Даршуси закла удир дявила анцIбукьуни кадиркни инсаниятла гIямрулизиб лебгIеб вайси анцIбукь саби. Дунъяла халкь даршули хIербирули, сяхIбатуни-мукърази ахъили хьалли, дявила майдайчир гIязиз жан кьурбандирули, улхули саби жагьил жайрунти. МехIела мерлар хъажла бегIти западла улкнала вегIбекIунани нушала улкализира илдигъунти балагь-кьадар садаахъес халаси къайгъи дакIубарили саби. ВатIан гьанни алхунти гIяхIгъубзни Гьанбикунала унхъри гьаргдирнира дигеси анцIбукь саби. СенахIенну чеалкIуси наслула вакилтани илди ВатIа хъар-хIерагардеш датахIес багьандан бургъули, чедаахъибти гьунартачила хъумартес асубируси ахIен.
Гьалабванра Дахадаевла районна Уркухъла шила жагати мер-мусаличиб ил районнизибадти алхунти бургъантала хIурматлис Гьанбиркунала анхъ абхьиб. Илгъуна баркьудили чеалкIуси наслула вакилтас игитуначила мурталра гьанбиркахъу. Балбуцли цалабяхъиб активистуни, кумекчиби, районна багьудила учреждениебала вакилти, (Уркухъла дахъал шалубарси лицейла ва Уркухъла дахъал шалубарси гимназияла) бучIанти ва мугIяллимти, туризмала ва жагьилтала политикала отделла хIянчизарти.
Анхъ адамтани бамсриихъуси мерлицун бетарули ахIен, нушала улка багьандан чула жан кьурбандарибти бургъантачила хъумхIертнила бетуцра саби. Ил анхъ акIахънила баркьуди бяхIчиаибси саби гьарилли алхунти чула гъамти, шанти гьанбиркахъниличи, илдала гъабзадешла баркьудлумачила баянти кайсни ва илди чеалкIути наслула вакилтачира даахъни. Ил дебади кьадричебси баркьудира саби, сенахIенну гьарил алхунси игитли сунес гIелар датурти сари игитдешла ва патриотизмала черяхIти бетуцуни, сарира чеалкIуси наслула вакилтала уркIбазир даимлис калести.
Балбуцлизир бутIакьяндеш дариб районна бекIли, учреждениебалара организациябалара руководительтани ва илкьяйдали бургъантала бегIтани.
Гьанбикунала анхъ ахIерси ВатIан багьандан жан кьурбандарибтала хIурматбирнила ва илдас баркалла балахънила лишан саби.
Илкьяйдали Дахадаевла районни бутIакьяндеш дирни иргъахъули саби регионна «Гьанбикунала анхъ» ибси балбуцлизир. Ил Дагъистан Республикала бекI Сергей Меликовла хъарбаркь хIясибли, игитла бебкIаличил алхунти ВатIан балтахъантала хIурматлис дурабуркIуси саби.
Муниципалитетла руководитель МяхIяммад ГIябдулкьадировла хъарбаркь хIясибли, «ГIяяла хъяб» бикIуси мерличиб ил анхъ балкьаахъес багьандан ванза декIарбарибсири. ЖКХ-ла хIянчизартала кумекличил илаб хIядурдеш бирнила баркьудлуми дурадеркIиб.
Балбуц ибхьули, районна бекI МяхIяммад ГIябдулкьадировли буриб Гьанбикунала анхъ ВатIан гьанни жан дедибти дахадаевлантачила хъумхIертнила лишан саби или.
«Иш анхъ нушала ахIерси ВатIайзиб даршудеш ва паргъатдеш диахъес багьандан игитла бебкIали алунти багьадуртала хIурматбирнила лишанни бетаурли саби.
Ишар нушани мурталра ВатIан балтахъантала игитдешла ва гъабзадешла баркьудлуми гьандиркахъули далдуцуни дурадуркIехIе. Анхъла гьарил гIямзили нушала адамтала патриотизмала ва цадешла мягIничебдешличила гIячихъли иргъахъули саби», — буриб районна бекIли.
