Лавашала районна ХI.ХIя­ми­довла ули­чилси кьа­кьа­лабси юрт­лизивад дуралхъули сай ахъ-ахъси, тазаси кьаркьа, дягIути хъуцI­ру­ма­чилси, шалати дяхI­ли­чилси жагьил адам.
Илала машина ургабси хъярхъдешличил Лавашала РЦБ-ла гIяйни абицIули саби ва илаб мерлабирули саби бархIиахъайчи.
Ил 30 дус кьанхIейубли, хIян­чи­ла вашуси, Лавашала РЦБ-ла терапевтическая отделениела заведующий, бекI тухтурла цаибил заместитель, тухтур-терапевт ГIисахIяжиев МяхIяммадхIяжи Асадуллаевич сай.
АкIубси сай ил 1952 ибил дуслизив Лавашала районна Лавашала шилизив, машгьурси насабла, бутран ХIяжила кьамла хъалибарглизив. Ил хIелуси Лавашала районнизив адам, мажахIят, левли виэс.
1987 ибил дуслизиб МяхIяммад­хIяжини ахъти кьиматуначил Лавашала районна урга даражала цаибил школа таманбариб, ва МяхIячкъалала медучилищелизи керхур. Ил хIунтIена дипломличил таманбариб. 1990 ибил дуслизив М.ГIисахIяжиев медуниверситетлизи керхур ва 1996 ибил дуслизиб ил таманбариб. 1996-1997-ибти дусмазиб ДР-ла клиническая больницализиб интернатурара хъараахъес имканбакIиб.
— МяхIяммадхIяжи, медуниверситетлизиб учIес къиянни ахIенрив?
— Гьайгьай, гьала-гьала къияннири, набчил бучIути бахъалгъунти шагьарлантири, илдас гIелахIевхъес, багьандан яхI, сабур, кьас гIягIнилири. Чумра гьанкIагарти дугурби деркIес чебуркъуб. Къияндешунани адам дебшлавируси сай.
— Медуниверситетла гIямрули­чила бурили дигахъира?
— БелчIудила дусмазив конференциябачи, совещаниябачи вашира, семинартазир бутIакьяндеш дарира. Медбратли узира, дугели дежурствобачи вашули калунра, операциябачи вашира, капельницаби, уколти дирира.
Медуниверситетлизи керхурра ур­кIила жи хIясибли, тухтурла сани­гIят­ли­чи диги лерхIели, зягIиптас кумекба­рес багьандан. ГьатIира цIакьси хьул — дудешла (Бутран ХIяжила) санигIят ка­­сес.
ЦацабехIти адамтани пайдалати, гьарилли гIерасести, чилилра хъумхIертести, мургьили делкIунти, чеалкIутас бархьси гьуни чебиахъути, зурхIябван ухути къел-хIерзи гIелар далта, тухтуртас берхIила нурливан медициналашалси гьуни шалабирахъес. Илгъуна сайри Северный Кавказлизир хабардерхурси, пагьмучевси дяхънуша, урусла машгьурси тухтур Пироговли бурсиварибси ассистент ва уркIи гьаргси, хIялалси, вархьси Бутран ХIяжи. Илини сунени дарибти ва пагьмучебти устнази дарахъибти медицинала гIягIниахълуми чедаахъибхIели, машгьурси хирург Пирогов илала (ХIяжила) гIякьлуличи тамашавиубсири. Бутран ХIяжила цацадехI медицинала гIягIниахълуми МяхIячкъалала ва Петербургла музейлизир гьаннара мяхIкамдирули лерал. Пирогов Дагъистайзивад аркьухIели сунела медицинала гIягIниахълуми Бутран ХIяжис пешкешдарибтири. БучIантази ца хIекьдеш багьахъес дигулра, сенахIенну ил лебтанилра хIебала. Урусла машгьурси хирург ОхIлила шилизи вакIибхIели Бутран ХIяжичил барх (ил ассистент сайри) бегI гьалаб наркоз пайдалабарили, илала хIялумцIурсири.
Бутран ХIяжила насаблизиб бахъалгъунти тухтурти саби, ХIяжила пагьмукардеш илдани ахъдурцули сари. Чумал мисал гьандуршис. ХIябиб МуртазагIялив Буйнакъск шагьарла ВТЭК-ла начальник сайри, Арсен ШяхIбанов РЦП-ла хириргияли хъяйхъуби сагъдирнила отделениела заведующий сай, Руслан ШяхIбанов Дагъиста медакадемияла лечебный факультетла деканри, ГIябдуллагь Айгумов Лавашала поликлиникала хирург сай, Багьаудин Ибрагьимов Лавашала поликлиникала пагьмучевси цулбала тухтур сай, МяхIяммадхIяжи ГIисахIяжиев Лавашала РЦБ-ла терапевтический отделениела заведующий сай, Руслан ШяхIбанов ДГУ-ла гистологияла кафедрала заведующий сай.
Бутран ХIяжила кьам МяхIям­мад­хIяжила виштIаси узи МяхIяммадли гьатIира машгьурбариб. Ил азадли мушулвашнила шайчив Россияла чемпион, Европала ва дунъяла чемпионатла верхIна призёр сай.
