Нушани балуливан, Россияла Президент Владимир Путинни «2023 ибил дус — педагогла ва насихIятчила дус» сабливан багьахъурсири. Президентли бурибсири: «Илала бекIлибиубси мягIна, дурхIнала чеабиуси наслу бяркъес кабирхьуси халаси къиянничи пикри бяхIчиаахъес. Илдани улкала даража гьалабяхI арбукес кабирхьуси халаси пайличила бурес».
МугIяллимла бархIи, Москвализиб, Россияла Федерацияла Халкьла Палатала Аппаратла майдайчиб, лебил Россияла шила школабала мугIяллимтала 7-ибил съезд бетерхур. Балбуцличи Россияла 69 регионнизибад 150-йчибра имцIали мугIяллим цалабикиб. Илди-ургаб лебри чедибдеш сархибти, призерти, санигIятлашалти конкурсунала ва олимпиадабала лауреатуни, лебил Россияла Профсоюзла ва шила учительтала сиптабала вакилтира. Ил съезд программа хIясибли, кIел бархIи бухъянбитIун. Цаибил бархIи илар детерхур лекцияби, секционный майдунти, илдачир шила школаби гьаладяхI дикнила суалти хIердариб. Илкьяйдали шила мугIяллимтас «Заманали пулукIхIебирахъу» бикIуси проектра гьалабирхьу. Цаибил бархIи дураберкIибси бутIала ахирличиб, Пачалихъла Кремльла КIялгIялизиб мугIяллимтас багъишлабарибси концертра гьалабихьиб. КIиибил бархIи, программа хIясибли, гьаргси гьунибаъниличир школабазир патриот бяркъ бедлугнила, «Россияла багьудила министерствола школа» бикIуси проект шила школабазиб бетурхахъни ва цархIилти аргъбаибти суалти хIердариб. Ил съездличир бутIакьяндеш дарахъес жирарибсири Индира ГIябдуряхIимовара. Индира МяхIяммадсягIидовна Сергокъалала кIиибил школала директор сари.
Илини бурни хIясибли, сунела бузери дурхIнала лагерьличибад бехIбихьибсири. Камси замана дикибхIели, Индира МяхIяммадсягIидовна школализи дурсри кадирхьахъес жирариб. Илкьяйдали бехIбихьибсири илала мугIяллимла санигIятличил бархбасунси бузери. Индира МяхIяммасягIидовнала гъай хIясибли, мугIяллимла санигIят сунес дигули чеббикIибсири.
— Наб дебали дигахъис дурхIни. Дила илдачил рузес иштяхIдулхъан, хаслира бехIбихьудла классуначил. ХIязлис ахIенгу бикIути «дурхIни — гIямрула вавни саби» или.
Индира МяхIяммадсягIидовнани Президентла Грантуназир, республикализир ва Россиялизир дурадуркIути конкурсуназир чедибдеш сархули рирар. Илала бучIантани декIар-декIарти конкурсуначир ва олимпиадабачир мурталра гьаларти мерани дурцули бирар.
Индира директорла къуллукъличи каратурли гIергъи, илини лерилра сунела кьасани детерхахъес халаси хIянчи бирули сари. Ил школа гьабкьятала къяянази каберхахъес, илаб бузутас ва бучIутас гIяхIти шуртIри акIахъес бажардилизир сари.
Нушанира Индира МяхIяммадсягIидовнас арадеш, бузерилизир сархибдешуни дулгулра!
Рабадан БяхIяммадов
