МяхIярам Мяммаев Ахъушала районна ГъулебкIила шилизив 1958 ибил дуслизив акIубси сай. Илини 1976 ибил дуслизиб Цугнила урга даражала школа таманбариб гIяхIти кьиматуначил, мурталра бутIакьяндеш дирутири химияла, биологияла, физикала олимпиадабазир ва гьаларти мерани сархутири.
1976 ибил дуслизив Дагъиста Пачалихъла мединститутлизи керхур ва 1982 ибил дуслизиб ил таманбариб, хирургияла шайчибси ординатурара белчIун. Чувашияла Республикализи узахъес вархьиб. Илаб 30 дусцадхIи хирургла санигIят бузахъули калун ва бахъал адамтала баркалла сархиб.
Бузерилизив декIарухъни багьандан, Алатырь шагьарла центральная больницала хирургияла отделениела заведующий вариб ва 25 дус чебетаахъили ил хIянчи бузахъули калун. М.Мяммаевла хIурматлис «Алатырь шагьарла хIурматла адам» бикIуси у бедиб.
Дагъистан Республикализи чарухъун 2015 ибил дуслизив ва итмадан узес вехIихьиб республикала ветерантас хасбарибси госпитальлизив, гIур хирургияла отделениела заведующий вариб. ИлхIейчивад бахъал адамтала баркалла сархили сунела республикализив узули сай. «ЧебяхIси даражала хирург» ибси ура сархили сай. Касили сай сертификатуни хирургияла, урологияла, онкологияла, арадеш бихIнила баркьуди гIеббурцнила ва гьалабяхI арбукнила шайчирра.
М.Мяммаевли Ахъушала районна больницала бекI тухтурла хIянчира дариб. Ишаб илини камси заманала бухIнаб, халаси хIурмат сархиб. Ил багьудичевси тухтурцунра ахIи, чихъти адамдешла тяхIяр-кьяйда дузахъули хIерируси ва узуси адам сай.
Гьалавла машгьурси тухтур Авиценнала ишдигъунти дугьби лер: «ЗягIипсилис цаибси дарман — тухтурла гIяхIси дев саби». МяхIярамли сунечи дугьаизурси адам разивиру гIяхIси девличил, уркIичеввиру малхIямси, уркIецIили бицIибси хIерудиличил. Ил багьандан саби иличи бахъал адамти башути, хаслира сегъуна-биалра операция барес хIяжатдеш лебти. Илини дарибти операцияби жявли сагъдирни багьандан, адамтани цали итиллизи бурули, бусягIятра иличи бахъал адамти дугьабилзули саби.
Дагъистан Республикала ветерантас хасбарибси госпитальлизив узули, М.Мяммаев гьатIира гIяхIил бурсивиуб зягIиптачи хIеруди бирес, уркIецIиличил, чебетаибдешличил ахтардибирес, сенахIенну ишаб сагъбирути лебилрара-сера адамти халати гIямрула саби, чусра малхIямси дев, гIяхIси хIеруди дебали дигути.
Гьалабван набра хIяжатбикиб илала кумекличи хъарахъес. Гьала-гьала зянкъдяхъили, хIянчилав левал яра отпускличив саял багьурра. Илини хIянчилав леврану, аргъ дебали буцIарбиайчи вакIи или буриб.
Сай узуси ну левси отделениелизив хIейалра, МяхIярам набчи ухIнаулхъи, сен сайрал хьарбии, гIяхIси гъай бурили, уркIичевварили дураулхъи. Илала малхIямти гъайлира хIила гъяж гьунчибурши. Ил гапирути, илала адамдеш, зягIиптачи хIеруди ахъли кьиматладирути бахъал адамти къаршибикиб наб госпитальлизиб.
Медицинала хIянчизартала БархIиличил халаси хIурматла вегI тухтур, «Дагъистан Республикала урибси тухтур», бахъал адамтала баркалла сархибси МяхIярам Мяммаев мубараквирулра ва сунела бузерилизир сархибдешуни имцIадикIули узес кьадарбиубли дигулра! ХIу узуси мерличир нуни хIед булгути адамтала гъайла бакьира, Аллагьли кьабулдараб илдала балгни, илдалайчил барх дилара!
МяхIяммад Ванатов, бузерила ветеран
