Дагъиста хал­кьа­нала ме­за­на­чил газетаби, жур­налти ва жузи дурайънила та­рих бархбасунси саби ду­бур­лантала гIямру-яшавла, бе­­кIа­хъудила ва куль­тура­ла тарихличил. Ил ша­йчиб мягI­ни­чебси мер бур­цули саби Дагъистайзиб Совет хIуку­матра кабизурли, соци­а­лиз­мала тяхIяр-кьяй­да лушес бехI­би­хьибси ман­зилли.
Дагъистайзиб 1920-ибил дусла мартла 26-личиб ГIумар ГIя­лиев­ла бекIдешлиуб акIа­хъуб­сири суне­зи авал отдел кадурхуси халкьла бел­чIу­дила ва печатьла Комиссариат. Комис­сариатлизи кадурхутири халкьла бел­чIудила, жузи лукIни ва кадирхъни, мугIял­лимти хIядурбирни, клубуни, библиотекаби, музейти, театрти абхьни ва илди дузахъни, художественная литературала ва искусствола масъулти, гьаб-убла манзилла рухIла культурала ва тарихла памятникуни мяхI­камдирни, газетаби-журналти ва жузи дурайъни, илкьяйдали итхIелла комиссариатли къелгIердикутири гьан­нала культурала, белчIудила, печатьла, бекIахъудила, юстицияла, арадеш бихIнила министерствобани, издательствобани ва цархIилти учреждениебани дузахъути хIянчурби.
Комиссариатли хаслира халаси пикри бяхIчииусири Дагъиста халкьанала, урусла ва гIярабла мезаначил газетаби ва журналти алкIахъниличи ва дурайъниличи. Комиссариатла печатьла отделлизиб 1920-ибил дусла апрельла ахирличиб акIахъубсири редакцияла коллегия ва тасдикьбарибтири газетабала ва журналтала редакторти. Къумукъла мезличил дурабулхъуси газетала редакторли викIибсири СягIид Давудов, кIарахъала мезличил – ГIяхIмад-Наби МяхIяммаев, булугунала мезличил – МухIудин Чаринов, гIярабла мезличил – Абусуфьян Акаев. Дарган мезличил дурабулхъуси газетала редактор варибсири 25 дусла гIямруличивси МяхIяммад ХIясанов. Ил марси гьалмагъ сайри Уллубий Буйнакъскийла, МяхIяч Дахадаевла, Жалалудин Къоркъмасовла, узби ХIямид ва МяхIяммад ТIалхIятхъала.
М.ХIясановла гIям­ру­ли­чи­ла ишдигъунти баянти лер. Дербентлизиб авал классла училище белчIи гIергъи, пагьмукар урши МяхIяммад 1909-ибил дуслизив Темир-Хан-Шурализир абхьибти кIел дусла мугIяллимти хIядурбирути курсаначи керхурсири. Илди курсаначиб бучIутири Дагъис­та машгьурти мугIяллимти: СягIид ГIя­ма­ров, Хайруллагь ХIя­жиев, Мута Рабазанов, Мир­за Темир­ха­нов, ХIя­дис ХIя­жиев ва цар­хIил­ти.
МяхIяммадли Дербентлизив учIу­хIе­ли белкIунсири ва 1907-ибил дусла ноябрьла 8-личиб дурабухъунси «Дагестанский вестник» газетализи кабяхъибсири «Рассказ горца о Хаджи-Мураде» («ХIяжи-Му­рад­личила дубурланна хабар») бикIуси имам Шамилла наиб ХIяжи-Мурадличила пергер очерк.
1911 ибил дуслизиб Тифлислизиб (Тбилиси) Россияла им­ператорла наместникла кан­целярияла типографиялизиб дурабухъунсири «Даргала алипуне ва лужисне жуж» бикIуси букварь. Методикала ва цархIилти шалубазибад ил дебали чебетаахъили балбикахъибси букварь цалабяхъибсири Темир-Хан-Шурализиб кIел дусла мугIяллимти хIя­дур­бируси курсаназиб бучIути СягIид ГIямаровлира Мя­хIяммад ХIясановлира.
