Ишдус сунела 85 дус риънила юбилей дурабуркIули саби Дагъиста халкьла гIяртистка ГIябдуллаева ПатIимат ГIябдуллаевнани.
Ил акIубси сари 1941 ибил дуслизир Ахъушала районна Бутрила шилизир. ПатIимат ГIяб­дуллаева жявли цIу­ръариуб, Гъур­­букI­­лизиб биш­тIатас хас­­барибси Юрт­­лизир хала­раиб­­сири. Ил риш­­тIахIейчирад му­гIяллим ретаэс пик­ри­ри­кIусири, ам­ма гIямрула кьасани цархIилтили урдухъун.
РиштIаси рурсила уркIилизир халкьла пагьмуличи, фольклорличи диги минадиуб, илини шила халкь сунела далуйтачил гьаман разибирутири.
Халкьла культура гьалабяхI башахъули, жагьси гIяртисткала пагьму гьатIиралра машгьурбиуб. Избербаш шагьарлизиб даргала Театр абхьибхIели, жагьти, пагьмучебти адамти гIягIнилири, илар рузахъес ил жирарибсири. Сунела гIямрула-гIямру сценаличир рузусиван ил сарерхурли, гьарил рольличи чекаризурли рири. Илини чумра спектакльлизир бутIакьяндеш дариб, илдазибад ца Расул ХIямзатовла «Дубурла хьунул адам» бикIуси поэмала пьесализир Парила роль бузахъули калун. Мурталра спектакльти далуйтала комедияла жанрлизи кадирхьули дири, ПатIимат ГIябдуллаеванира ункъли далайрикIули, сунезибад лябкьусигъуна барили, миллатла культурализи мекелли халаси пай кабирхьулри. ЦацахIели спектакль таманбиубли гIергъира хIербикIутани ПатIимат рархьхIейулира рири, гьатIира далуйти делчIахъес тиладибикIули.
П.ГIябдуллаевала гIямрулизиб бахъхIи хъум­хIер­турли калун 1969 ибил дуслизиб Ленинградлизиб дураберкIибси Дагъиста искусствола ва литературала декада. Илизир бутIакьяндеш дарни багьандан, далайчи Ленинград шагьарла исполкомла ХIурматла Грамоталичи лайикьрикибсири. Ил дуслизиб илис ДАССР-ла рурибси гIяртисткала ура бедиб.
1969 ибил дусличирад рехIрихьили, 2004-ибил дусличи бикайчи Гостелерадиокомпанияла «Дагъистан» хорлизир солистка рири, кIинайс биалли, Дагъиста театрла оперализир ва балетлизир рузули калун.
Дагъиста искусство гьалабяхI башахънила баркьудилизи халаси пай кабихьни багьандан, 1977 ибил дуслизир ПатIимат ГIябдуллаевас Дагъиста халкьла гIяртисткала хIурматла у бедибсири.
Концертла программа бухили ПатIимат ГIяб­дул­лаевна чуйнара дурала улкназира рякьунси сари. Пачалихъла Академияла «Лезгинка» ансамбльличил дарх ГДР-ла 24 шагьар чедидяхъиб. Илала творчество дигути дебали бахъал бири. ПатIиматла дебали жагаси, зайбикIуси, варачан кьяйда бучIуси тIама гьарилла хъулибси радиоприемниклизибад чебихули бири. Илизи гIяхIялдеш дарахъес гьарил юртлизиб адамти хIерли бири. ПатIимат ГIябдуллаевала далуйти лерилра Дагъиста телевидениебазир дучIахъули дири.
Илала хъалибаргличилара гьанбушесра гIягIнили саби. Мурул ГIусман ГIусманов ГТРК-ла режиссер вири. Рурси Солидат — музыкала мугIяллим, илкьяйдали ГТРК-лизирра рузули калун. Лер рурсила рурси Камиллара. Илдачи ил пахрули риркьули рирар, сабира ПатIиматлис къакъбяхъли бетаурли саби. Сунени ахъибси гIямрула гьунчи хIеррилзули, гIяртисткани халаси баркаллаличил ва дигиличил гьанбиркахъули саби сари пагьмучерси далайчи ретаахъес кумекбарибти адамтачила, сунечил барх бузули калунти гьалмагъуначила. Иличил рарх рузутазирад ца сари иш белкIла авторра (Салимат ХIяжиева). ПатIимат дебали уркIи гьаргси, малхIямси, хIялалси, бируси хIянчиличи чекаризурси, гьарил дугьаизурсилис итмаданал кумекбарес хIядурси адам сари. Барх бузутас ва бакIибти гIяхIлас ил разиси адамличил гьаман ихтилатбикIес дигахъулри.
Ишдус дурабуркIуси юбилейличил ПатIимат ГIябдуллаева нушани уркIи-уркIиларад мубаракрирулра. Арати ва разити бурхIни илала гIямрулизир камхIедирули, сунела чеалкIуси наслура тяп сари кьяйда саберхуртили ва пагьмучебтили биубли дигулра.
Анжела Мутазова,
Салимат ХIяжиева,
Расул ХIямзатовла уличилси Миллатла библиотекала хIянчизар