ГIергъити чумал дус улкализир ва дунъяличир цархIилти сегъунтилра анцIбукьуни кахIедиркутиван, нуша СВО-лизир бутIакьяндеш дирути уршбачила, узбачила кьакьадикIулра. Ургъан кавшили сай ибси хабар аргъахIелли, бареси хIебалули, тамай кьакьадакIили, децIла кьялшубазир цIумдикIулра. Амма нушала мякьлаб хIербирутира кьутIкьуси кьисматли бургниличила гьаналра биркули ахIен. Сепайда,…
Гьанна 7 дусличибра имцIали «Даргала анкъи» бикIуси кьукьяли бахъал Дубуртар Улкала даргала лерилрара-сера шимазибадти мугIяллимти, поэтуни, писательти, журналистуни, культурала учреждениебала хIянчизарти цалабяхъили саби. Ил кьукьяла дурхъаси гьайкарлизи мурталра халрирусири Избербаш шагьарлизир хIеррируси Мурегала шилизирадси Индира ГIямарова. ДяхIягарси изай коляскализи кариахъибси ва бегIтазирад мяхIрумриубси ил сунела узи Русла хъалибаргличил хIеррирусири. Узила хьунул Умукурсумлира илис халаси къуллукъбирусири ва бахъла баркаллаличи лайикьрикибсири. ЦацахIели илини кьукьяла далдуцуназирра бутIакьяндеш дирутири. Ва илхIели илала разидешлис ахир хIебири. Илис лебилра анкъила бутIакьянчиби узби-рузби бетауртири ва цаван лебилра дигахъутири. Вацаплизибси кьукьялизир ил бегI гьалар савли саламличил нушачи дугьарилзусири ва шаласи пишбяхъниличилти сунела суратуни дурхьутири. ЦацахIели чидил-биалра бутIакьянчилара сунелайчил барх сурат багьарбирахъи. Сегъуна-биалра балбуц дураберкIибхIели, иларадти видеобира суратунира пайдаладарили, клипани диресра бажардириркусири.
Илкьяйдали Индира «Даргала анкъи»-ла гьайкарцунра ахIи, дай уркIира сарри. Илини лебилра кьукья гьайбатли «тимхъбикIахъусиван» билзусиригу лебтасалра.
— Нушала кьукьялизи рархрикайчи илини дарган мезли лукIес балуси ахIенри, — бикIули саби анкъиланти, — гьанна назмурти лукIесра рархли бурсириубли сари. ЦацахIели илини акIубси бархIиличил яра цархIил разиси анцIбукь кабикибхIели багъишлаби савгъатдирулира рири.
Индира ГIямаровани мурталра тикрарбирусири: «ХIуша наб дебали дигахъутира, дила ахIерти узби ва рузби. ХIушаб арадешра талихIра дулгуси хIушала рузи сарра, нура ригахъабая…». Илала уркIила малхIямдешлис ахир агарсири, адамтачирти дигили ил берхIиван пархкарикIахъусири. Риралри илини иш дунъя даршудешла челябкьлаличи арки, умутунала зурхIяблизи рурги.
Ишди бурхIназиб анкъилантачи кахси хабар бакIиб, Индирани дунъя бархьбатурли сари ибси. Гьайгьай, лебтасалра ил анцIбукь гьарли-марли хIейгибизур, дуцIарти нургъбанира сегъуналра кумекбирули ахIенри кьакьадакIибти уркIбас.
ЧIянкIли илала гъамтачи бялгIя ахъес ва Индирала хIябличи дякьи, бегIла гIергъити децIла дугьби дурули, илала гъайра баркьудлумира гьандикахъни сабри калунси. Амма чула дурхъаси гьайкари «Даргала анкъи»-ла кьукьяли, ил ралутани ва илала гъамти-шантани сеналра хъумхIерту.
Гъамтачи ва шантачи дураберкIибси бегIла гIергъиси пашмандешла архIялис гIергъира, нушани Индира даим гьанриркахъехIе ва илис гьалжана кьадарбиахъес ЧевяхIсилизи дулгехIе.
Нушала Индирас назмула чумал тугъра пешкешдирулра:
ЦIяб дуги шалал бацван
Нурличил аралкунил,
УркIбази адамтала
Диги хьурадарибил.
БерхIиван дай хIерила
Ухути дяхI шалали,
Гъагултази хъябхъяла
Дуцахъибгу кьисматли.
Анкъилизиб хIела мер
Леб хIябилра бацIбухъи,
Гьанна дисули илар
Гьанарар хIяжла чатIни.
АкIубла бунагьлизи
ХIерикибси исбагьи,
Гьалжанала анхълизи
Хьурарараб Аллагьли.
ГIярбукIай магьиличи
Някьишван мургьи-арцла,
Гьанна хIела у белкIи
Леб уркIбазиб нушала.
Тамара ГIябдусалимова
