ГIяхIси хабар хибси гIяхIял
Аркьян уркIи арбухили…
Ца дугилис хьурайубси
Аркьян пикруми датурли. (ГъазимяхIяммад Юсупов)
Арбякьунси сентябрь базла 26-личир нушаб бекIлил хабарагарси гьунибаъни бетаур. Ил бархIи Хунзахла районнизиб бетурхуси «Дагъиста хъалибарг» бикIуси байрамличи жидарира.
Сергокъалала районна халкь бекIахъудилашал гIеббурцуси цахIнабикла бузери къелгIеббикути ХIябибуллагь Идрисовла ва Заира ГIябдулманаповала бекIдешлиур нуша ила дякьунра. Илгъуна гIяхIси хабарличила аргъибхIели, нушалара уркIи гьуцIбухъун мер-муса чедаэс ва балбуцлизир бутIакьяндеш дарес.
Машинала духIнарад хIердизурхIели, чедиути мер-муса тамашала анцIбукьличи хIертиван шипIдяргIили лехIлири. Мурхьти къадурбазиб ва диркьти мераначиб дирихь гIяйбиублири. Урга-ургади забра виздулхъулри.
ХIера, бурибси заманалис нуша Хунзахлизи даира. Ил азирти юртаназибад цалабикибси, чуйнара Россияла, республикала газетабала, жузала бяхIяназиб ва телевидениелизиб бурибси, сабира хала бегIтала гIядлу-зегъа чIумали дузахъуси, бархьдеш байрахъван ахъли бихуси район саби. ХIязлис ахIенгу халкьла далуйтазибра хунзахлантала гъабзадеш-кабизалачебдешличила, яхI-сабурличила, ламус-хатирличила, гIяхIялдешличила, гьалмагъдешличила буруси. Леб халкьлис гIяхIдеш бихути, илдала яшавла шуртIри гIяхIдухъахъес, улкалис, халкьлис манпагIятли бузес гъирали бицIибти, бекIдеш дирнила устадеш чузир лерти руководительтира.
Хунзахла КЦСОН-ла директор Заирбек Атабаевла бекIдешлиубти хIянчизарти баркалла ва хIурмат сархути биъни марбирули, бакIибти гIяхIлас къакъбяхъуни бетаурлири. Бурасли, Хунзахла администрацияла юртла гьала машина тIашаибмад, сакIубли, разили гьунираиб жагати чарх-бекIла ва шалати дяхIла регI хьунул адам. Яхши-хуш дарили гIергъи рикIар:
— Ну Марьям ХIяжиева сарра, КЦСОН-ла заведующая. ИшбархIи хIушаб, Сергокъалализибад бакIибси Идрисовхъала хъалибарглис, къуллукъчили ретарусира.
Ил замана кIарахъала поэт Макьсуд ЗайнулгIябидовла ишди дугьбира уркIиличи дакIиб:
— Шаласира сари ил
БерхIила нураниван,
ХIялалси, пасихIсира
Дурхъаси неш-ванзаван.
Сари гьалар рашули, Марьямли нуша лебгIеб умуси юртлизи ардукира. Илабра нушаб Хунзахла администрацияла ва КЦСОН-ла чумал хIянчизар разили гьунибаиб. Илдани нуша хIурматличил кьабулдарира ва къугъали баршибси кьумурличи кадатурра. Марьямли нуша хьурадиубси, Дагъиста тарихла памятникли сабси юртличила баянти гьаладихьиб. Иличи лехIирхъутала ургаб Ахъушабад, Лавашабад, Гъуниблизибад, Кумухлизибад бакIибти гIяхIлира лебри.
Марьямли ил бархIи дурадуркIути байрамла тяхIяр-кьяйдаличила буриб.
СВО-лизиб гъабзала бебкIали алхунти бургъантала хIурматлис убалтуси анхълизиб памятник тIашбалтнилис хасбарибси митинг бехIбихьиб. Иличиб Дагъиста Правительствола Председатель ГIябдулмуслим ГIябдулмуслимовли дубурлантала гъабзадешличила, Дагъиста халкьла уржибдешличила уркIилизи атIести гъай дуриб. Сунес хIялалдиъ, илини цалабикибтала гьалаб халаси хIурмат лебни гIячихъбиахъуб. Илдигъунти биалри нушала лебилра хIякимти или гьанбикиб.
