ПатIимат ва ДинбяхIяммад Бутрила шилизиб, хIурматла хъалибаргуназиб акIубти саби. Илди гьанна 48 дус барх хIербирули саби.
Илди малхIямти, дяхI шалати, сабурчебти, дебали гIяхIти адамти саби. Илдани цали ца гьимбукIахънила, цали цала бируси гIебхIебуцнила анцIбукь биубси ахIен.
ДинбяхIяммад МяхIяммадов Дагъиста пачалихъла пединститут таманбарили, чебяхIси даражала багьудира касили, дахъал дусмазив учительли узусири. ТIебекмахьила школализирра историяла дурсри кадирхьутири илини. ДурхIначи дигичевси, илдази багьуди касахъес, илдала багьудиличи диги имцIабиахъес къайгъилизив вирусири ДинбяхIяммад. Гьанна биалли ил пенсияличив сай.
ПатIимат НурмяхIяммадованира Бутрила шилизибси школа таманбарили, Буйнакъск шагьарлизибси педучилищелизи карерхур. Илини педучилище хIунтIена дипломличил таманбарили, ил дуслизирал Дагъиста пединститутлизи карерхур.
Пединститут хъараахъурли гIергъи, ПатIимат Ахъушала шилизибси Семгамахьила школализи рузахъес рархьибсири. Илар урус мезла ва литературала дурсри кадирхьули рузусири.
ПатIимат 1982 ибил дуслизир ТIебекмахьилизибси школализир рузес рехIрихьиб ва илар рузули калун 1994 ибил дусличи бикайчи. ДурхIначи дигичерси, илдала багьудлуми чедицIахъес бажардилизир рири. 1994 ибил дусличирад ПатIимат Бутрила шила администрацияла бекIла заместительли рузули сари. Жавабкардешличир рузули, сунечи дугьабизурти шила халкьла мурад бетерхахъес гьалакли рирар ил. ЦацахIели ПатIимат районна центрлизирра чериур. Ил районна администрацияла хъарбаркьуни детерхахъес чекаризурли рузули сари.
ДинбяхIяммадла ва ПатIиматла кIел уршира леб. Илдас бегIтани гIяхIси бяркъ бедиб, чебяхIси даражала багьуди касахъиб ва хъайчикабатур.
ПатIимат ва ДинбяхIяммад чинаб бузули биалра, чучи хъарси хIянчи жавабкардешличил, чебетаахъили бетерхахъес бажардибиркути сабри.
Саби бузути коллективтазиб ва Бутрила шилизиб халаси хIурмат сархиб илдани. Халкьлис ва гIямрулизиб, арадешлизиб нукьсандеш лебти адамтас кумекбирули, хIялалси бузериличил хIербирули саби илди.
ПатIимат Рабадановна Ахъушала районна администрацияла шайзирад чумал ХIурматла Грамоталичил, пачалихъла статистикала Федеральный кабизла шайзирад медальтачил шабагъатларарибсири.
Ил хъалибарглис гьаннала гIергъира сархибдешуни имцIадикIули, чула баркьибтани разибирули хIербиэс кьадарбиаб!
С.ГIябдуллаева
