Ишдус хъалибаргла Дус сабливан, пергер урши-рурси абикьурси дигичерси неш, пагьмучерси мугIяллим, шантала насихIятчи ва лебталалра диги сархибси Адзиева Аминат Адзиевна мубаракрирули, Хьар МахIаргила библиотекала заведующая СултIанат Халимбековани ва клубла хIянчизартани гьунибаъни дураберкIиб. Адзиева Аминат Хьар МахIаргила школализир 7 класс делчIи гIергъи, Буйнакъсклизибси рурсбала педучилищелизи карерхурсири. 1957 ибил дуслизиб ил таманбарили, Бурдекила шилизир мугIяллимли рузес рехIрихьиб. Илаб кIел дус хIянчи барили, Хъар МахIаргила шилизи ракIиб ва илабра кIел дус хIянчи бариб. 1960 ибил дусличирад рехIрихьили, пенсияличи раайчи Хьар МахIаргила школализир рузули калун. Аминат Адзиевна 46 дус дурхIнас багьуди ва бяркъ дедлугули рузули калун.
Мурул АсхIябгIяличил Аминатли кIел урши ва хIябал рурси бяркъчебтили ва адаб-хIяячебтили абикьур. Илдала хъалибарг мурталра далай-делхъличил бархбасунси саби. АсхIябгIялини акIахъубси хъалибаргла ансамбль гьаннара леб. Сепайда, АсхIябгIяли, сунела хIяб нурли шалабаркь, ряхIмуагарси ламартла изай хабарагарли нушачивадли арукиб.
БегIтиван пагьмучебти саби урши-рурсира.
Урши МяхIяммадрасул ГIяялизимахьила клублизив узули сай. Рурси Салимат ГIямарла Батирайла уличилси даргала театрлизир рузули сари. Клубла хIянчизар Руслан МяхIяммадовлира хала дудешла хIянчи даимбирули ансамбль бузахъули сай.
Гьанна Аминатла 11 дурхIнала дурхIяра, 22 илдачибад акIубтира леб.
ХIулбала шала нукьсанбикибси Аминатлис дурхIнани къуллукъбирули саби. Илала баркьибтани лерилра чула хIянчи датурли бакIили, бузрадли шилизиб буули, нешличи чебетаибси хIеруди биру, баркалла биаб чусну. ГIяхIти хIял-тIабигIятла малхIямси насихIятчи, маслигIятчи, пагьмучерси мугIяллим лебтасалра Аминат -абадайли ретаур. Ил ахIену гьатIи адамла бегIла халаси игъбар.
«Аминат-абадай, ишбархIи хIечи, дахъал дусмазир школализир рузули, бахъал дурхIнас бяркъ бедлугули, халаси гъаза барибси, халкьла хIурмат сархибси, шел урши-рурси абикьурси неш сарливан хъалибаргла Дусличил мубаракрарес дакIилра. Се дигахъади гьанна хIед?» -хьарбаиб СултIанат Халимбековани
«ХIукуматлира гIяхIси пенсия лугули, къуллукъбирули, жагали гIеркарурцулра. Дила гIяхIси унра, шила социальный хIянчизар Салимат Ражабованира риубсигъуна кумекбирули сари, баркалла биаб сунес халаси» — баркалла балахъули гъайрухъун Аминат Адзиевна.
Салимат кьяйда, лебилра илини бучIахъули калунти дурхIнира кумекла някъ гьабатес, адамла мурад барес хIядурти саби. Илди-ургаб гIяхIси багьудиличил бегIбиубти, ахъти даражала хIянчурбачиб бузутира бахъал леб.
«Дигиличил багьуди бедлугули халабаахъира школала бучIанти, гьаннара уркIи карцIбирули бирар чучи. Балгунти бири барх бузутира. Халаси хIянчи барира дурхIнала бегIтачилра. Дила хIянчилис ва ахъибси къияннис шантала баркаллара дигира сархира. Илди дурхIни дурабад шилизи бакIибхIели, набчира гьаббикIур. Ил саби бегIлара халаси савгъат. Баркалла биаб дурхIнасра, шила шантасра. ИшбархIи иша ну чераэс цаладикили, уркIи разибарибти хIянчизарти, хIушабра баркалла балахъулра. Гьанна наб дигуси лебилра ара-сагъли, разили кални, дургъби агардиубли, дунъяличиб даршудеш тIинтIбиъни саби».
Аминат-абадайс арати гIямрура, гIяхIла хабуртира дулгули, ила цалабикибтира гъайбухъун.
Басират ХIяжимурадова
