Ахъушала районна больницализиб гIяхIцад жагьилти, пагьмучебти, чули касибси санигIятлис марти тухтурти леб бузули.

Нушачи чумра адам МяхIяммадова СягIида Мусаевначила газетализибад баркалла  багьахъес дугьабизур. Ил терапияла отделениелизир рузули сари.

СягIидани зягIипбикибтачи халаси уркIецIиличил,  хIеруди бирули рирар. Ил зягIиптачил малхIямли гъайрикIар, илдачи дугьарилзули, арадешлизирти нукьсандешуначила хьархъардиули рирар. БикIули бираргу, малхIямси девли изала хIярхIбирахъу или.

ГIисаева Марьям ГIябдуллаевнара дебали гIяхIси тухтур сари.  Илра терапияла отделениелизир рузули сари. Изала  кабизахъес гьалаб илини сегъуна тяхIярличил ил дакIубухъунал, зягIипсилис балхIебиркуси  сегъуна-биалра дарман лебал ахтардибиру.

Районна больницализир неврологияла отделениелизир медсестрали рузули сари ГIялиханова Разият Чупановна. Иличилара дахъал гIяхIти гъай дурес вирар. Разиятличила бахъал адамти гапбикIули саби, зягIиптачи чебетаахъили хIеруди бирни багьандан.

СягIида Мусаевна, Марьям ГIябдуллаевна ва Разият Чупановна хIурматла хъалибаргуназиб халабаибти рурсби саби. Илди школабира ункъли тамандарили, мединститутлизи ва медучилищелизи каберхурли, тухтурла санигIятличи бегIбиубти саби. БегIтани илдас гIяхIси бяркъра бедили, чебяхIси даражала багьудира касахъили, хъайчира кабатурли, гIямрула бархьси дякьличи дураиб.

СягIидани кIел дурхIя абилкьули сари, Марьямла хIябал дурхIя леб, Разиятла биалли — кIел урши. Илдани чула дурхIнира бяркъчебтили ва халатала хIурматбирес балутили абилкьули саби.

Илдани районна халкьла бухIнаб ва саби бузуси коллективла ургаб халаси хIурмат сархиб ва жамигIятла шайзибад баркаллаличи лайикьбикиб. Илди хIябалра рурси цархIилтас гIибратли бетаурли саби.

Чула гIямрулизир, бузерилизир сархибдешуницун диаб. Гьарилла хъалибарглизир балгундешра, баракатра, арадешра каммадиаб! Чула дурхIнани ва илдачибад акIубтани разибирули хIербиэс кьадарбиаб!

С.ГIябдуллаева