Ахъушала районна больницала бекI тухтурла приемнаялизи дугьабилзути бахъал саби: чучил барх бузутира, зягIиптира, организациябала, учреждениебала руководительтира, жавабла хIянчизартира ва цархIилтира.
Илди лебталалра къуллукъуни детаахъес багьандан, илдази жагали, малхIямли устадешличил гъайикIес балуси адам узес гIягIнили сай илав. Илдигъунти хIял-тIабигIятличилси хIянчизар сари Кьадиева Оксана МяхIяммадовна. Жагати чарх-бекIла регI Оксанани дугьаизурси адамла къуллукъ жявли бетурхахъу. БекI тухтурличи къулбасбарахъес хибси кагъарла вегI адам вахъхIи тIашхIейзахъурли, Оксанани сунени сасили, илала къуллукъ бекIбарили урхьули сари.
Оксана МяхIяммадовнани районна больницализир бекI тухтурла секретарьли рузули, сунела бузерила гьуни 2010-ибил дуслизиб бехIбихьиб. ИлхIейчибад 16 дусла бухIнаб больницалис бекIдеш дарахъес ил къуллукъличи кабалтути вецIалалра тухтур барсбарили бургар.
Илди гьарил жура-журала хIял-тIабигIятла, уркIи-хIялла адамти сабри. Ил багьандан гьарилличил валкайкили узес гьамадси ахIен. Оксана Кьадиевани сунечи хъарси хIянчи чебетаахъили биру.
Оксана Кьадиева акIубси сари Ахъушала шилизиб хIурматчебси хъалибарглизир. Оксанала дудеш МяхIяммадли ва неш ГIяйшатли гIяхIси бяркъра бедили, багьудира касахъили, шел урши-рурси абикьурли, гIямрула гьунчи дураиб. Оксанара хъалларариб, амма илала гIямрула вархкья жявли гIямрулизивад арякьун. Оксана уршира сарра калун. Илини къугъали уршира айкьурл. Багьудира касахъиб.
Оксанани сунечил барх бузутала ургаб халаси хIурмат сархили сари. Гьачам ну приемнаялизир къарширикира Оксанани сунечил рарх рузуси рурси сари акIубси бархIиличил савгъатра бедили, мубаракрарибхIели. Илра гIяхIси баркьуди саби, илгъуна ламусли ил къугъаси рурсилизир адамдеш лерни балахъуси тяхIяр саби. Илкьяйдали, сарира барх бузутани хIисаблизи кайсули, баркаллаличи ва хIурматличи лайикьрикили сари. Бирар гьаман адамти сецад ламусуни дараллира, илгъуна баркьуди хIебалутира. Оксана биалли илдигъунтала лугIилизирадси ахIен.
Оксана МяхIяммадовнала хIялалси бузери пачалихъла шайзибад кьиматлабарили, чумал ХIурматла Грамоталичил шабагъатларарили сари.
Гьаннала гIергъира гIямрулизир ва бузерилизир сархибдешуни имцIадикIаб, гьатIира халкьличил балгундешличил, мардешличил, сунела ахIерси уршили ва лебилра сунела дигутани разирирули хIерриэс кьадарбиаб!