Адамла гIямрулизиб далайли хасси мер бурцули саби. ВиштIахIейчивад нешли бучIуси лайлала асар бургар. Адамла уркIиличи халаси асар бирули саби далайли. БархIиличи-бархIи бахъбикIули саби далайчиби. Амма лебилра илди ца къяйлизи кабатес хIейрар. Бахъал пергер далуйтала устни арбякьун даимдешлизи нушачибад: МяхIяммад Улахъаев, СултIанат Кьурбанова ва цархIилти. Леб ишбархIира халкьла уркIбачи гьуни баргибти далайчиби. Илдала лугIилизив урес вирус пергер далайла уста, жагали делхъли улхъуси ва жикьила макьамтани гIялам хIяйранбируси МяхIяммадкьади БяхIмудов.
Ил акIубси сай Дахадаевла районна далай-делхъла устначил машгьурси ХудуцIла шилизив. МажахIят, ургар Дагъистайзив ил шиличила ва илабад дурабухъунти делхъла ва далайла устначила хIергъибси. МяхIяммадкьади виштIахIейчивадал далайикIусири ва шила культурала Юртла жигарла бутIакьянчи вири. Илини сунела жагати далуйтачил адамтала уркIбачи гьуни баргиб. Илала жагаси тIама мурталра сирхIяла дубуртазиб булбулла тIамаван гIеб-гIебалгьули бири. Илини сунела гIямру далай-делхъличил цIацIали дархдасахъун.
БусягIятра МяхIяммадкьади даргала далуйтала устнала ургав бегIлара черикIла къяйлизив сай. Гьаман концертуначив ва мукърачив чеваэс вирар ил сунела жагаси тIамали заллизибти хIяйранбирули.Гьанна МяхIяммадкьади БяхIмудов Дербентла районна Мамедкъалала культурала Юртлизив художественный руководительли узули сай.Илкьяйдали ил «ХудуцI» бикIуси фольклорла ансамбльла руководитель сай, ил кьукьяли даргала лерилрара-сера концертуначир чула жагати далуйти ва делхъ чедиахъу.
ВецIал дус гьалаб илис Дагъиста культурала урибси хIянчизарла у бедибсири. Бара гьалабван МяхIяммадкьади Дагъиста урибси гIяртистла уличи лайикьикиб. ХIурматла у гибнилис хIу уркIи-уркIилавад мубаракирулри. Мурталра хIела тIамали нуша разидирули нушала ургав каммайаби, узи МяхIяммадкьади.
Дебали жагати ва кагибти дугьби пайдаладиру илини сунела далуйтазир. Гьачам илала далай бакьибси гьатIира илала тIама бакьес хIерли вирар. Адамтас анцIхIедукьести, чула макьамтаур улхъес гъира алкIахъути далуйти сари МяхIяммадкьади БяхIмудовла. Илини декIар-декIарти конкурсуначир бутIакьяндеш диру. М.БяхIмудовли 8 концерт дарили сай. Санкт-Петербурглизир детерхурти Дагъиста бурхIназирра илини жигарла пай кабихьиб.
Урибси далайчицунра ахIи, ил пергер хъалибаргла бекIра сай. ГIямрула рархкья ПатIиматличил илини дурхIни абикьур ва гIямрула бархьси гьунчи дураиб.
Арати гIямру ва гьарбизуни дулгулра хIед!
Кьади ГIялисултIанов
