Ахъушала районнизиб ишдуслизиб гIяхIти кьиматуначил школа таманбарибти, мургьила медаль касибти, имтихIянтас ахъти баллани сархибти дурхIни леб. Илди выпускникунази гIяхIси багьуди касахъибти учительтира баркаллаличи лайикьбикили саби.
Ахъушала урга даражала цаибил школализир рузуси пагьмучерси, филологияла гIилмуртала кандидат
ХIусенова Наида Мухтаровнани бучIахъути дурхIнани ахъти баллани касиб. Илди саби — урус мезла ЕГЭ-ла 97 балл касибси БяхIяндгIялиева ПатIимат МяхIяммадсаламовна, 91 балл касибси МяхIяммадова Жамиля ШяхIбановна, 89 балл касибси ХIяжигIямарова Маликат ХIяжигIямаровна, 89 балл касибси ХIясанова Зарема ХIясановна, 86 балл касибси ГIябдулкаримова Раисат ГIялихIяжиевна.
91 балл касиб МяхIяммадов ГъазимяхIяммад ГIябдуларабазановичли, илала учительница сари Халикьова Жамиля Кьурбановна.
Усишала кIиибил школализир ручIуси урус мезла имтихIяйс 94 балл касибси ХIяжиева ПатIимат Идрисовнала учительница сари МяхIяммадова Зарема Сулайбановна.
МухIела гимназия таманбарибси ШяхIбанова ГIяйшат Зауровнани урус мезла имтихIяйс 91 балл, химияла имтихIяйсра 91 балл касили сари. Илала урус мезла учительница сари ГIябдуллаева Хадижат ГулбяхIяммаевна ва химияла педагог – МяхIяммадова Эльмира ГIяхIмадхIяжиевна сари.
Учительтасра баркалла балахъули саби илди дурхIнала бегIтани, чула дурхIнази гIяхIси багьуди касахъес багьандан къайгъибарнилис.
Ишди бурхIназиб Ахъушала урга даражала школала директор Сабият МяхIяммадовани аттестатуни дедиб 9 ва 11 ибил классуни тамандарибти дурхIнас. Лебилра мубаракбариб школа гIяхIти имтихIянтачил таманбарнилис.
– ХIуша жавабкардешличил дучIули школа таманбарибти, дебали пагьмучерти дурхIни сарра. Гьаннала гIергъира хIушала гIямрулизир гьарбизуни имцIадикIаб. ХIушаб дигусигъуна чебяхIси даражала вузлизира кадерхурли, гIяхIти санигIятуначил дегIдиубли, гIямрула бархьси гьунчи кадизес кьадарбиб! Нушала районна, Дагъиста ва Россияла челябкьла хIушазибадра дигахъуси саби. ЧебяхIси багьудиличил дегIдиубли, район гьалабяхI арбукес къайгъибарая, – буриб илини.
9-ибил классла урегал бучIанни гIяхIти кьиматунала аттестатуни касиб, 11 ибил классла урегал бучIанни биалли — ахъти кьиматуначил аттестатунира касили, мургьила медальличи лайикьбикиб. КIел бучIанни арцла медальти кайсули саби.
Илкьяйдали, районна цархIилти школабазирра илдигъунти далдуцуни детерхур.
ГIямрулизир сархибдешуни ва багьуди чеимцIадикIули, хIербиэс кьадарбиаб илди жагьилтас!
Сабият ГIябдуллаева
