Майла 27 лебил Рос­сияла биб­лио­текабала хIян­чи­зартала БархIи саби. Ил бар­хIи­личил мубаракрарес ди­гул­ра Р.ХIямзатовла уличилси Мил­латла биб­лио­текала край руркънила отделла бекI­ли­риуб­сигъуна хIянчизар, ДР-ла культурала рурибси хIянчизар ХIя­жиева Салимат МяхIям­мад­сягIидовна.
Варъа бучес къайгъилизир жигарчерли ду­зути мирхъи кьяйда, даргала рухIла давла пашхIебяхъяхъес, наслубала бархбас къябхIебердахъес къайгъилизир мур­талра бузе­рилизи ахъибси адам сари С.ХIя­жиева.
Ил акIубси сари 1962 ибил дуслизир, Сергокъалала районна ХIурхъила шилизир. Ил 1970-1978-ибти дусмазир ХIурхъила урга даражала школализир ручIули ка­лун­сири. КIинайс ил хъалибаргличил Мя­хIячкъалализи гечриуб ва илабси дубурлан рурсбас хас­ба­рибси интернат та­ман­ба­риб. Са­лимат ХIяжиевани Дагъис­та па­ча­лихъла уни­верситетла филологияла фа­куль­тет­ли­зиб белчIуди даимбариб.
30 дус ГТРК-ла кагъуртала от­делла ре­дак­торли, филь­ма­бала-видеотекала от­­дел­ла заведующаяли ва 10 дус проф­комла председательла заместительли рузули, илини гIяхIцад хIянчи дариб. 2009 –ибил дуслизир Салимат Р.ХIямзатовла уличилси рес­пуб­ликала Миллатла биб­лио­текализир рузес рехI­рихьиб­сири. БусягIятла за­ма­на­ра ил край руркъ­нила ва миллатла ли­­тера­турала отделла бекI­ли­риубси биб­лиотекарьли, даргала секциялизир ру­­зули сари. Салимат ХIяжиевачил ну 2014 ибил дуслизир универ­си­тетлизи ка­рерхурси замана тя­нишриубсири. 12 дус нуни ил ралули, гьачамалра дугьа­ри­зурхIели, мурад хIебарили гьан­хIе­биркур. Университетлизир ручIуси за­мана библиотекализи ря­кьи ца суал хьар­баибхIели, илини наб гьаладирхьути ба­гьахънибачи ва баянтачи мур­талра тамашарирусири. Пи­сательтала белкIани, ил­дачила делкIунти макьалаби, цар­хIилти машгьурти адамтала илдачила пикруми, се-дигара илини лугули дири.
Су­нела хIянчилис марси адам лер кьалли, секьяй­да­ли азгъин­хIе­риубли, ца ав­тор­ли­чила ишцад баянти дур­чутив или наб гьанбирки. Га­зе­тализир рузухIейчирадра ди­ла иличилси бархбас им­­цIабиуб. СенахIенну С.ХIя­­жие­вани мекелли жи­гар­черти бутIа­кьян­деш дирути сари «Замана» газетала гIям­рулизирра. ХIушанира че­биуливан, газетализир илала макьалаби дурадулхъули сари. Нушани дурадуркIути лерилра далдуцуни Салиматли мурталра гIердурцути сари. БурахIелли, илгъуна аги саби лерилра даргантачи къячдилкути далдуцунала шайчибра. Гьар шадлихъличир С.ХIяжевани дал­кьаахъурти жузала выставкаби нушани чедиэхIе. Даргала миллат­личил дархда­сунти мягI­ни­черти бурхIначила илини гьа­­чамалра хъумхIерту. Гьа­рил илгъуна бар­хIилис хасбарибси выставка, балбуц илини ду­рабуркIуси саби. Халаси умутличил бурес рирус, Салимат МяхIяммадсягIидовна миллатла библиотекализи ракIибла илала бузерира гьалабяхI арбякьун, дарган мезличил ва литератураличил бархбас лебти адамталара хIянчи гьамадбиуб. СенахIенну илиницад дахъал баянти нушаб чилилра гьалахIедирхьу. Нуша хIянчилар мурталра дикIутира: «Салимат икIар хIерузуси риалри, нушаб чили ишцадра кумек бири. Ил мерличив цархIил адам виалри, Салимат кьяйда узес вирхIейри». ХIера, «Замана» га­зетала хIянчизартала ургабцунра ахIенну, бахъал даргантала-ургаб халаси хIурмат сархибси, гьарли-марси хIянчизар сари ил. Иличи че, дубурлан хьунул адамла бегIлара дур­хъати ва жагати къиликъуни илизир нушани чедиулра: уркIи гьаргси, дяхI шаласи, ламус-хIяяла регI, рухI жагати халатала ва биштIатала хIурматбируси, сунела мезличи, культураличи, миллатличи уркIи изуси хьунул адам сари ил. Баркалла Салимат рузи хIед, хIу нушала лернилис. ЧIумаси арадешличил, хъалибарглизиб талихIличил даршал дусла гIямру хIуни деркIаби. Нушабра, чеалкIуси наслулисра хIу гIибратла адам сарри. Даргала миллат гьалабяхI башахъули, бузери сабухъчеббикIахъес Аллагь икьалавиаб.

ПатIимат Шахова