Кьурбанов ХIусен ХIясанхIусейнович акIубси сай Ахъушала районна Кьассагумахьилизив, бахъал дурхIнала хъалибарглизив.

ХIусен Кьурбанов Кьассагумахьилизибси  ГI.ХI.ГIямаровла уличилси школа таманбарили, Дагъиста пачалихъла университетла экономикала факультетлизи керхур. Университет хъараахъурли гIергъи, ВатIайс къуллукъбарес Курсклизирти гIяскуртази арякьун.

ХIусен Кьурбанов 2020-ибил дуслизив бегI гьалав Эльбрус дубурла хъарличи ваибсири. 3-4 бархIи калунсири ил дубурла хъар бекIличи ваэс. Россиялизиб ва Европализиб бегIлара ахъси мер буили саби 5 642 метрла кьадарла. Илала гIурра кьас лебри ил дубурличи чевяхIяхъес. ХIусей сунела кьас бетерхахъур ишдусла августла 18-личиб гIуррара Эльбрус дубурла хъар кьамаличи ваили.

Илини 5 642 метрла ахъдешла гьуни ахъиб. Ил ахъес багьандан халаси къайгъи ва къиян дакIудариб  илини.

ХIусен Кьурбановли шимала гIямрулизир жигарла бутIакьяндеш дирули сай. Спортла шайчир детурхути абзаназирра илини бутIакьяндеш диру. Камси замана гьалаб МяхIячкъала шагьарлизиб бетерхурси «Сурги» бикIуси мини-футболла Чемпионатлизирра илини жигарла бутIакьяндеш дарни багьандан, ил бегIла гIяхIси бутIакьянчи (лучший игрок)  сайливан шабагъатлаварили сай.

ХIусе неш Рабаданова Загьидат МяхIяммадовна Кьассагумахьилизибси школализир учительницали рузули калунси сари. Илини школализиб хIялалси хIянчи бариб. ДурхIначи дигичерси, сунени кадирхьути дурсрачи иштяхI акIахъес, илди аргъахъес къайгъичерси мугIяллим сарри ил. МалхIямси, духуси Загьидатли жагали сунела дурхIни абикьур, гIяхIси бяркъра бедили, багьудира касахъили. Амма ил жявли гIямрулизирад аррякьун, Аллагьли сунела бунагь-хатIа урдуцаб.

ХIусен Кьурбановлира сунела гIямрула рархкья Раисатличил барх кIел урши-рурси абилкьули саби. Илдас гIяхIси бяркъ бедили, гIямрула гьунчи кабатес къайгъилизиб саби.

Гьаннала гIергъира сунела кьасани детурхули, сархибдешуни имцIадикIули хIербиэс кьадарбиаб чус.

С.ГIябдуллаева