Темир-Хан-Шурализиб бел­­­­­чIуди хъа­­раахъурли гIергъи, Мя­­хIяммадла къайгъ­начил ХIурхъила шилизиб дар­га­­ла ва урусла мезаначил дурхIни бу­­­чIа­хъуси школа абхьибсири. КIи­найс Мя­хIяммад узули калун Хажалмахьила, Кумухла шимазирти школабазив.
МяхIяммад ХIясановли Да­гъис­тай­зиб Совет хIукумат ка­­­биз­ахъес дяхI­чиаибти бар­кьуд­­­лумазир жигарла бутIа­кьян­­­деш дарибтири. Илала хIекь­лизиб бурили саби ХIя­жи­ев ГIя­дилгерейла «ХIя­са­нов Мя­хIяммад» би­кIуси 1997 ибил дуслизиб дурабу­хъунси халали ахIенси жузлизиб.
1922-1923-ибти дусмазив М.ХIя­санов узусири Лавашала округла исполкомла председательли ва Дагъис­та Наркомпросвещениела заместительли.
Партияла Дагъиста обкомли 1924 ибил дуслизив ил вархьибсири Хайдакь-Та­ба­саранна округла исполкомла председательли узахъес. Ил дуслизив Совет хIуку­мат­личи къаршити къачагъуначилси дергълизив МяхIяммад ХIясанов декIли вяхъибсири ва алхунсири. Илала пергерти хIял-тIабигIятра баркьудлумира халкьлизи хъумхIертахъес багьандан Хъар МахIаргила колхозлис ва ил шила бехI­бихьудла школалис Мя­хIям­мад ХIясановла у бедибсири. Амма 1937 ибил дуслизиб МяхIяммад ТIалхIятра ХIямид ТIалхIятра бахъал цархIилти, Дубуртар Улкала пергер гъубзни, чучиб сегъуналра гIяйибагар шайчиб «халкьла душманти» саби или туснакъбарибтири. Баягъи ил дуслизив ХIямид ТIалхIятличил ва цархIилти ре­волюционертачил варх вируси ва илдала гьалмагъ сайри или, Хъар Ма­­хIаргила колхозлис ва ил шила школалис бихьибси М.ХIясановла у уб­бяхъибсири. ХIера, илгъуна сабри даргала газетала цаибил редакторла гIямрула гьуни.
Дагъиста халкьла бел­чIу­ди­ла ва печатьла Комиссариатла печатьла отделениелизиб хасси подсекция или сунес ируси кьукья лебсири. Илизиб 1917 ибил дуслис гьалаб М.Мавраевла ва А.М.Михайловла типогра­фиялизиб чеблукIантили бу­зу­ти жагати хатIла бегIти ва жузи кадирхънила искусст­вола гьарли-марти устни сабри алав­буцибти. Ил­дигъунтазибадли сабри Нижнее Казанищели­зи­­вадси ХIя­­сан Ибрагьимов, ГIя­­­мушила ши­­ли­зивадси Аса­дуллагь Мя­хIям­мадов, Ха­­жал­­­ма­хьилизивадси ГIяб­дул­гIязизла Мя­­­­хIяммад…. Ил­да­зибад гьарилли чер­­делкIи, бас­маханализир кадяхъес­ли чедетаахъили хIядур­ди­рути­ри чула нешла мезличил дел­кIунти бел­кIа­ницунра ахIи, Дагъис­та цархIилти халкьанала, че­чен­­тала, гIярабла мезличил дел­кIунти произведениебира.
ЧеблукIантала жавабкарси ва дебали чекабизурли бируси къиянси хIянчиличила бурули, машгьурси чевлукIан ва жузала пергер уста ГIурибла шилизивадси ГъазимяхIяммадли 1915 ибил дуслизиб М.Мавраевла басмаханализиб гIярабла мезли дебали жагали кабяхъибси «Тафсир ал-Кьуръан» (Кьуръайчила баянти) бикIуси халаси жузла ахирлизиб ишгъуна белкI леб: «Иш жуз жагали кабяхъес багьандан нуни дила лебилра пагьму пайдалабарира. М.Мавраевла басмаханализив ну 12 дус узулра. Илди дусмазир дила ручкализир я шинкья хIедеръуб, я дила тIулбазиб ручка камхIебиуб».
