Гьалабван «Россияла – дила тарих» бикIуси тарихла парклизиб лебил Россияла «БегIлара гIяхIси школала берклуми дируси мер (столовая) – 2026» бикIуси конкурсла регионна бутIа бетерхур.
Балбуц дурабуркIуси саби гьар дус ДР-ла гIилмула ва багьудила Министерстволи. Илала мурад – школализиб бучIути дурхIни балхнила бетуц ункъли тIашбатни, хурегуни хIядурдирнала сагати тяхIяр-кьяйда духIнакаъни ва регионна багьудила организациябазиб арати гIямру дуркIахънила бетуц гIеббуцни.
Абзла дазурбазиб, комиссияли берклуми дируси мерличиб бузути хIянчизартала устадеш, гьаладихьибти берклумала даража кьиматладариб.
Лерилра номинациябазиб чедибикибти ва призерти, ДР-ла гIилмула ва багьудила Министерствола шайзирадти Дипломтачил ва арцла сертификатуначил шабагъатлабариб.
Ил конкурслизир Сергокъалала районна шайчирад бутIакьяндеш дарибтири Мургукла урга даражала школали, суненира муниципалитетла бутIализиб цаибси мер буцибси. ХIера, илис регионна бутIализибра «БегIлара гIяхIси школала берклуми дируси мер (столовая) – 2026» номинация хIясибли гьалабси мер сархес имканбакIиб: 1-ибил мер буциб Мургукла школали (Сергокъалала район), 2-ибил мер – «Орлёнок» прогимназияли (Бабаюртла район), 3-ибил мер – Верхнее-Казанищела 1-ибил школали (Буйнакъскла район), ва Урмала школали (Лавашала район).