Дагъиста халкьла тарихлизи хIеризалли, ил дубурлантала игитдешла ва узидешла гIибратунани бицIили саби. ИшбархIира, улкализир ибкьти аги-кьяйда кадизурси замана, нушани чебиулра Дагъистан гьарли-марти бургъантала ванза биъни, сабира бурибси гъайлис марти ва къияндешунас мутIигIхIебикIути.
Ил багьандан ну­шала ре­спуб­ли­кализибад дура­бу­хъунти Иги­тунала лу­гIира халаси саби. Пача­лихъла ахъти шабагъатуначи лайикьбикибтала шайчиб улкала регионти-ургаб нушала республика гьалабси мерличиб саби.
СВО бехIби­хьиб­ла 15 эсил да­гъистанлан Сухраб Султанович ГIяхIмадов Россияла Игитла уличи лайикьикили сай. Илини 2022 ибил дус­личирад дявила хасси балбуцлизир гьаркьятала къяя­назир бутIакьяндеш дирули сай. Сухраб ГIяхIмадов урхIла гIела дигIянхIейруси, даим сунела бекI­дешлиубти бургъантачил варх вируси дявила ко­мандир сай. Илала гъабзадешли ва устадешли чула гьалар тIашдатурти дявила масъулти арзахъес чуйнара кумекбарибсири. Сухраб Султановичли хаслира халати гъабзадеш дакIударибтири Курскла шайчибяхI бургъухIели.
Генерал-лейтенант Сухраб ГIяхIмадовли ду­деш­ла дякькад вашес ва сунела гIямру дявила къуллукъличил дигьес пикрибариб. Илала дудеш Султан ИсмягIилович отставкаличивси полковник сай. С.ГIяхIмадовли гьаланачи Новосибирсклизиб дя­­вила командиртала чебяхIси училище, кIинайс – Москвализиб М.Фрунзела уличилси Дявила ака­демия хъараахъур. Кьанниван Генеральный Штабла академияра хъараахъурсири. Чинаб къуллукъбиралра ил хъялис ва пикруми-бетуцунас марли калун.
Сухраб ГIяхIмадовла у Дагъиста асилдешла та­рихлизи каберхурли саби. Дубуртар Улка ва арагIебли Россия Игитличи пахрули дицIили сари, илис чIумаси арадешра сунела баркьудилизир гьатIиралра дахъал сархибдешуни дулгулра ва жяв-жявли чедиб­дешличил хъули чарухъи дигни балахъулра!

ПатIимат Мирзаева