ХIера, илкьяйдали чекайзурли 1903-ибил дусличивад вехIихьили М.Мавраевла басмаханализив жузи жагали кадирхъес ибси кьасличил вамсниагарли узусири Хажалмахьилизивадси ГIябдулгIязизла МяхIяммадра.
Масала, 1917 ибил дуслис гьалар даргала мезличил ка­дяхъибти 34 жуз­лизирад ГIяб­дулгIязизла МяхIям­мадли жагати хатIличил делкIи хIя­дурдарибтири 29 жуз; гIе­ларти 5 жуз кадяхъибти сари УргIерила шилизивадси жузи ка­дирхънила пергер ус­та Мя­хIяммадла урши Да­вуд­­­­хIяжини. Илди кIилилра чер­делкIи басмаханализир ка­дя­хъесли хIядурдарибтири дар­ган мезличилцун ахIен­ну, гIя­­раб­ла, чечентала ва цар­хIил­­­ти мезаначил дел­кIун­ти жу­зира.
Илала дурабад, ГIяб­дул­гIязизла МяхIяммадли халаси хIянчи барибсири гIярабла ва цархIилти мезаначирад дарган мезличи (цIудхъурла лугъатличи) Востокла улкнала ва Дагъиста поэтунала, гIялимтала произведениеби шурдатнила ва дурайънила, даргантала ургар тIинтIдирнила шайчиб. Дахъал сари илини шурдатурти произведениеби. ГIябдулгIязизла МяхIяммад вебкIили сай 1941 ибил дуслизив.
Дагъиста халкьла багьудила ва печатьла Комиссариатла печатьла отделли, илкьяйдали 1920-ибил дуслизиб акIахъубси Дагъиста па­чалихъла жузала издательст­воли (Даг­госиздат) сари акIа­­хъубти бурхIначирад дехI­­­ди­хьили халаси хIя­ракат ба­рибсири газетаби, журналти ва жузи кадирхънила къиянси ва дахъал шалубар хIянчи ду­ра­буркIнилизиб. Амма цаибти гунзрачибадал бехIбихьили илдас чебуркъубсири дебали дахъал къияндешуначира бя­хIя­гес.
Илдигъунти къияндешуназирадли сари типографиялизир газетаби, жузи кадяхъес гIягIниси кагъар хIебиъни, типографиябазиб ва редакциябазиб бузести адамти камли биъни, типографиялизир машинабира шрифтра камли диъни…
1921 ибил дусла сентябрь базличибад партияла Дагъиста обкомли районтала ва округунала партийный комитетуначи бархьибси кагъарлизиб ишкьяйда белкIи саби: «ДугIли харжбарес асубируси ахIен кIапIила гехIел бутIала цалра бутIа. Гьарил кагъар кIелра шайчибадли белкIи биэс гIягIнибиркур. БацIси мер ва дубани кахIелахъес чебиркур. Халаси мяхIкам­дешличилцун ва гьар секIайчи уркIи изули дузухIелицун дирехIе нуша ишгъуна къияндешлизирад дурадухъес».
1921 ибил дусла февральла 12-личиб Кремльлизиб В.Ленинничил бетаурси Д.Къор­къмасовла, Тахо-Годила, М.Хиз­роевла ва М.Ахундовла ихтилатлизиб цархIилти ма­съул­тачил барх гьалабихьибси­ри Дагъиста типографиялизир гIягIнити станокунира ка­гъуртира дебали камли диъ­ниличила. Ил ихтилатла гIергъи, В.Ленинна хъарбаркьли­чил Дагъистайс дархьибти се­кIул­тачил дарх лертири литог­ра­фияла кIел машина ва ка­гъур­ти. Илди кIелра станок ка­­дихьибтири Темир-Хан-Шу­ра­­­лизибси М.Мавраевла типографиялизи.
Партияла Дагъиста обкомла президиумли 1921 ибил дуслизиб майла 30-йчиб хIук­му дурасиб: урус мезличил дурабулхъуси газетала ти­раж 1200-2000; туркла мезличилси газетала — 1000; кIарахъалара къумукъуналара мезаначилти — 500-500; даргалара булугуналара мезаначилти – 300-300.
