БяхIмудкьадиева Зубалжат Жалаловна акIубси сари ХIинтIала шилизир хIурматла хъалибарглизир.
Урга даражала школа таманбарили, Дагъиста пачалихъла педуниверситетлизи карерхур ва 1997 ибил дуслизир, ил хъараахъурли, урус мезла ва литературала мугIяллимла санигIятличи регIриуб. Зубалжатли Москва шагьарлизибси «Педагогическое образование» бикIуси программа хIясибли «Московский институт современного образования» бикIуси багьудила даража ахъбурцуси институтра белчIун.
Куркимахьила школализир Зубалжат гехIел дус библиотекарьлира, гIур урус мезла ва литературала учительницали, кIел дус багьудила ва бяркъла шайчирси директорла заместительли рузули калун, гьанна ил бехIбихьудла классунас дурсри кадирхьули рузули сари.
Шел дус Ахъушала районна судла халкьла заседательлира калун.
«Лебил Россияла педагогунала Собрание» бикIуси лебил Россияла жамигIятла организацияла Дагъиста отделениела членра сарри.
Зубалжатла бузерила стаж 34 дусла леб. Черетаибси, чеббикIибси санигIятлис марси, дурхIначи дигичерси, илдази багьуди касахъес къайгъилизирси, хIялалси, малхIямси учительница сари. БучIантала бегIтачил бархбас бузахъу, илданира илала халаси хIурмат биру. Зубалжатли декIар-декIарти районна, республикала кьадрила конкурсуначир бутIакьяндеш диру. Илини бучIахъути дурхIнани олимпиадабазир жигарла бутIакьяндеш диру ва гьаларти мераначи лайикьбиркули бирар. Дурсрачирад акьуси замана кружокуни, тематический вечерти, конференцияби, стенгазетаби, портфолиоби далкьарахъу.
Багьудила управлениела ва сари рузуси школала шайзирад чумал ХIурматла Грамоталичи лайикьрикиб.
2022 ибил дуслизир «Педагогическая династия» бикIуси республикала кьадрила, ДР-ла урибси учитель Б.М.Байрамбеков 100 дус виънилис багъишлабарибси конкурсличиб Диплом сархиб «Учителя живут в учениках» бикIуси хIянчилис; ишдусла мартла 1-личиб дураберкIибси «Педагогическая династия» бикIуси конкурсличиб чедибдеш сархили, михъирличи биршуси Лишанничи лайикьрикиб.
Гьаннала гIергъира сунела бузерилизир ва гIямрулизир сархибдешуни имцIадикIаб!
Сабият ГIябдуллаева
