2024 ибил дус хъалибаргла Дусли багьахъурли саби. Улкала Президент В.В.Путинни илгъуна ХIукму кьабулбарибси саби – хъалибаргла ихтиюрти далтахънила шайчибси пачалихъла политика гьалабяхI арбукес ва хъалибаргла гIядтлидиубти бекIахъудила дурхъадешуни мяхIкамдарес багьандан. ИшбархIила манзиллизир илди масъулти бекIлидиубтили детарули сари. Гьанна чеалкIуси наслула цацабехIти вакилтани хала бегIтани дузахъули калунти хъалибаргла дурхъадешунала кьадри беткайхъахъули саби. ГIядатуначил, культураличил ва цархIилти дурхъадешуначил хъалибарглизиб дурхIни тянишбирути.
Ил Дусличил бархбасахъи, ДР-ла бузерила Министерстволи дахъал дусмазиб дигиличил ва хIурматличил хIербирути Арсланбековхъала хъалибаргличила бурули саби. Ил хъалибарглизиб шел дурхIя халабиули саби. Илцардра жагьти бегIтачи хIерикIалли, идала шел дурхIя лебниличи вирхаэс къиянни саби. Бузериличи дигичебти, гьар-чинабалра жигарчебти бегIти гIямрула къияндешуначи, замана агниличи гIярзбикIули ахIен. Илдала хъалибарглизиб гьачамалра дурхIначи тIама ахъбуцибси анцIбукьра биубси ахIен. Хайдакьла районна Гъазияла шилизибадти Расул ва Барият халкьли гIяхIла шайчибадцун саби балути. Барият Шапиевна 2018 ибил дусличирад рехIрихьили, шилизибси урга даражала школализир рузули сари. Муруй биалли – хъулри лушнила хIянчи бузахъули сай. Акьуси замана илини шила хозяйстволис багъишлабиру.
Илдала жагьси хъалибарг 12 дус уржили хIербирули саби.
«Дила бекIлибиубти кумекчиби – мурул ва бегIти саби. Муруйс дебали дурхIни дигахъу ва мурталра наб кумекбиру. Халати дурхIнанира хозяйстволизиб наб кумекбиру. Сегъуна-биалра хIяжатдеш лебли хъулирад дурарулхъасли, биштIати дурхIначи хала бегIтани хIерудибиру. ДурхIни зягIипбикибхIели дебали кьакьарикIули рирусра. Неш ретаъни — дила бегIлара халаси талихI саби. Шел дурхIялис бяркъ бедлугули, гьарил анцIбукьлизиб гIяхIдеш ва вайдеш бургес бурсириублира. ХIяжатдешличил лерил шуртIри кьабулдирулра. ДурхIни агарли дила гIямру сеналра пикридирули ахIенра!» — рикIи Барият Шапиевна.
Республикализир, районнизир дурадуркIути жура-журала конкурсунала, олимпиадабала ва абзанала бутIакьянчиби саби илдала дурхIни. Баркаллала кагъуртала, медальтала ва цархIилти шабагъатунала кьани илдани гьар дус чебирцIакьули саби.
ЦахIнабси Комплексла центрла хIянчизартани илдигъунти жигарчебти ва патриот бяркъличи бурсибарибти дурхIни абилкьнилис бегIтас баркалла балахъули саби. Илгъуна араси наслу – нушала челябкьлали бетарули саби.
ДР-ла бузерила Министерство