Даргала гIяжамличил ду­ра­булхъуси цаэсил газеталис «Дагъис­танна мухтарият» (Дагъиста автономия) би­кIу­сири. Ил газетала 1921 ибил дуслизиб дурабухъунси номер саби нушачи баибси. «Шура дагъистан», «Дарккван» ибти умачил дурабулхъулира калун. 1925-1927-ибти дусмазиб ил латынна хатIличил «Дарган» ибси уличил сабри дурайуси.
ГIергъити дусмазир даргала газетала уми дарсдикIутири, илала тираж им­цIа­­бикIусири. КамбикIути анцIбукьунира дири. Ил дурабулхънила заманара барс­би­кIусири. Масала, 1925 ибил дуслизиб даргала газета («Дарган газат») 500 экземплярличил жумягIли гьачам дурабулхъусири. 1929 ибил дуслизиб биалли ил 1300 экземплярличил жумягIли кIина дурабулхъусири.
1925 ибил дусла ахирличи бикайчи даргала газетала редакциялис бекIдеш дирусири МяхIяммад ТIалхIятли. Газета гьарли-марли дубурлантала рухIласи давлали бетаурлири. Илини гIямрула ва яшавла шайчирти къияндешуни умутличил дяхIярахъес халкь цабирахъутири. Газетализиб бузескабииб хIямшиман Насруллагь Даудов ва хIурхъан Хизри Сулайбанов.
ГIур «Дарган» газетала редакторла хIянчи хъардарибтири Хизри Сулайбановличи. Ил редакторли узуси манзиллизиб газеталис «Колхозла байрахъ» ибси у бихьиб. ГIур биалли «Дагъистанна правда» бикIусири. Илгъуна у бе­дибсири Дагъиста лерилра халкьанала газетабани «Да­гестанская правда» газета­лизир лерилра макьалаби ка­дирхъутирину. БягIубиуб дар­ган мезли лукIантала авид­ра. Пагьмучебти корреспондентуни сабри Хизри Сулайбанов бекIливиубли ХIяпиз Иб­рагьимов, узби Сагид ва ГIя­мар ГIябдуллаевхъали, Мя­­­хIям­­мад Агъаттаев, Запир ХIя­­жиев, ХIясан БяхIяндов, Мя­хIяммад Мя­хIяммадов, Мя­хIяммад ХIямидов, Шамил ХIя­санов, ГIябидат ГIусбанова, Мя­­хIяммад Агъаларханов, Мя­хIям­­мад Му­саев.
Лавашаб дурабулхъусири 1931-1937-ибти дусмазиб даргала газета. КIинайс Мя­хIяч­къалализиб дурабулхъес бехIбихьибсири. ГIур катурси Иб­рагьим ИсмягIилович Бя­хIям­маевли 22 дус редакторла къуллукъуни дузахъи. Ил дебали пагьмучевси пасихIси, уркIи гьаргси адамтачи дигили вицIибси дубурлан сайри ва коллективлис устадешли­чил гьуни чебиахъусири. Адам­лис гIяхIдеш баресра гьу­цIикIусири. Ил редактор виру­хIели бахъал журналистунани газетала кьадри-кьимат ахъ­дуцибтири. Ил­дигъунтала лугIилизибадтири ГIяй­шат Мя­­хIяммадова, Абакар Ибиев, Абакар ГIусманов, Запир ХIяжиев, ГIяб­­­дулкьагьир Мя­­хIяев, Эмин Расу­лов, ХIя­сан ГIя­лиев, ГIяхIмадхан Абу-Бакар, Сулайбан Рабаданов, Мя­хIям­мадгIяли ХIя­жиев, Сарат ГIялиева, ГIяб­дусамад ТIал­хIят, МяхIяммадрасул, ГIя­мар ХIясанов, ГIиса Айгубов, Кьурбан ГIялиев, ХIясан Ра­баданов, ГIиса ТIа­гьи­ров, Ильяс ХIясанов, Кьур­бан­хIя­жи Амирбеков, Ражаб Ада­мад­­зиев, За­пир Харбилов, Нур­­бяхIяндхIяжи ГIяй­саев, Мя­­хIяммад Сурхаев, Ильяс ХIу­­сейнов, ГIямар ГIяб­дулжалилов, ХIяжи Закарьяев, Ибрагьим Байги­шиев, ХIябиб Наврузов, Мя­хIям­мад­хIяжи Ибрагьимов, ГIяб­дуразакь Мур­та­загIялиев, Жамил МяхIяммадов, Га­зим-Бег БяхIяндов, Амир Гъази, Мя­­­хIям­мад Къубаев, ХIябиб Кьур­банов, Башир ГIялиев, Амирбек Кьа­ди­бяхIяммаев, Амин ва Камил Чутуев­хъали, ХIяжилагIяли ГIябдуллаев (су­ратуни кайсанти), художникуни Мя­хIяммад Юнусилау, Петр Рубцов, ГIямар ХIусейнов, МяхIяммад ХIя­сан­­хIусейнов, Адабижат Мя­хIя­ммаева, МяхIяммадхIяжи Шихшабеков ва цархIилтира. Илдазибадли цацабехIти челябкьлализиб машгьурти писательти, поэтуни, гIялимти, культурала ва искусствола хIянчизарти бетаур.
