Иш гьамадли ахIенси манзиллизиб улкала декIар-декIарти миллатунала вакилти цабиубли, Украинализир кадиркути дявила анцIбукьуназир бутIакьяндеш дирути бургъантас кумек гIеббаахъес къайгъилизиб саби. Илдигъунти бетуцунала аги-кьяйдализиб гIяхIси мисалли бетарули саби Дахадаевла районна Дибгаликла урга даражала школала бучIантала «Цаибтала хIяракат» ибси бетуц. Илди бучIантани Украинализиб бетурхуси дявила хасси балбуцлизиб бургъутас кумек гIеббаахъес къайгъни дакIудирули сари. Педагогуначил барх илдани маскировочный сетани ва хандакьуназир пайдаладирути шямани дирули сари, илди дергъла майдайчибтас дурхьули сари.
Маскировочный сетанани мягIничебси мер бурцуси саби нушала солдатуни лебти мер-муса дигIяндарес багьандан. Илдала кумекличил душмайс нушала бургъанти белгибарес имканти хIелуга. Иличибли нушала ВатIан балтахъантала гIямру мяхIкамдарес имканбикIур. Илди гIягIниахълуми хIядурдирнилизир учительтанира бучIантанира устадеш чедиахъули сари.
Хандакьуназир пайдаладирути шямани нушала бургъантас кумекбирнила кьадричебси бетуц саби. Шям улкуси саби урегличибадли гехIел сягIятличи бикайчиси манзиллизиб. Илкьяйдали солдатунас блиндажуназир гIяхIти шуртIри акIахъес вирар. ХIябал-авал шямли абзурли дугилизиб ванадеш гIеббурцу, ва илдани беркала ванабиахъес имканти алкIахъа.
«Нушала дурхIнала някъбани дарибти шяманани бургъантас ванадеш ва шаладеш биху», — буриб Дибгаликла урга даражала школала «Цаибтала хIяракат»-ла советла председатель ТIауз Кьасумовна Кьурбановани.
Илдигъунти гъайли уркIичеббирахъути дурхIнани чедибдешличи бирхули, лерилра цIакьани пайдаладарили, гIягIниахълуми далкьарахъули сари.
Илди командализиб бузес ва чулира се-биалра бирнила баркьуди гьалабяхI арбикес, чула баркьудлумас жаваб бедлугес бурсибирули саби. Илдигъунти баркьудлумани жагьилтас патриот бяркъ бедлугнилис ва ВатIайс мардешличил къуллукъбирнилис хьулчни кадирхьули сари.
Илкьяйдали, Дибгаликла урга даражала школала бучIантала къайгъни цархIилтасра мисалли детарар, цахIнабси баркьудилизи белгиси пай кабирхьнила шайчиб. Илдигъунти баркьудлумани дурхIначицунра ахIи, халатачира асарбирули саби.
Дахадаевла районна администрацияла пресс-служба
