«Замана» газетала редакцияли сагаси медиапроект —подкастунала цикл абхьили саби.
Илдазибад цаибси саби — «ГIялимличилси ихтилат». «Замана» газетала редакцияла дазурбазир, машгьурти гIя­лимтачил, хIялумцIантачил, экспертуначил пачалихъла ва жамигIятла вакилтачил ихтилатуни дурадуркIес имканбикIур. Илдани гIядатла ва аргъести гъайличил гIилмуличила, ишхIелла манзилла гьаргбаркьуначила, багьуди гьалабяхI башахъниличила ва Дагъистан вавалибяхъяхъести бетуцуначила баянти гьаладирхьу.
Нушала бегI гьалабси ихтилатла бутIакьянчи сай машгьурси гIялим, филологияла гIилмуртала доктор Хизри Юсупов.
«ГIялимличилси ихтилат» ибси подкастлизив гIилмулизиб бузутала пикруми аргъес, илдала санигIятлашалти устадешличил ва ишхIелла манзилла бегIлара челукьути, аргъабибти масъултачил тянишвиэс вирар. Иш яргализиб нушани гьалабирхьулра Хизри Юсуповличилси ихтилат. ГIур чичил ва сегъуна гьунибаъни дураберкIес хIяжатлил хIушала пикруми дурили дигахъира, хIурматла газета бучIанти.
Гьаннала гIергъира сагати гIяхIлачил гьунибаъниби, челукьути масъулти ахъдуцили дурадуркIути ихтилатуни дирар.