Хайдакьла районнизивадси гIулухъа боксер Кьурбан ГIябдулкьадировли Северный Кавказла федеральный округла 13-14 дус биубти спортсменти-ургарти абзаназиб чедибдеш сархиб.
Абзани Ставропольла крайла Суворовская ши­лизир детерхур. 46 килограммла удибти би­тIакI­ла бегIти спортсментала ургарти аб­заназир Кь.ГIябдулкьадировли 4 абз дурадеркIиб, лерилра аб­за­назиб бирхаудичебси чедибдеш сархиб, ва мургьила медаль касиб.
Спортсменни Хайдакьла районна дурхIнала ва гIулухъабала спортла школализив, Руслан Даитовла бекIдешлиув бокслизиахънили устадеш кайсули сай. Ил авал дус спортлизив виркьули сай, гьанна сархибси чедибдеш, халаси хIядурдешла хьулчиличиб биахъубси саби.
Илала тренер Руслан Даитовли спортлизиртицун ахIи бузерилизир диахъубти сархибдешуначилара бурули сай.
«Кьурбан гьар секIайчи чекайзурси урши сай. Дебали къиянти абзаназивра, ил паргъатси хIяйчив кавлули вирар, гIеббурусиличи лехIилзан ва хатIаби гьардарес имканти дургу. Гьанна нушаб, лебил Россияла абзаначи хIядурдикIес, чедибдешунала гьаб-гIергъидеш даимбарес гIягIнили саби», —викIули сай Р.Даитов.
Сай спортсмен сархибдешуначила гапикIули ахIен, лерилра илала пикруми челябкьлализирти абзаначила сари.
«Гьарил сагаси абзли наб чеимцIаси бурсидеш лугули саби. Наб гIурра гьалавяхI вашес дигулра, ва даим спортлизивра. Гьанна Россияла лебил улкала боксертала ургарти абзаначи хIядурикIулра, илаб дила лебилра гьунар чебаахъес кьасбирис», —викIули сай Кьурбан ГIябдулкьадиров.
Хайдакьла районна администрацияла пресс-служба