«ИшбархIи нуша иша цаладикилра ахIерси ВатIан багьандан жан кьурбандарибти нушала игитунала хIурматбарес багьандан. Нушала бургъанти шалати пикрумала ва баркь-бацла хIялалти жагьилтири. Илди челябкьлализирра адамтала гIямрула ва яшавла шуртIри къулайдиахъес ва дунъяличиб даршудеш калахъес къайгъилизибтири. Илгъуна анхъ ибхьни нушала пашмандеш иргъахънила лишанцунра ахIи, илдигъунти игитуначила хъумхIертнила лишанра саби. Илди нушала уркIбазиб даимлис кавлан. Нушани чеалкIуси наслула вакилтачи илдала гъабзадешла баркьудлумачила баянти диахъехIе ва пахрубирехIе илди нушала улкала игитдешла тарихла бутIа бетаъниличи», — буриб алхунси ургъан МяхIяммад ГIябдуллаевла неш, «Нешанала цIакь» ибси комитетла председатель Кумсият НурбяхIяммаевани.
СВО-лизир бутIакьяндеш дирухIели алхунси Артур СалихIовла дудеш МяхIяммадхIябиб СалихIовли буриб игитуначила жуз дуракаэс хIяжатли биъниличила.
«Игитунала гьунартачила ва гъабзадешла баркьудлумачила тарихла баянти жагьилтазира дагьахъес хIяжатти сари. Илдази даршудешла ва азаддешла кьимат сегъуна бирусил багьахъесс багьандан. Гьарил у, гьарил тарих – ил нушала гьанбикуназиб мягIничебси бутIалира бетарули саюби. Нушани илди гьанбикуни мяхIкамдарес ва чеалкIуси наслула вакилтачи даахъесра чебиркур», — буриб илини.
ГIур гъайрухъун бургъантала хъалибаргуни гIердурцнила фондла председатель Алена ГIябдуллаева: «ДурхIнази биштIали лебай патриотизмала хIялани руркъяхъес хIяжатти сари. Школьникунани чула ВатIа тарих ахъли кьиматлабирес гIягIнибиркур. Илдани илкьяйдали аргъес хIяжатси саби нушала бекIла чедиб даршуси зак калахъес багьандан сегъуна кьимат бедилил нушала бургъантани. Гьанбикунала анхъ адамтани бамсриихъуси мерцун ахIен, ил, сунезирра нушани жагьилтас рухIласи давлала кьиматчебдешличила баянти гьаладирхьуси ва нушала ВатIан балтахъантала хIурматбирес хIяжатли биън6иличила илдази иргъахъуси далил саби».
Балбуцла дазурбазир назмурти делчIун ва патриот бяркъ лугнила мурадличил далуйти делчIун. Илди баркьудлумани цалабикибтазивадли чичилра асархIебарили кахIелун.
АхIерси ВатIайс къуллукъличибти бургъантас ва илдала игитти баркьудлумас хасбарибси «Офицерти» ибси далай зайбухъахъун Арсен ХIясановли.
Гьанбиркунала анхъ абхьахъес ихтиярбариб районна бекI МяхIяммад ГIябдулкьадировлис, алхунти бургъантала бегIти МяхIяммадхIябиб СалихIовлис ва Кумсият НурбяхIяммаевас.
Шадлихъла аги-хIяйзиб балбуц абхьили гIергъи, илала лебилра бутIакьянчибани нушала улкала хъархIерагардеш балтахъули алхунти игитунас хасбарибси уркьулила гьала вавни кадихьиб. «Игитунас даимси деза» ибси далайла агурбаур, гьайгьай, цалабикибтала хIулбазир нургъби дакIудухъун. Илдани галгуби удалтули, игитунала хIурматлис мицIирти бикьруми алкIахънилизир лебтанилра бутIакьяндеш дирни иргъахъулри.
«Гьанбикунала анхъ пашмандеш иргъахънила мерлицун бетарули ахIен, ил цабехIличибад-цабехIли патриот бяркъ бедлугнила бетуцуни диахънила лишанра саби. Гьарил убатурси галга сагати гIямру сари, сагати умутуни сари. Нушала игитуначила гьанбикуни биалли нушала уркIбазир даимлис кавлан. Нушала бургъантала хIурматбирнила ва илди гьанбиркахънила гIямзили бетааб иш. Иша вакIибси гьарил адам тIашизурли, пикриулхъан ва нушаб даршудеш, азаддеш калахъес багьандан чула жагьти гIямру кьурбандарибти гьанбикахъаб», — бурули саби балбуц дураберкIибтани.
Дахадаевла районна администрацияла пресс-служба
