Гьарил дявила биографиялизиб, чIянкIли къуллукъбарницун ахIи, дебали бархибси, дахъал гьалабизуначилси, хIялумцIуси, жавабкарси гIямрула гьуни баргес вирули сай. Илгъуна гьуни чеббикIиб ГIялескандар ГIялескандаровлира.
Ил Дахадаевла районнизив, халали ахIенси ЧIишилила шилизив, 1983 ибил дуслизив акIубси сай. Бузери дигахъуси, цали ца гIеббурцуси гIядатла хъалибарглизир дурхIядеш ардякьун илала. Уршили школа таманбарили гIергъи, МяхIячкъалализиб культурала ва искусствола колледжлизиб белчIуди даимбариб.
2005-ибил дуслизиб, ила­ла гIямрулизиб ур­гъан­на тарих бехI­би­хьиб. Къуллукъ­барес, Ур­хьула Дявила флот сунезиб лебси Се­ве­роморск шагьар­ли­зи, арякьун. Илаб элект­ро­ме­ханикла са­нигIят бяр­къур, сунечи вир­­хеси, жаваб­кар­деш дихуси ур­гъан виъни жяв­ли че­ба­ахъиб.
Ургъанна санигIят чеб­бикIили мо­рякли вягIда бигьун. Гьарил дус илала са­нигIятла ус­тадеш че­ахъ­­ди­кIу­ти­ри, сагати званиеби кайсутири, сунела хIурмат им­цIа­би­ра­хъусири. Ил бекIливиубси старшина ветаур, дебали мягIничебси, лебилра гамила бузери сунезибад дигахъуси, техникала частьлизив узулри.
Къуллукъбируси замана ил гьарахъти улкнази ваиб. Гами Франциялизи, Индиялизи, Сириялизи, Ливиялизи, ЮАР-лизи, Кипрлизи башусири. Илаб халати бурсидеш касес бетарулри, сабурчевсили виэс, санигIят ункъли балес, гьалакли чараагарти далдуцуни дурадуркIес гIягIнидеш алкIулри.
Илкьяйдали бутIакьяндеш дариб Украинализиб бетурхуси дявила хасси балбуцлизирра, къиянти аги-кьяйдализир сунела гьала тIашдатурти масъулти ирзутири. Илини къуллукъбирухIели арзибти масъулти хасти документунани мардирули сари.
Къуллукъбирни багьандан, гьарахъти улкнази дурадеркIибти гамурбачирти архIяби багьандан, ГIялескандарли чумал шабагъат касиб. Шабагъатунани илала санигIятлашалти устадешличила, бирхаудичерти багьудлумачила бурули саби.
Амма къуллукъбирнила дураб ил хъалибаргла пергер бекIра сай. Бахъал дурхIни сунезиб лебси хъалибарглизив халаваибси урши, сайра дудеш ветаурли сай, илини сунела гъамтачил бархбас къябудахъули ахIен, шила гIядатунира дузахъули сай.
Илини сунела баркьудлумачил, дахъал гъай хIедирули, санигIятлис мардешличила ва дигиличила бурули саби.

Рабадан БяхIяммадов