«Ахъушала район» МО-ла жагьилтала политикала ва спортла управлениела хIянчизартачила, илдала къайгъначила, жавабкардешличил бузес бурсибиубти жагьил адамтачила, дила пикрили, гIяхIтицун гъай делкIес лайикьли сари, — илцадра чула гьар бархIила баркьудиличи хIербикIутала, алавчартала уркIи разибиэсли бирар.
Гьалабван районна администрациялизиб бетерхурси ца балбуцличиб районна бекIла заместитель Эльвира ХIясанхIусейновани жагьилтала политикала ва спортла управлениела хIянчизартас ва илдас бекIдеш дируси МяхIяммад МяхIяммадхIяжиевлис баркалла багьахъурхIели, ишгъуна пикри акIуб набзиб: «Эльвира КьурбанисмягIиловна дебали чекаризурси, чебетаибси хIянчи тIалаббируси адам сарину, илини гапбарили гIергъи — белкIес гIягIнили саби газетализи, гьатIира уркIичеббарес, гьаннала гIергъира калабну саби ишбархIиван цабиубли, хIянчиличи дигичебли!»
– Буралли, гIергъиси замана хаслира мягIничебсили бетарули саби школабала бучIантас, жагьилтас хасдарили дурадуркIути далдуцуназиб – ВатIайчи дигила ва халкьлис мардешла темали бекIлибиубси мер бурцули биъни, – бурули сай управлениела начальник М. МяхIяммадхIяжиевли. — Нушаб гIячихъли саби, сецад авара лерал Россияла душмантала хатIабикахъес, чула шайчи кабизахъес Россияла жагьил адамти. Илдала кьасани гьархIедизахъес багьандан нуша дебали чекадизурли диэс гIягIнили саби, хаслира жагьилти-ургаб хIянчи дурабуркIес чучиб чебсили сабти. Ил шайчибси хIянчилизи нушани битIикIулра учительти, тухтурти, низам-кьяйда дузахъути органтала хIянчизарти, динна агьлула вакилти, прессализиб бузути.
Патриотдешла темаличил дархдасунти далдуцуни детерхур ца дусла духIнар багьудила, культурала учреждениебазир, спортзаланазир, районна администрациялизир, районна центрлизир ва шимазир 60-чи гъамли, чузирра бутIакьяндеш дарибти шел азирличи гъамли уршби-рурсбани. Далдуцуни-ургаб имцIали бутIакьянчиби лебси сабри «Зарница 2» ибси уличилси дявила-спортла хIяз, сунезирра дурхIнани, жагьилтани гIяхIти устадеш чедаахъибси.
Бахъал бутIакьянчиби лебри «Диалоги с героями», «Интернет безопасности», «Мирный Дагестан», «Наш мир – без терроризма» ибти умачил дурадеркIибти далдуцунала. ХIядурдарибтири дахъал суратуни, плакатуни, детерхур декIар-декIарти далдуцуни, спортла абзани, илдигъунти далдуцуни бусягIятра даимдирули сари.
Ишдусла апрель базлизир Ахъушала шилизибси районнизивад цаибси спортла мастер ГIямаркьади ГIямаровла у бихуси спортла комплекслизиб призывникунала гIямруличи ахIебаибти бучIантас хасбарибси балбуц бетерхур, сунезира ВатIайчи диги адилкьнила, гIяскуртазиб къуллукъбирнила хIурмат ахъбурцнила, спортла декIар-декIарти журабазир устадеш чедиахънила мягIна бухIнабуцибси.
2026 ибил дуслизир ГТО-ла кIел ярга дурадеркIес пикрибарили саби ва илдазибад ца гьанналис гьалаб бетерхур, илала бутIакьянчибанира гIяхIти устадеш чедаахъиб.
– «Ахъушала район» МО-ла администрацияли кьабулбарибси хасси программа лебси саби 2024—2027-ибти дусмас хасбарибси, экстремизмаличи ва терроризмаличи къаршили дурабуркIуси хIянчи жигарчеббарниличи бяхIчиаибси, — бурули сай МяхIяммад МяхIяммадзагьировичли. — Ил программа хIясибли нушала управлениели дурадеркIес далдуцибти даршалцад балбуц лерти сари. Нушани къайгъибирехIе далдуцибти ахъси даражаличир детерхахъес. БелчIудила сагаси дус бехIбихьили гIергъи, сентябрь, октябрь бузразир детерхахъес пикридарибти чумал журала далдуц, мажлис лерти сари. БусягIят нушани илдачи хIядурдеш бирулра.
Дигулра иш белкIлизиб ил управлениела хIянчизартачила цагьатIи гIяхIси пикри бурес. Къугъати адамдешла бегIти саби илди лебилра — салам гьалабикахъес къайгъибиру, халасила хIурматбарес бала. Районна газетала редакция мерлабиубси юртлизир дузули гIурра чумал учреждение лерти сари. Жура-журала масъулти агарли хIедуар ишарра — шинничил, ванадешличил, хутIличил дархдасунти. Управлениела хIянчизартани итмадан музабухъи, чули бекIбаресигъуна биалли—гьунчибиркахъу, хIебиалли — гIягIниси мерличи балахъа. Билхъа дурабуркIухIелира бегI гьалаб дурабухъи хIянчи бирули бирар.
Халаси хIянчи хъарбиркули саби илдачи СВО-ла бутIакьянчибас кумек бурчухIели, яшавлизиб нукьсандеш лебтас кумек гIеббурцухIели, районна кьадрила сегъуна-биалра балбуцличи хIядурдеш бирухIели.
Гьалабван жагьилтала БархIила хIурматлис районна газетализи суратра кабяхъили, жагьилтала ва спортла управлениела хIянчизартас баркалла багьахъурсири. Чуйна буралра, гIяхIси гъайличи лайикьти адамти саби илди: Ш. Зугьумов, М. Чамкуров, Т. ГIябдуллаева, К. ГIяхIмадов, ГI. ГIисаев, К. ГIямаров, ГI. ГIябдулкаримов, З. Кьадиева, Р. ГIисаева, Р. ГIябдулвагьабов ва ил уржибси коллективлис бекIдеш дируси М. МяхIяммадхIяжиев.
Детерхаб лерилра чула гIяхIти пикруми-кьасани!