчидикахъайчи, чула хъули чархIебулхъан.
Нушала ахIерси Дагъиста халкьличи дила уркIи пахрули бирцIули бирар: сегъуна-биалра гьанагарси анцIбукь кабикалли, лебилра хункI кьяйдали, цабиубли вяшбикIар.
ХIера, ишди бурхIназирра тах шагьарлизир тIягIямагарти анцIбукьуни кадикиб: баргбердуни детаур. Илди кадикнила сабабтала чебкад гьаннара ахтарди дурабуркIес даимбиубли саби. Амма, наб бурес дигуси, илди баргбердунала асурти агардарес, къияйзи бикибти адамтас кумекбарес лебилра гIядатла халкь итмаданал музабухъун. Къияндешуни чедакIибти гIеббуцес ит бархIил анцIбукьуни кадикибти мер-мусала мякьлаб кумекбируси пункт абхьиб. Баргбедли кадикахъибти хъулрала бутIни, тIутIудиубти шишни – илди дучес, лайдакIес чумал халати машинабала (газель) бегIти башули калун, чула шайзибад кумек биахъес къайгъилизиб. Гьайгьайрагу, пачалихълира дарес хIяжатти хIянчи гIягIниси тяхIярли гьунчидиркахъу. Амма, нушала халкь, иличи хIерхIеили, чули бирусигъуна кумекбарес ва итхIяйзиб адамла пашмандеш чебарбукес гьалакти саби.
УркIила жи хIясибли дирути хIушала лерилра къайгъни Кьудратла ВегIли кирилизи делкIаб! ГIур кьадармабиаб гьанагарти балагьуни дяхIяэс!
Салимат ГIялиева
