Урцакила ши лебгIеб жагаси мерличиб саби. Дахадаевла районна шимазир дурадуркIути адамтала гIямру къулайдирахънила баркьудлуми гIерасили сари урцакантанира. Кьункьила шантани чула шилизир мурталра дурадуркIути къулайдешуни илданира тикрардарес кьасбарили саби. БегI гьалабси яргализиб илдани чула шилизи башуси гьуни къулайбарес пикрибариб.
Гьундури къулайдирес ибси, шилизиб хIербирути халкьла пикри, дурала мер-мусаличи, Дагъиста дура бархли, гечбиубти урцакантанира гIеббуциб. Вайси даражаличирти гьундурачибли шила шантала гIямрула бетуц къиянбулхъулри ва шилизи вашесра гьамадли ахIенри. Мерличирти органтала кумекличи хIерли кахIебиили, урцакантани бажардичебти адамтала кьукья акIахъуб.
«Сутбукский» шила Советла бекIла заместитель Зулпикьар Сайбуновла гъай хIясибли, шантани арц учидяхъиб ва бузес бехIбихьиб. Арзес хIяжатси бекIлибиубсигъуна масъалари хIянчи гьамадбиахъести тяхIурти далдуцни. ХIяжатдиркути техника тIалабдарили гIергъи, гьундурачи гъягъя какьур. ЦархIил техникала кумекличил илди тIинтIдариб ва гьуни къулайси агиличи бикахъиб.
«Илдигъунти баркьудлумани шанти цабалгахъун ва гъираличил бузерилизи ахъахъиб. Гьарилли виубсигъуна кумек гIеббиахъулри. ЦабехIли арцличил, цархIилтани ибкьси бузериличил. Илдигъунти багалати баркьудлумани чебаахъиб урцакантанира чула ши жагасили бетаахъес, адамтала гIямрула ва яшавла даража ункъбиахъес бирни», — бурули сай Зулпикьар Сайбуновли.
ДурадеркIибти хIянчила гIяхIдешличибли гьанна шилизи машинаби дикахъес ва гьункьяби башахъес къулайти шуртIри акIахъубли сари.
Шила шантала гъай хIясибли, Урцакила шилизивадси ца гIяхIгъабзали гьундури къулайдирнила баркьуди гIеббурцули, байхъала миллион къуруш арцла дедиб. Илини багаласи баркьуди гIеббуцилицунра ахIи, цархIилтира гIяхIбаркь дураберкIахъес уркIичеббиахъуб.
«Шилизи башуси гьуни къулайбарили гIергъи, калунти арцлис шилизирти гьундурира ремонтдарес кьасбарили саби урцакантани. Илкьяйдали гьарилла юртличи ваэс багьандан гIяхIси даражаличирти гьундури диалли, шантала гIямрула бетуцра гIяхIбулхъни якьинси саби», — бурули саби урцакантани.
Илкьяйдали цабалги бузерилизи ахъалли, шантани черяхIти баркьудлуми дурадеркIес имканти дургули сари. Илкьяйдали ца шила шантани дураберкIибси багаласи баркьуди цархIилтани гIебисули, дубурла мер-мусаличирти шими багьла-багьлали гIяхIси даражаличи диркули сари. Гьайгьай, шантала балгундешличирли ва сахаватдешличирли.
Урцакила, Кьункьила, ГIяштила, Зилбачила, Кудагула, Ирагъила шимала мер-мусаличирти гьундури къулайдарнила баркьуди цархIилти шимала халкьлис гIячихъси мисалли бетаурли саби, вегIла шира шантира дигнила ва адамтала гIямрулизир гьарил секIал гIяхIдулхъахънила.
Дахадаевла районна администрацияла пресс-служба