Ил машгьурси насаблизивад­си сай дила белкIла игит ГIиса­хIя­жиев МяхIяммадхIяжи Асадуллаевичра.
Илди узбала – МяхIяммадхIяжила ва МяхIяммадла — дудеш Асадуллагь ДАССР-ла, РФ-ла вачар-чакарла урибси хIянчизар сайри. ИтхIели дубурла шимази дашути машинаби Лавашала шила дайларад — пекарнялара столоваялара гьаларад дири. Машинаби тIашаили хурегли букес столоваялизи абицIутири. Асадуллагьли гушти, бамсурти бизиси хурегли балхи. Илдазирад баркаллала гъайра иргъи. Асадуллагьла дудеш ГIисахIяжила МяхIяммадра машгьурси кьацI дуцIан (пекарь) вири.
Илдигъунти сабри Бутран ХIяжила кьам адамтас багалати, зягIиптачи уркIецIичебти.
Гьанна очеркла бекI игит ГIи­сахIяжиев МяхIяммадхIяжи Асадуллаевличила бурисра. СенахIенну ил Северный Кавказлизивра машгьурси кьамлизивадси ДР-ла урибси тухтур сайри. Пачалихъла ва Верховный Советла ХIурматла Грамотабачил шабагъатлаварибсири ил 1999 ибил дуслизив. 2025 ибил дуслизив биалли, ил Дагъиста арадеш мяхIкамбирнила министрли ХIурматла Грамоталичи лайикьикиб. Грамотабира, Баркаллала кагъуртира илала гIуррара дахъал лер!
54 дусла гIямрулизирад МяхIям­мадхIяжини 30 зягIипти адамти сагъбирнилис харждарили сай. Бузерила гьунар ахIену гьатIи ил?!
Дунъяличиб бегIлара дурхъаси, я асес хIейруси я бицес хIейруси адамла арадеш саби. Илис къарауйчиб саби тухтурти.
МяхIяммадхIяжи Асадуллаевич­ли бузерила баракатла цаибил гъарш каиб 1997 ибил дуслизиб рай­онна поликлиникализиб участко­вый терапевтли, цазаманализив онко­логлира узули. МяхIяммадхIяжи Асадуллаевич 1998 ибил дуслизив, Лавашала ЦРБ-ла бекI тухтурла буйрухъ хIясибли, терапевтический отделениела заведующийла къуллукъличи катур.
— МяхIяммадхIяжи, заведующийли узухIели селичи чекайзурлири?
— Бузерилизиб цакьадар хIярхI­деш чебаира. Лебилра хIянчизарти цалабяхъили, чула гьар бархIилати тIалабуначил тянишбарира. Чула къул­лукъуни сегъунти-сарил аргъа­хъи­ра. Узес гьамадли бирар, хIян­чи­зарти жавабкардешличил бузалли.
— РЦБ-ла бекI тухтурла цаибил заместитель сайливан, больницала хIянчизартачил се хIянчи бирулри?
— Гьар бархIи савли дежурный хIянчизартачил конференция дурабуркIулра, базли кIина больницала лебилра хIянчизартала, тух­туртала конференция бирулра. Больницала тухтуртасра медсестрабасра бурсибирнила тяхIярла совещаниеби, семинарти, занятияби дурадуркIулра.
ЗягIиптала арадеш мяхIкам­би­рахъес МяхIяммадхIяжи Аллагьли вархьибсигъуна сай. Илизи хъулив декIли зягIипси лев или буралли, бусягIят машина бархьили, отделениелизи каркьили, анализуни дарили, изала кабизахъурли, ара-сагъвиру.
— Руководитель сайливан, ил чеввикIибси адам сай, — буриб терапевтическое отделениелизиб, 20 дус М.ГIисахIяжиевличил хIянчи барибси медсестра Аминат МяхIяммадовани.
Тухтур-терапевт М.ГIисахIя­жиев­ла гIямрула марси гьалмагъ Зулмира Кьурбановара анестезиолог-реаниматологли рузули сари. Илдани кIел дурхIя, ца рурси халабаахъили, гIилмула дякьличи дуракаиб.
Халалгъуна урши Асадуллагьли Сеченевла уличилси медуниверситет хIунтIена дипломличил таманбарили, Ивановская областьлизив хъяйхъуби ара-сагъдирнила хирургли узули сай. КIиибил дурхIя Кьурбайра Москва ша­гьарлизибси Сеченевла уличилси ме­дуниверситет хIунтIена дипломли­чил таманбариб ва Москвализив оф­таль­молог-хирургла санигIят хIя­сиб­ли аспирантурализив учIули сай. Рур­си Аминат чедиб гьанбушибси университетла 3-ибил курслизир ручIули сари.
Илди Бутран ХIяжила букьурти саби, чулира хала бегIтала санигIят даимбирути. БегIтала пахру ахIену, гьатIи, илдигъунти дурхIни. Илдачи Бутран ХIяжила рухIра далли разидирар.  

РФ-ла журналистунала Союзла член