2026 дусла кIиибил байхъу дуслис «Замана» газеталис къулбасбирнила кампания ахирличи биркули саби. ГIяхIцад даргантани чула дигуси газета гIурра чучи бихахъес пикрибариб, ва кIиибил байхъу дуслисра ил къулбасбариб.
«Замана» газетала редакцияли халаси баркалла балахъули саби ишди нуни удиб гьанбуршути даргантас. Илдала ва гIурра илдигъути цархIилтала кумекличибли кIиибил байхъу дуслизибра нушала газета бахъал бучIантачи биур.
Гьала-гьала нуни гьануршисра гьар дус газеталис кумекбируси ДР-ла Халкьла Собраниела депутат Шамил ГIямаров. Илини, гьалабван, цацадехIти учреждениебас ва школабас кIиибил байхъу дуслисра нушала газета къулбасбарили сай. Илини гьар дус газеталис арцла шайчибра кумекбируси саби.
Илис гIергъи гьануршисра, гьайгьайрагу, ДГУ-ла ректор МуртазагIяли Хулаттаевич Рабаданов. Илинира иш байхъу дуслисра университетла бучIантас гIяхIцадла кьадарла газетаби къулбасдариб.
Дагъиста шила хозяйствола кьялубала цахIнабикла (АПК) профсоюзла председатель МуртазагIяли МуртазагIялиев нушала газетала вахъхIила юлдаш сай. Илини иш байхъу дуслизибра Каспийск шагьарла цацадехIти школабас ва республикала багьудлумала центрлизиб бузутас газета къулбасбариб.
Гьайгьайрагу, гьануршисра нушани ГI.Батирайла уличилси Даргала Драматический театрла директор Мухтар Матаев. Илини лебилра театрла хIянчизартас газета къулбасбарили сай.
VIP-кулинариялис бекIдеш диран Кумсият Мирзаевани, мурул адамтас гIелахIерухъи,суненира газеталис гIяхIси кумек бариб.
Наб хаслира гьанушес дигулра ца дила шан, школализив учIухIели, нуни сунес урус мезла ва литературала дурсри кадирхьули калунси, бусягIятла замана жигарчевси баркьудила адам (предприниматель)Казбек Рабазанов.
МяхIячкъалализив ил бахъли валуси адам сай. Илала вегIдешла сари «Орион» бикIути халати тукенти ва ил уличилси Сагаси Хушетлизибси сунезир мукъри дурадуркIуси зал. Илини 49 дуслис ижаралис буцили бузахъули саби Дахадаевла районнизибси ЛямцIла бяхI бикIуси дубура (нуни иличила гьалабра макьала белкIунсири).Ил дубурличир Казбекли мирхъи, хъа ва дугIла дахъал мицIираг адилкьули сари. МицIираг адилкьуси ферма леб илала Къаякентла районнизибра, Башлила шила мякьлабси ГIячила къада бикIуси мерличиб.
Казбекли дирути лерилра гIяхIдешла баркьудлу­мачилакIун абзур жуз белкIес вирар. Нуни ишаб гьанбуршис чIянкIли ца секIал.
Дибгашила хIябрала мякьлаб Дербентла къаркъализибад белшунси кIел дерхIла юрт леб. Илар ухули сари хутIла чиргъми. Крантазирад дашули дяргIибти шинра лер. Букили газра леб. Дибгашав вебкIибси адамлис кьулгьу бучIуси илаб саби. Савли ва бархIехъ - цаибил дерхIличиб, цархIил замана хIябал бархIи – кIиибил дерхIличиб, ванати хъулразиб. Лер дехIибала дирес балкьаахъурси хъалира, хъацIли букахъес барибси биштIаси столоваяра. ХIебаибсив ца адамли сунела шантас бируси гIяхIдеш?
Казбекла гIяхIдешличибли кIиибил байхъу дуслизир лебилра дибгашантани нушала газета бучIес бирар. Дибгаши абзур дуслис къулбасдарибти гехIел «Замана» газета гьаларра дашутири. Илдазибадси ца газета Казбекла неш ПатIимат Кьадиевани къулбасбарибси саби.
ПатIимат Кьадиева 50 дусцадхIи Дибгашила школализир бехIбихьудла классунала учительницали рузули калунси сари. Ав­цали дусцадхIи нура калунсира ил школализив узули. Ну директорли узуси замана, районна белчIудила отделениели нуша­зибад гьарил учительли къулбасдирути газетаби-журналтала сияхI тIалаббирусири. Нушала районнизир бегIлара дахъал газетаби-журналти ПатIимат Кьадиевани дири къулбасдирути. Гьачамцун ахIенри ит замана районна белчIудила отделлис бекIдеш дируси Хасбулат Хасбулатовли, цархIилти мугIяллимтани илизибад гIибрат касахъес багьандан, нушала учительницала у ахъси трибуналичибад бурибси.
Или биалли, пикривикIулра ну, урши Казбеклизир жузачи ва газетабачи диги адикьурси илала неш руилигу. Сунела уршилизир сахаватдеш дакIударибсира ПатIимат Кадиева руилигу. Баркалла биабну сунес.
Иш байхъу дуслизир Казбекли шилизиб хIербирути дибга­шан­тас 30 газета къулбасдарили сари. БусягIят ну нушала ши­лизиб хIер­бирути лебтанилра «Замана» газета кайсули саби викIес ви­рус. Амма бурес чебиркур Дибгашира дубкIути шимала лу­гIи­ли­зи кабурхули саби или: илабадра жагьилти шагьуртази ар­ба­шули са­би.
Гьачам шилизи шадив вакIибси Дагъиста халкьла поэт Сулайбан Рабадановлизи (итхIели ил «Гьалмагъдеш» журналла бекI редактор вирусири), даргантани журналлис къулбасбирулив или, нуни хьарбаибсири. «Духовная деградация даргинцев саби», — викIар ил урус мезли, вамкьурли, набчи ласалра хIяхъили. ИтхIелира гIяхIхIедизур наб итди дугьби. Бархьли бурасли, гьанна гьатIира гIяхIдилзули ахIен. «Деградировать» ибси дев «вайси куцличи шурбухъес» ибсиван иргъуси саби. Ил девла мягIна А.П.Чеховла «Ионыч» бикIуси хабар белчIунсини гьатIира гIяхIли бала.
ХIуша Ионычличи мешухIедикес къайгъибарая, ахIерти дар­ганти.