Халаси шагьарлизив хIерируси адамлис сай-вегIси машина лебли биаллира, гьаман жамигIятла транспортличив вашес чевкъули бирар, хаслира маршруткабачив савли хIянчиличи аркьухIели ва бархIехъ чарулхъухIели.
Илди кьалли шагьарлизир дахъал сари, гьарилти кадизахъурти маршрутуни хIясибли кьакьурбазирад дашути. Амма илхIелира, хIейгеси биалра, лерилра илди адамтас урехи хIебирахънила ва техникала шайчирти тIалабуначи чедетаили ахIен. ИмцIаливан 2–ибил номерла ва 25 ибил номерла маршрутуначи абиили башутани дигаллира хIейгаллира шофертала гьундурачирти абзаначила хIейгести, жалличи шурдулхъути ихтилатуни дикьули бирар. Илди гьуни таманбиайчи чус гьалавси чи саял, чус гIелавси чи саял, сен илини остановкаличиб маршрутка бахъхIи тIашаибал, сен багьлали вашусил, сен сунес гьалавсини остановкаличибти лебил халкь бучили сунес чилра хIетурал, ва илдигъунти дахъал цархIилтира телефоннизирад пайдаагарти ихтилатуни дузахъули салоннизивси адамла бекI изесбирхIяхъули бирар. Илабти адамтани аргъес бирули ахIен сен илдани илди ихтилатуни цахIнабикили бекIдарес хIебирутил, ва низам-кьяйда кахIедилзахъутил гьар даим жалтачи шурхIедалтули. Яра кабизахъурси ярга хIясибли сен башес хIебирутил. ИлхIелира бахъалгъунтани маршруткализиб папрус битIикIутира бирар, маршруткаличи кайруси дякьличиб «Папрус битIикIес къадагъа» ибси лишан баршили биаллира.
Илала дурабадра шоферти дебали гIясибикIутили уббулхъули саби, се-биалра хьарбаалли, дебали гIясибикIес бехIбирхьули саби. Чули биалли салон адамтани гарчли бицIили биаллира гIуррара адамти абацIахъес тIашиули бирар. Кабирути мерани дуцили, тIаштанира сиденьеби-ургарти мерани дицIили тIашизесалра мер хIебиалра. Гьайгьайрагу, ил къиянси хIянчи саби, бархIиахъайчи рульличив, амма илдикIун чус саби бузути ва матъал бузути ахIенгу. Базли биркуси арцра нушала 3-4 алапала кьадар саби. АсухIебирусив адамтази ряхIятли гъайикIес?!
Сеналра нушала шагьарла маршруткаби дайхъала сагадарили хьалли, дайхъала дахъ нясти ва гягIдикIути сари, илхIелира гIясикарти шофертачилти ва даим ахъдурцути багьначилти. Август базличибад 37 къурушличи абикили саби маршруткалис багьа, хасти кабизунани иличила хIебагьахъурли хьалли…

Наида Гъуруева