ИмцIатигъунти анцIбукьуназиб нушани адам мицIирли левай илала сархибдешуни ва пагьму кьиматлабирес, ил чевяхIвирес, сагати ахъанайтачи гьуцIирес балули ахIенра.
ДекIар-декIарти дусмазиб даргала литература гьалабяхI арбукес къайгънабиркьути, илизи мекелли халаси пай кабихьибти даргала поэтуни-писательти бахъал саби. ИшбархIи нушани илдала произведениеби дучIули, чебиулра сегъуна пасихIдеш бухIнабуцилил илаб. Илдазибад цацабехIтани караматдешличил ишбархIи дунъяличир кадиркути аги-кьяйдара дархли сипатдарили сари. ХIера, илди нуша-ургаб агархIели, илдала бузерила сабухъ дебали мягIничебси биъни иргъулра нушани.
Ил хьулчили буцили, бусягIятла зама­нара леб дарган мез ва литература черяхI­ди­рули, бамсриагарли бузути. Гьайгьайрагу, гIялимтала, писатель-поэтунала авид гIяхI­цад­ла кьакьабиубли саби. Сен-биалра леб чула белкIаначил дарганти разибирути, Даргазирти ва республикализирти аги-кьяйдала черкадти чула пикруми аргъахъес къайгъила бегIти. Произведениебала, назмуртала бекI мягIналичира темаличира, гьайгьайрагу, алав­чарли кадиркути анцIбукьунанира асарби­рули саби. Гьайгьайрагу, гьарилла вегI­­личи хасси лукIнила бетуцра лебси саби. Ца секIайчила, темаличила чумал адамли де­кIар-декIарси тяхIяр пайдалабарили, гьарра шайчибад сипатбарили, белкIес бирар. ХIера, илизибгу пагьмула цIакьра. Гьарилла ил цар­хIил­талайзибад хасдешуначил декIар­бул­хъу­л­и бирар.
Буралли, даршал дусла гIергъи дарган мезла ва литературала аги сегъуна бирарал бурес къиянни саби. Ил багьандан нушаб ишбархIи хIяжатбиркур итира камти, амма пагьмучебти лукIанти-дарганти гIеббурцес, илдала пагьму чеахъбирес. ИлхIели гьарилла иштяхI-гъира алкIан сунела устадеш чедаахъес ва ил баркьудилизир чедибдешуни диахъес.

Салимат ГIялиева