Нушанира «Гьанбикунала анхълизи» ца галга убатурра: гIямрулис Хунзахла ванзаличир къел-хIерзи датурра. КIинайс, «Къургъи» памятникличи гьуни даимбарира. Циила тяйдили ЦIадала ши чебиулри. Алавчарси ургуба бухъутIа-шиниша дарайла хIева чегьурси исбагьиван кабизурлири, заклизир азадли кIайдяхIибти чIакни чедиулри, арцантани, жагати макьамтачил, гIяхIлас дезни дучIулри. ТIабигIятра арцантира уркIи-гьаргти хунзахлантачил вягIдаладиубтигъунтири. Тяйдили, даршдусмала бикьрумили детаурти, хамли кадизурти дубурти чедиулри, делхъ-далайла макьамти чедихулри. Гьалабизурси суратли уркIила гьав ахъбурцулри. Дагъиста миллатунала вакилтала чятиртани баршибси майдан тамашала жузван гьаргбиуб. Ца шайчир гавдикIулри пловли дицIибти къазанти, мякьлар – руржути самоварти. Нушала кьукья майдунтикад къунзбухъун. Чедаира Унцукульла, Балхъарла, ЦIудхъурла ва цархIилти шималара устанала някъла пергер хIянчурби. Гьарил миллатла бизити хурегунала тIем багьурра. Байрам бемжур. Делхъ-далайла устанани чула пагьмурти гьаргдирулри. Бамкьурси аргъли цалабикибтала разиси гьавличи сегъуналра асар бирули ахIенри.
Сергокъалала культурала хIянчизартанира илар пагьмурти чедаахъиб. Байрамличир дубурлантала гьалмагъдешла ва уржибдешла аги кабизурлири. Лебил майдан берхъибси хъалибаргван цабалги вяшбикIулри.
ЧебяхIси ВатIа дергълизиб алхунти игитунала хIурматлис тIашбатурси памятникла гьалаб «Дагъиста хъалибарг» бикIуси балбуц даимбиуб.
Нушала республикала районтазибад байрамличи бакIибти 18 хъалибарглис ГI.ГIябдулмуслимовли ДР-ла Правительствола шайзирад Баркаллала кагъурти ва декIар-декIарти савгъатуни дедиб, хъалибаргла гIяхIти гIядатуни мяхIкамдирни ва дурхIни руркънилизи, рухIла давла чебирцIахънилизи белгиси пай кабирхьни багьандан.
Нуша гьунидалтути кIарахъан рурси Марьямличил ва ХIябибуллагьличил барх памятникла удибси музейра чебаира, сунезибра сихIру-бикьридешла цIакь бухIнабси, разидешла хIялани дургъахъуси.
Дев бугаси, халаси пагьмула вегI поэт ХIямзат ЦIадасала юртла бухIнаб лебилра кIарахъантас балгара барира. Баркалла биаб хунзахлантас, чула хала бегIтала гIядатуни дузахъути ва илдала аманатлис марли калунти. Макьала ахирличи биркахъули, ил байрамла сиптакартас – Хунзахла районна администрацияла хIянчизартас, Марьям ХIяжиевас, нуша гьунидатурти Сергокъалала районна администрацияла хIянчизартас баркалла багьахъес дигулра.
Марьям рузи, хIед халаси баркалла нушала шайзибад. ХIед ва хIела хъалибарглис чIумаси арадеш, хъулиб баракат дулгулра ва назмула ишди тугъи багъишладирулра:
Асилти баркь-бацла регI
Мисрила чатIагъуна
ПархбикIуси ула регI.
Юсрула суратгъуна
Саркъибси сипатла регI.
Калаби хIу даршал дус
ХIяя ахъли дихIули,
КIарахъан рузи, Марьям.
Сергокъалала районна ГIяялизимахьилизибадси ГIябдулманап ва Рукьият Идрисовхъала хъалибаргла шайзибад
