Ца бархIи социальный сета­на­зи хIердикIухIели адам жи­гар­­чев­вирахъути держли беб­кIа­хъиб­­тачила чумра багьахъни къаршидикиб. ГIер­гъиси замана илдигъунти анцIбукьуни им­­цIали кадиркули сари. Жагьилти адам­тани чула арадешлис вайси асар бирни пик­ри­хIе­ба­рили илди дужули сари.
Илдала тIем гIяхIси бургар, амма селизирад дарибтил хIерикIалли, урухвиэси тяхIяр леб. Илдигъунти держла цахIнабик сегъуна сабил или Интернетлизи хIеръибхIели, ну тамашариубра. Халаси кьадар кофеинна, тауринна ва чакарла илар лер. Кофеинни уркIила тимхъ къалабабирахъуси саби ва хIила туми гъяждирахъути сари или белкIири илаб. ЦацабехIтас ил урухкIеси секIал ахIен, кофера дужути диалли или гьанбикес асубирар. Амма ил кофеинничил барх держлизи гъудурбарибси тауринни уркIила-тумала ва нервабала кабизличи декIси асар бируси саби.
Тухтуртанира бурули саби, адам жигар­чев­вирахъути держ дужес асубируси ахIен или. Гьарил адамли илди цаван чекайсули хIедирар. ЦацабехIтас илдани гьар замана ца­камси асар бирули арадешла аги вай­тIа­ка­бир­кахъу, цархIилтас биалли, дал­хIе­ди­кили, итмаданал алхес асубирар. Илди держли кьуват имцIабирахъули ва гьанкI бетихъахъули саби или машиналичиб башути шофертанира илди дужули дирар. Амма илра хатIа саби. Держлизиб лебси халаси кьадарла кофеинни саби гьаланачи илгъуна пикри башахъуси. КIинайс биалли, багьла-багьлали лерилра духIнарти биркIанти илини пашихъахъули сари. Жигарчевли виэс багьандан хасси замана кайхьи гьанкI ихъес пайдаласи беркала букес ва арати гIямру дур­кIес хIяжатси саби.

ПатIимат Шахова