Республикала хIякимти дубурла шимазибти халкьла гIямруличил ва баркьудлумачил тянишбирни ва илди гIеббуцес къайгъибирни дигеси саби. Илкьяйдали гIядатла адамти гIеббурцалли, республика гьалабяхI букьяхъести имканти алкIан, чеалкIуси наслула гIямрула-яшавла шуртIри къулайдирар.
ХIера, гьалавванра Дагъиста Правительствола Председатель Лавашала районнизибси сагаси овощуни дихIуси объект тIашбалтуси мерличи вякьун.
Районнизи илкьяйдали бакIиб ДР-ла Правительствола Председательла Цаибил заместитель Руслан ГIялиев, вице-премьерти Нариман ГIябдулмутIалибов ва Заур Эминов, районна бекI Мухтар ХалалмяхIяммадов, регионна министерствобала ва ведомствобала руководительти.
Дагъиста премьерли социальный бяхIчибизла объектунира хIердариб, адамтира кьабулбариб. Илкьяйдали муниципалитетунала бургала бутIакьяндешличил дубурла мер-муса гьаладяхI дашахънила шайчибси масъала хIясибли совещание дураберкIиб.
Дубурла мер-мусаличирти муниципалитетунала бургачил варх Дахадаевла районна бекI МяхIяммад ГIябдулкьадировли Лавашала районнизиб бетерхурси «Дагъистан Республикала дубурла мер-муса яшавла-экономикалашал гьаладяхI дашахъни» ибси ил совещаниелизир бутIакьяндеш дариб. Балбуцлизир касибти баянти, цархIилти районтала бурганиван пикрилизи касили, илинира район гьалабяхI башахънилизир пайдаладирниличи вирхес вирар. Балбуц дураберкIиб Дагъистан Республикала Правительствола Председатель ГIябдулмуслим ГIябдулмуслимовли бекIдеш дирнила удиб.
Балбуцла башрилизир ахъдуцибти масъултазирадлири:
— Дагъистан Республикала «Дагъистан Республикала дубурла мер-муса яшавла-экономикалашал гьаладяхI дашни» ибси программала дазурбазир гIердурцнила бетуцуначила.
— Программала далдуцунала дазурбазир дубурла мер-муса гIердурцнила аги-кьяйдаличила.
— Дагъистан Республикала халкьанала гIядатунала культурала кьиматчерти бетуцуни мяхIкамдирни ва гьаладяхI дашахъес багьандан дурабуркIуси хIянчиличила.
— Муниципалитетла цалабяхъуназиб экономикалашалси бетуц гьалабяхI башахънилизир ва илар къаршидиркути далагардешуначила дурабуркIуси хIянчиличила.
Сагаси овощуни дихIуси мер Лавашала районнизиб дусла ахирлис бузесаили бирар.
ДР-ла Правительствола Председатель ГIябдулмуслим ГIябдулмуслимов Лавашала шила мякьлаб овощуни дихIуси объект тIашбалтнила хIянчиличил тянишиуб. Илар цазаманализир 1,5 азир тоннацад овощунала дихIес вируси сай.
Азирцад мицIираг делгьес бирули саби Лашаваша районна ОхIлила шилизибси цехлизир.
Иличила буриб Дагъиста Правительствола Председатель ГIябдулмуслим ГIябдулмуслимовлизи хозяйстволис бекIдеш дируси СягIид ГIялиевли, объект хIербирухIели.
Цех бузесаибсири чумал дус гьалаб, хIянчила сагати 50 мерра акIахъубли.
ГIябдулмуслим ГIябдулмуслимовли Лавашала районна администрациялизиб Дагъиста дубурла мер-муса социальный бяхIчибизлизир-экономикализир гьаладяхI дашахънила шайчибси совещание дураберкIиб.
Илизир бутIакьяндеш дариб хIябал вице-премьерли, 18 Министерствола руководительтани, илкьяйдали хIукуматла исполнительный органтала ва дубурла районтала бургани, бизнес-цалабяхъунала, «Россияла къакъбяхъуни» организацияла вакилтани ва цархIилтани.
Лавашала районна ОхIлила шилизиб сагаси школа лушнила хIянчи хъараахъурли сари. Илара вякьун ДР-ла премьер-министр ГIябдулмуслим ГIябдулмуслимов.
АрагIебли школа 320 дурхIялис хасбарибси саби. Ца корпус 2021 ибил дуслизиб бузесаибсири, 2023 ибил дуслизир биалли объект лушнила кIиибил бутIалис арц декIардарибтири, илизи кадурхули сари пищеблок, актовый зал ва чеимцIати классуни. БусягIятла замана лерилра бекIлидиубтигъунти хIянчи хъараахъурли сари.
ГIябдулмуслим ГIябдулмуслимовли Лавашала районнизиб адамти кьабулбирнила балбуцра дураберкIиб.
Республикала премьер-министрличи дугьабизур Лавашала, Лакла, Гъунибла ва Хьаргабла районтазибадти 8 адам.
Лавашала шилизирадси Заира МяхIяммадхIяжиева ил ва 10 дус виубси урши дармунтачил гIеббурцнила шайчиб кумекбарахъес тиладиличил дугьаризур. ДР-ла арадеш бихIнила министр Татьяна Беляевани илала суал сунела хIерудилиу касиб.
ГIябдулмуслим ГIябдулмуслимовли, сунела яргализир, дугьаризурсилизи сай-вегIси телефонна номер бедиб, дармунтачил илала сагадан сегъунти-биалра масъулти акIалли, бархьаначи сунечи зянкъдяхъяхъес багьандан.
ДР-ла арадеш бихIнила министр Татьяна Беляева ббузерила архIяличил Лавашала ЦРБ-лизи рякьун. Илини больницала стационар хIербариб, адамтас медициналашалси кумек гIеббиахънила шайчирти илала имкантачил тянишриуб.
Илкьяйдали министр адамтачилра гьунираиб, арадеш бихIнила шайчирти илдала масъулти аргъиб.