Журналистунала бузерилис халаси кумекли бетарути саби верстальщик, выпускающий, корректор, машинисткаби. Ил шайчиб бахъхIи гIиб­ратчебли бузули калун Мя­хIяммад Гу­гаев, Шагьа­бут­дин Закиев, ПатIимат ГIисаева, ПатIимат Ха­лимбекова, ПатIимат Рамазанова, Хамис Зулпукьа­рова, Жу­мягI БяхIяммаева, Сакинат ШяхIбанова, Рукьият Бя­хIям­мадова, рузби Па­тIимат МяхIяммадова ва Ру­кьият СягIидова, Рукьият ХIя­жиева, Марин Сулайбанова, Ха­дижат ГIялиева, Умуриза ГIяб­дусаламова, Калимат ГIяхI­ма­дова, Гулбарият Арслангереева.
Газетала редакциялизиб дусми ардашуцад цабехI арбашули, цархIилти илдала мераначиб бузес башулри. Гьайгьай, редактортира барсбикIулри. И.БяхIяммадовлис гIергъи редакцияла жагаси авидлис бекIдеш дарахъес Дагъистайзивцунра ахIи, лебилра улкализив ва дурала улкназивра вархли машгьурси писатель ГIяхIмадхан Абу-Бакарличи хъарбарибсири. ГIур филологияла гIилмуртала доктор, ДГУ-ла профессор ГIябдуллагь Вя­хIидов редакторла къуллукъличи калтули сай. Редак­торла дебали жаваблати къул­лукъуни хъардариб партийный хIянчизар МяхIяммад Мя­­хIяммадовличира. 1993 ибил дусличивад «Замана»-ла бекI редакторли журналист, пи­сатель, тилмаж, драматург Гъа­зимяхIяммад Юсупов узес ве­хIихьиб. Илини илди къуллукъуни 2012 ибил дусличи бикайчи дузахъи. ИлхIейчирад 2023 ибил дусличи бикайчи «Замана» газеталис бекIдеш дариб Арсен Юсуповли, суненира газета гьалабяхI арбукес халаси къайгъи дакIубарибси. 2023 ибил дусличирад 2025 ибил дусличи бикайчи даргала газеталис гьуни чебиахъусири Салимат ГIялиевани. Илис гIергъи, дус бекI редакторла хIянчи бузахъули калун ГIябдуряхIман ИсмягIилов.
БусягIятла замана республикала дарган мезличил дурабулхъуси газетала бекI редакторла къуллукъуни замана­лис дузахъули сай Рабадан Бя­хIям­­ма­довли.
Дебали сабухъчебси ва давлачебси саби даргала газетали ахъибси гьуни. Илини сунела тарих бехI­би­хьиб 300-ла тиражличил. Иш­бархIи биалли ил бегIлара дигуси гIя­хIялван, гьарли-марси гьалмагъван, духуси на­сихIятчиван, мал­хIямси мас­ли­гIят­чиван, гIякьлу-дагьрила гIи­низ­ван, адаб-хIяяла хъарихъван дар­ган­тачи абицIули саби. Гьунби гIяхI­дираб хIед, нушала рухIла чирагъ!