Дунъяличибра машгьурбиубти бахъал гIялимти абикьурси ХIурхъила шилизибад дурабухъунти адамти камли ахIен ишбархIира, сабира республикала декIар-декIарти къуллукъуначиб бузути.
Илди леб дигалли ахъти къуллукъуначиб, дигалли гIядатла хIянчурбачиб. Илдазибад бахъалгъунти, чула адаб-хIяяличил, «нура ишав левра» или тIяхIхIебикIули, чучи хъарси хIянчи чебетаахъили бирули, республика ва улка гьаладяхI дашахънилизи белгиси пай кабирхьули, хIялалли бузули, хIер­ка­би­рули саби. Илдигъунтала лугIилизив нуни гьанушес рирус тарихла гIилмуртала кандидат, доцент, ДГУ-ла филологияла факультетла журналистикала отделениелизив сабухъчевли узуси преподаватель, печатьла СМИ-бала кафедрала заведующий, регионна журналистикала Центрлис бекIдеш дируси МяхIяммадов ХIямид ГIябдуллаевич. Сунела асилси бузериличил ва санигIят ункъли балниличил илини машгьурти хIурхъантала лугIи чебирцIахъули саби рикIаслира, хатIа бетхIерар. Амма сунела сархибдешуни лебтазилра чедаахъес ил илцад-декIар гьалакхIейкIар, я илис гап хIейгахъу.
Газетализир дузути нуша бахъалгъунти хIян­чи­зартас (дагла бархIи нушара ДГУ-ла филологияла факультетунала студентунили сартачила сари гъай) илини дурсри кахIедирхьули диалра, нушала иличил цIа­цIати бархбасуни кадизур. СенахIенну мурталра нушачи журналистикала отделениела студентуни практика дураберкIес башули бирар. Илдала багьудлумала даражаличибли ХIямид ГIябдуллаевичла уста­дешлис чихъси кьимат бедес вирни гIячихъли че­биули бирар.
ХIера, гьалавванра ил сунела студентуни кабукили нушачи гьаввакIиб. Студентуни-ургаб даргала декIар-декIарти районтала вакилти лебри. Илдала журналистла хIянчиличи диги лерни хIулбазибси лямцIличил багьеслири.
Нушани бируси хIянчилизи илди цаибси бар­хIи­личибадал гъудурбиуб, хIергъуси багьес илди суалбикIули бирар. Иш яргализиб газетала редакциялизиб илдала практика ахIенрину, «пагьмула бархIи» сабри. Ил бархIилизиб илдас журналистла сани­гIят­личил тянишбиэс имкантира акIуб.
Илди-ургавси ишхIелла тIалабуни ункъли иргъуси, амма хала бегIтала гIядатунира хъумхIертуси, Лавашала районна Няскентла шилизивадси Мурад бикIуси уршили сунечи пикри хъярхъли битIакIиб. Дарган мез ункъли далнила дуравад, ил газета бируси программализив узесра бажардивиркулри. Илдигъунти санигIятлашалти дигIяндешуначира университетлизиб руркъни дебали дигеси баркьуди саби. Журналистла санигIят касибхIели, эгер илис лукIес хIейгули виалли, газета балкьарахъуси дизайнерла къуллукъ чеббикIесра имканбикIур. Пагьмула декIар-декIарти жураби адамлизир белгидирни – илра преподавательла халаси чеасла саби. Ил шайчирра ХIямид ГIябдуллаевичли гIяхIцад цIакьани харждирни чебаэслири.
«Пагьмула бархIи» студентуни редакциялизиб бузахъес, хIянчизартачил ва бузерила бетуцуначил тянишбиахъес батурли аркьухIели, ХIямид ГIябдуллаевич викIар: «Вари, хIуша ишдачил дарган мезли гъайдикIеная». Ишцадра хъярхъли гьалабяхI башуси дунъяличиб жагьилтази миллатла хIячмачила хъумхIертахъесра чекайзурли сай ил.
Практикала замана касибти багьудлуми кIинайс, бузерилизирра дебали багаладирути сари. Ил багьандан сай преподавательра къайгъилизивси сунела студентуни практикала замана хьулчилидиубти багьудлумачи бегIбиахъес. Преподаватель сецадла тIалабкарси виалра, илцадра гIяхIти, мурхьти багьудлумачилти студентуни дурабулхъули бирар университетлизибадра. ХIямид ГIябдуллаевичли бучIахъути студентунира гьамадли декIар-декIарти къуллукъуначиб бузес бажардибиркниличи нушала халаси бирхауди леб.
ДГУ-ла юбилейличил бархбасахъи, ХIямид ГIябдуллаевич ва илала бархкьяби уркIи-уркIилабад мубаракбирулра, улкалис багаласи чула бузерилизир сархибдешуни дулгулра. СанигIятлашалти устадешличи бурсибарибти жагьил специалистуни хIядурбирнила хIяракат гьатIиралра ункъли бетурхахъес хIушаб цIакьанира чIумаси арадешра габ Кьуд­ратла ВегIли!