Ишди бурхIназиб Ахъушала шилизибси краеведческий музейла хIянчизартани «Культурный обмен» бикIуси проект хIясибли, ДР-ла Миллатла музейла Гъунибла районна Гъонодала шилизибси филиаллизи, гьалабла заманала «Гульмендо» бикIути хьунул адамтала шелкла кIунбала выставка бухили, архIя дураберкIиб.
Ил гьарахъси архIялизир бутIакьяндеш дариб ДР-ла ГI.Тахо-Годила уличилси Миллатла музейла генеральный директорла заместитель, ил проектла куратор Кильдеева Заира ХIялимовнани, Ахъушала музейла директор Зубалжат Мирзаевани, сунела хIянчизарти НасихIят ГIисаевачил, ПатIимат МяхIяммадовачил барх, культурала ва туризмала управлениела хIянчизарти ХIяжимурад ва Салимат Мусаадаевхъалани, П.ХIяжимяхIяммадовани, К.ГIяхIмадовани, Ж.ГIялиевани, дурхIнала анхъла заведующая Р.Исраповани, багьудила управлениела хIянчизартани, школала учительницабани.
Выставкаличир лерри гьаларла 30 журала, гьар рангла гульмендиби. Илди – ургар лерри 150 дус диубтира.
Заира Кильдеевани гульмендиличила, илдала тарихличила баянти гьаладихьиб:
– Гульменди тюркла мезличибад шурбатурхIели, «дила вава» ибси мягIна саби. Илди кIунбазир дахъал някьишуни лер, вавнала, арцантала, бялихъунала, къакъбунала ва цархIилтира суратуни. Гьарил някьишла декIар-декIарси мягIна лебси саби.
Зубалжат Мирзаевани буриб:
– Выставка бетурхуси саби «Культурный обмен» бикIуси проектла дазурбазиб. Гульменди кIунби Дагъистайзиб хIербирути гьарил хьунул адамла лерти сари. Илди кIунби лебилра Северный Кавказлизир тIинтIдиубти сари. ДегI гьалар гульменди кIунби Ирайзир дакIудиубтири. ГIур Азербайжайзи садаили, иларад Дагъистайзи тIинтIдиубтири.
Нушала хала нешанани чедирхъули калунти кIунбачила, гIядатуначила, илдала мягIничебдешличила чеабиуси наслулизи хъумхIертахъес чебиркур.
Гьанна бусягIят биалли, илди кIунби Губданила шилизир имцIали чедаэс вирар, – рикIи З.Мирзаева.
Ил гьунибаъниличив гъайухъун Москвала областьла Серпухов шагьарла ЖамигIятла палатала член Мансур Юсупов. Илинира илгъуна балбуцла халаси мягIна лебниличила аргъахъиб.
Шадлихълизир бутIакьяндеш дариб Гъонодала администрацияла бекI Запир МяхIяммадовли, сунела хIянчизартачил Гъонодала музейла директор СултIанат Юсуповани, сунела хIянчизартачил ил шила культурала Юртла хIянчизартани, школала учительтани, бучIантани ва цархIилтира гIяхIлани.
Ахъушала районна культурала ва туризмала управлениела хIянчизартани жагаси концертла программа гьалабихьиб, миллатла палтарличил, гульменди кIунбира чедяхъили, далуйтира делчIи, делхъанира дарили, чула пагьмуртачил балбуцла гIяхIли разибариб.
Лебилра балбуцлизир бутIакьяндеш дирути хьунул адамтани ва школала бучIантани Ахъушала шилизибси музейла хIянчизартани духибти гульменди кIунбира чедяхъили суратуни касахъиб. Балбуц разити аги-хIяйзиб бетерхур. Ил выставка Гъонодала шилизиб майла 18-личи бикайчи кавлуси саби.
С.ГIябдуллаева
