ГIялимтачил, поли­ти­кала хIяра­кат­чибачил, спортлизиб, куль­тура­лизиб, гIилмулизиб гьалабяхI арбя­кьунти адамтачибли маш­гьурбиубси ХIур­хъила шилизив, 1941 ибил дуслизив бузе­рила хъа­либарглизив акIубси ГIя­ли­кьа­диев ЛугIман МяхIям­ма­довичличила саби иш дила белкI.
ЛугIман МяхIяммадовичла хала дудеш ГIя­ликьади Дагъистайзив урибси дяхънушани ви­русири. Илини (халкьли бурни хIясибли), арадеш нукьсанбикибтас декIар-декIарти кьараназирад дармунти дарили арабирутири. ГIяликьадини дергълизиб бяхъибти, бурушлаб зягIипти бахъал адамти кьяшмачи тIашбатур. Ил пергер дяхънушачила чили аргъалра, ХIур­хъила шилизи башутири.
Илис бургар ГIяликьадиев ЛугI­­ман МяхIям­мадовичлира, су­не­ла хала дудеш кьяйдали, зя­гIи­­пби­кибти адамтас кумекбирес дигахъуси.
ЛугIман ГIяликьадиев 1959 ибил дуслизив ХIурхъила урга даражала школа белчIи гIергъи, Дагъиста медицинский институтла лечебный факультетлизи керхурсири. Ил, 1966 ибил дуслизиб институт хъараахъурхIели, направление хIясибли, Сергокъалала районна больницализи узахъес вархьибсири. 1968-1970-ибти дусмазив ЛугIман ГIяликьадиевли офтальмологияла клиническая ординатурара белчIунсири. ИлхIейчивад ЛугIман МяхIям­ма­дович хIулбала тухтурли узулри. ХIулбала шала нукьсанбикибти арабирули, илдас операцияби дирули вири ЛугI­ман МяхIяммадовичли.
Больницализив узухIели ЛугI­­ман ГIяликьа­диевли вецIну ав­райна квалификация ахъбуцибсири. Тухтур Л.ГIя­ли­кьадиев офтальмологиялизиб чебяхIси даражала категорияличи лайикьикибсири.
ДР-ла арадеш бихIнила шайчибси Министерстволи ХIурматла Грамоталичил, республикала шайзивад ХIунтIена къанчличил, Дагъиста БекIла шайзивад у белкIунси сягIятличил ГIяликьадиев ЛугIман МяхIяммадович шабагъатлаварибси сай. Ил Дагъистан Респуб­ликала урибси тухтурра сай.
ЛугIман МяхIяммадовичла гIямрула рархкья Риза Расуловна (сайгъуна терапевт-тух­тур сарри) гIямрулизирад шалгIеррухъи агара.
Илдани дурхIни: ГIябидат, Марьям ва МяхIяммад бяркъчебтили халабаахъиб. Илдази чебяхIси даражала багьуди касахъили, гIямрула бягIуси дякьличи дураиб.
ДурхIнала дурхIнасра ЛугIман МяхIям­ма­дович багалаирули сай.
«Арадеш биалли, дунъяла мас камхIе­бирар», — викIуси сай тухтур ЛугIман. ЗягIип­силичи ур­кIецIичевси, малхIямти дугьба­чил дугьаилзуси, хIянчилав ахIи хъулив виалра адамлис ку­мекбарес къалабаси ЛугIман МяхIяммадовичлис шила ва лебил районна адамти баркалла би­кIули бирар. Ил ахIену гьатIи тух­турла санигIят чеббикIибсила му­рад?
ЛугIман МяхIяммадовичлис ме­ди­ци­нализивра улкала жа­ми­гIятла гIямрулизивра узахъес гIуррара чIумаси арадеш, хъалибарглизиб баракат, хIянчилизир сархибдешуни дираб!