Ахъушала районна администрацияла актовый заллизиб СВО-ла бутIакьянчи Бутрила шилизивадси ИсмягIилов ГIялихIяжи ХIясановичличил гьунибаъни бетерхур.
Балбуцлизир бутIакьяндеш дариб Ахъушала районна администрацияла бекIла заместительти МяхIяммад ИсмягIиловли, Шамил ХIяжигIялиевли, администрацияла хIянчизартани, шимала бургани, Сергокъалала ва Ахъушала районтала военкоматла хIянчизартани ва цархIилтира жавабла къуллукъличибтани.
Гьунибаъни бузахъулри районна бекIла цаибил заместитель МяхIяммад ИсмягIиловли.
– ГIялихIяжи ИсмягIилов Украинализиб дявила хасси балбуц бехIбихьибти бурхIназивал сай гIяхIъулали арякьунсири. Илала узира левси сай СВО-лизив. ГIялихIяжини гъабзадешличил ВатIайс къуллукъбирули сай. Ил вяхъилира калунсири, гьанна биалли, штурмовая ротала командир варили сай. ГIялихIяжи «Гъабзадеш багьандан» медальличилра шабагъатлаварибси сай, – буриб МяхIяммад ГIябдуряхIмановичли.
ГIялихIяжи ИсмягIиловли цалабикибтала суалтас жавабти дедиб.
– Ну гIяхIъулали, вягIда бигьи, вякьунсира СВО-лизи. Итав дила узира тев. Илаб хIябал баз хIядурдеш барахъили, ярагъла тяхIяр-кьяйдаличи бурсидарили, гIур дявилизи аркутири. Нуни бекIдеш дируси ротализиб лебилра гIяхIгъабза бургъанти саби. Илдани дахъал гьунарти чедиахъули сари. Оборонала Министерстволи нушала ротализиб бургъути дурхIни гьарра шайчибад гIеббурцули саби. Нушала берк-бержра, палтарра лер. Ну илав ургъули кIел дусличивра имцIали виублира, ил заманала бухIнаб нушаб лугуси арцра кайсулра. Ну илав гьанна бурсикайублира, дявила тяхIяр-кьяйда нуни гIяхIил дяркъурлира, – буриб ГIялихIяжи ХIясановичли.
Гьунибаъниличи цалабикибтани ГIялихIяжис ва илкьяйдали, СВО-лизиб бургъутас жяв-жявли тамандиубли илди анцIбукьунира, ара-сагъли хъули чарбухъес кьадарбиаб или буриб.
ГIялихIяжи ИсмягIилов ил бархIи Ахъушала шилизибси музейла директор Зубалжат Мирзаевани живарни багьандан, музейлизира вякьун. Музейлизиб лебри ГIялихIяжичил гьунибаэс дигути, Ахъушала урга даражала хIябъибил школализи цалабикибти, 9-ибил классла бучIантира, илдала бегIтира, учительтира. ГIялихIяжини илдачилра ихтилат дураберкIиб. Илдала суалтасра жавабти дедиб.
Зубалжат Мирзаевани баркалла багьахъур лебилра цалабикибтас ва ГIялихIяжи ИсмягIиловлис.
Чедибдешличил хъули чарбухъес кьадарбиаб лебилра нушала бургъантас или буриб музейла директорли.
С.ГIябдуллаева
