Избербашла «Дявилати узидеш» жа­ми­гIятла организацияли ветеран­тала Советличил ва ЖамигIятла па­ла­таличил барх зараллизи бикибти Хайдакьла район­на адамтас кумек гIеббаахъиб.
Мажалислизи гIяхIбакьла кумек баахъиб ветерантала Советла председатель СултIан Даитбековли ва илала заместитель МяхIяммадхIяжи Гацайниевли. Кумек касиб хъулри гъятIдиибти 9 жагьил хъалибаргли, чулира 2-3 биштIати абилкьути.
«ЧяхI-забла асуртачила багьурхIели, нушани кумек хIяжатти хъалибаргуни гIердуцес кьасбарира», — буриб СултIан Даитбековли.
ГIяхIбаркьла кумеклизи кадерхурлири палтар-кьяш ва берк-бержла продуктуни. Илгъуна балбуц Хайдакьла районнизи хIяйнайс саби дураберкIибси.
БекIлибиубси кумек гIеббаахъиб «Инсан» фондли. Адамтани баркалла багьахъур Избербашла ЖамигIятла палатала председатель МяхIям­мад АрслангIялиевлис, республикала «Инсан» фондла бекI МяхIяммад ГIябдуряхIмановлис ва заместитель Мурад МяхIяммадовлис, илкьяйдали складла заведующий Рабазан ХIяжиевлис жавабкардешлис ва жигарла бутIакьяндеш дарнилис.
Хайдакьла районна бекI Запир ХIясановли кумек гIеббахъибти лебтасалра баркалла багьахъур. «ИшбархIи мусибатличи бяхIягибти адамтас хIеруди ва кумек дебали хIяжатли сари. Ле­билра районна жамигIятла шайзибад уркIи-ур­кIи­лабад баркалла балахъулра къияндешлизи дикибти хъалибаргуни гIердуцнилис. ХIушала кумек – цабиънила ва адамдешла мягIничебси далил саби», — буриб З. ХIясановли.