Ахъушала районна школабазиб бузули леб чула гIямру мугIяллимла санигIятлис, школалис ва дахъал дусмазиб дурхIнази багьуди кайсахънилис хасдарибти бахъал пагьмучебти педагогуни.
Илдазирад ца сари ГIялиханмахьила урга даражала школализир бехIбихьудла классунас дурсри кадирхьули рузуси Кьунниева Наида Зайнутдиновна.
Наида Зайнутдиновна акIубси сари ГIялиханмахьилизир хIурматла хъалибарглизир. Ил шилизибси урга даражала школа таманбарили гIергъи тах шагьарлизибси Дагъиста пачалихъла педагогический институтлизи карерхурсири. Ил институтла бехIбихьудла классунала факультет гIяхIти кьиматуначил таманбарили, мугIяллимла санигIятличи регIриуб ва школализир рузес рехIрихьиб.
Гьанна Наида Кьунниевала бузерила стаж 40 дусличи абикили саби. ДурхIначи дигичерси Наида жавабкардешличил рузули сари.
БехIбихьудла классунази бегI гьалаб школализи бякьунти дурхIнас бяркъ бедес гьамадли хIебургар, бахъал биштIати сабурагарти бирар, илди школализирти тяхIяр-кьяйдаличи бурсибиайчи замана хIяжатси саби. Ил багьандан, бехIбихьудла классунала бучIантас дурсри кадирхьуси мугIяллим сабурличилси, яхIчевси виэс гIягIнили сай. Пергер хIял-тIабигIятличил цархIилтазирад декIаррулхъули сари Наида Зайнутдиновнара.
Илини сунечил барх бузутала, дурхIнала бегIтала ва шила халкь-ургаб халаси хIурмат сархили сари. Илала бузери чихъли кьиматлабарили саби. «РФ-ла багьудила шайчирси хIурматла хIянчизар» ибси уличи лайикьрикиб, «Ахъушала район» МО-ла администрацияла шайзирад ХIурматла Грамотабачил шабагъатларарибси сари.
Наида Кьунниевани сунела гIямрула вархкья ГIяшурлайличил барх хIябал урши абикьур, гIяхIси бяркъра бедили, чебяхIси даражала багьудира касахъили, гIямрула дякьличи дураиб.
КIел уршили пачалихъла университетуни тамандарили сари, ца урши Москва шагьарлизив хъали-цIа лушнила шайчирти хIянчурбазив узули сай, кIиэсил программистла санигIятличил вегIиубли, бузерила гьуни даимбирули сай.
Гьаннала гIергъира хIурматла Наида Зайнутдиновнас арадешра, гIямрулизир ва бузерилизир сархибдешунира каммадиаб!