Шарапутдин Ильясович Умаханов 1914 ибил дуслизив Лавашала районна ЦIудхъурла шилизив, хъубзарла хъалибарглизив акIубси сай. Илини урга даражала багьуди касибсири.
1953 ибил дуслизив Ш.И.Умаханов гIелакабухъунси «ЦIудхъурла» колхозла председательли викIибсири. Ил, варсхIейубли 25 дус колхозлизив узули калун. Илала бузерила сархибдешунани «ЦIудхъурла» колхоз бегIлара гьаркьятала къяянази дурабухъахъунсири. Ил узухIели колхозла экономика ахъси даражала бетаурсири, 1954 ибил дуслизиб 120290 къурушла хайри сархибхIели, 1965 ибил дуслизиб 525315 къурушла хайри сархибсири.
Хъумачиб сархуси сабухъ ва белгIуси ванзала чIябар гьалакли халадаибтири. 1954 ибил дуслизиб 3,31 центнер анкIила сархухIели, 1965 ибил дуслизиб 19,8 центнерличи халбиубсири ца гектарличибад сархуси анкIила сабухъ.
ИтхIели гьалабяхI арбякьи, хайричебсили бетаурсири мицIираг адилкьнила шалира. 1954 ибил дуслизир колхозла фермабазир 363 хала хIяйван,1680 маза-мас лерхIели, 1965 ибил дуслизир 1067 хала хIяйван ва 12713 маза-мас лертири.
Илкьяйдали, 1961 ибил дусличил цугдуцибхIели, 1965 ибил дуслизир ниъ кIинали, диъ 3,3-нали, бала 1,5-нали имцIали сархибтири.
Шилизир культурала Юрт, школа, дурхIнала анхъ ва цархIилтира хIяжатдиркути хъулри тIашдатуртири.
«ЦIудхъурла» колхоз республикализибра гьаркьятала къяяназиб бирусири, ва илала у республикала хIурматла уркьуйчи баршили бирусири, илини ВДНХ-лизира сунела сархибдешуни гьаладихьибтири, Шарапутдин Ильясович Умаханов дахъал дусмазив варсхIерибси Лавашала райкомла бюрола членли вирусири.
Бузерилизир диахъубти сархибдешуни, жамигIятла гIямрулизир жигарла бутIакьяндеш дирни багьандан Шарапутдин Ильясович Умаханов В.И.Ленинна, Октябрьла Революцияла, «ХIурматла лишан» ордентачил ва дахъал медальтачил шабагъатлаварибсири.
Илини, 1964 ибил дуслизиб «ДургIети цIедешличи гьуни» бикIуси жуз белкIунсири ва дуракаибсири. Илизиб «ЦIудхъурла» колхозла халати сабухъуни сархнила дигIяндешуначила бурили саби. Гьаннала фермертас багалабиахъес дигусилис Россияла электронная библиотекализиб матъал заказбарили компьютерлизиб белчIес вирули сай.
Илдигъунти даргала асилти уршби-рурсбачила халкьлизи хъумхIертахъес багьандан цалабяхъили жуз дуракаибси П.Кь.БяхIяндовас баркалла балахъулра.
ХIядурбарибси — М.Хаттаева (П.БяхIяндовани дуракаибси «Дагъиста тарихлизиб дарганти» бикIуси жузлизибад касибси саби)
