Нуша, дагъистанлантала уркIила гьав ахъбурцули, черяхIти баркьудлумачи гьирдирули дирехIе ВатIайчи диги иргъахъути, мурхьси мягIна бухIнабуцибти далай-делхъли. Илдазир, гьайгьайрагу, нушала миллатла хасдешунира гьаргдирули дирар.
ЖявхIелла заманаличирад делхълизир кегIебти жагьилтани дигила, малхIямдешла, ванадешла хIялани иргъахъутиван кабилзан. Далуйтани биалли, адамла лерилра хIялани иргъахъу или гьанбиркур. Илдани бузерила зяхIматчиби гьатIиралра гъирачеббиру, бургъантала гьав ахъбурцу, жагьил наслулизир вегI акIубти мер-мусаличи диги имцIадирахъу… илдала сияхI гьатIиралра имцIали бурес вирар. ХIера, сегъуна халаси мер бурцулил нушала гIямрулизиб далай-делхъли.
Нуни гьалабванра гьанбушибсири пачалихъла далай-делхъла пагьмурти чедиахъуси «Дагъистан» ансамбльличила. Амма сагаси дуслизиб ил акIахъубхIейчирад 90 дус диркни багьандан, иличила гьачам-гьатIи белкIес уркIи хьулбиуб (цацадехIти баянти тикрардиэсра асубирар, бикIуливан «балга тикрарбиралли, гьатIиралра гIяхIсили бетарар»). АкIахъубси саби ил ансамбль 1935 ибил дуслизиб. ИтхIейчирад ишбархIиличи бикайчи ансамбльлизиб бузути гIяртистунала дахъал наслуби дарсдиуб. Ил манзилла духIнар нушаб чедаэс имканбакIиб илаб бузутала пагьмурти чеахъдикIнила, гьарил баркьудилизиб гьалабяхI башнила, бузерила бетуцлизир къулайдешуни кадиркнила хIясилти. Ил багьандан сари илдала хIянчилизир гIяхIцад сархибдешунира кадиркути. ИшхIелла заманара ансамбль пагьмуртала ахъанайтачиб саби викIаслира, хатIа бетхIерар. Амма, гьайгьайрагу, илди лерилра чедибдешуни диахъес халаси къайгъибирули саби илала директор Дабай МяхIяммадович Дабаевли. Гьанна ил 33 дус ансамбльла директорли узули сай. ХIера, сецад дусмазиб илини илцадра жавабкардеш тIалабдирути къуллукъуни гьарбизурдешличил дузахъулил.
Дахадаевла районна УргIерила шилизивадси, Дагъистан Республикала ва Россияла Федерацияла культурабала урибси хIянчизар Дабай Дабаев 1992 ибил дусличивад вехIихьили, ансамбльла директорли узули сай.
Дагъистайзив ил хIелуси, мажахIят, лев виэс. ЦацабехIтани Д.Дабаев валули сай Дагъиста пачалихъла далай-делхъла «Дагъистан» ансамбльла директорван, даргантани – пергер далайчиванра.
Пергер дубурлан, машгьурси дарган, хIялалли сунела бузери къелгIеббикуси Дабай МяхIяммадович акIубси сай 1960 ибил дуслизив Дахадаевла районна УргIерила шила Советлизи кабурхуси Курки махьилизив.
УргIериб школа таманаибхIели, ил Дагъиста пединститутла музыкала факультетлизи учIес керхурсири. Илаб белчIуди таманаибси Дабай Дабаев Къарабудагъкентла районнизи кабурхуси Манасла урга даражала школализив музыкала учительли узули калун. ИлхIели гьачамцун ахIенри илала гьайбатси тIамали даргантала уркIби разидарибти. ХIера, пагьмучевси уршили сунела гIямрулизиб бекIлибиубси бетуцли бетаурси санигIятличи цаибти гунзри кацIиб.
ГIур ил гьуни даимбариб пачалихъла далай-делхъла «Дагъистан» ансамбльла директорла къуллукъличи катурхIели. УргIеран далайчичи илди хIянчи хъардикибтири 1992 ибил дуслизир.
УргIерила шилизибадти хIурматла адамти МяхIяммадла ва Хамсиятла халаси хъалибарглизив Дабай урегэсил урши сайри. Урегал узира, авал рузира лебти саби. Дабайла узби СягIид, Кьурбан ва Рабазан хабарагарли гIямрулизибад жявлил шалгIеббухъунти саби.
Нуни ункъли валусири Дабайла бегIлара халасигъуна узи СягIид. Илис имцIаливан Фантомас бикIули бири. Гьарил шайчивад бурес хIейэсцада гIяхIгъабза адам вири ил.
Балас нуни илала узби Рабаданра, Дабайра, Ханра. МицIирли лебалтазивад халалгъуна узи Хан дила гъамси юлдашра сай. Нугъуна мугIяллим сай илра. ГIяхIси мугIяллим. Или хIебиалри, илини 35 дус Дахадаевла районнизиб бегIлара халати школабазибадси УргIерила урга даражала школалис бекIдеш дирес хIейри. Хан МяхIяммадович Дабаев Дагъиста урибси учитель сай.
Дабайла итил узи Рабадан политехнический институт таманаибхIейчирад Каспийсклизибси точная механикала заводлизив цехла начальникли узусири. Ил заводла парторганизацияла секретарьлира вирусири. ГIур ил Дахадаевла районна шила хозяйствола управлениела начальниклира узиб. БусягIят ил «Дагдизель» заводлизив узули сай.
Дабаевхъала авал рузира леб. Илди чула хъалибаргуначил хIеркабирули саби, хIябал рузи — Дагъистайзиб, ца — Москвализир.
Бурес чебиркур, ил халаси, уржибси хъалибаргла дудеш МяхIяммад Дабаевличилара. ЧебяхIси ВатIа дергълис гIергъити, къиянти дусмала замана МяхIяммад Дабаев УргIерила Димитровла уличилси, гIур Гъуладтила Чапаевла уличилси колхозунала председательли вирусири. Илини итди къиянти дусмазиб сунени бекIдеш дирути колхозунази кадурхути шимала ва махьурбала халкь гушхIебиахъес халаси къайгъи бариб. ГIур вахъхIи МяхIяммад Дабаев УргIерила шила Советла председательли узулира калун. Дахадаевла районнизив бахъли валуси хIурматла адам вирусири ил. ГIяхIси багьудира бяркъра бедиб илини сунела биштIатас…
Дабай МяхIяммадович Дабаев нушала регионнизив культурала ва искусствола шайзивад дебали машгьуриубси адам сай. Илини сунела бегIлара халаси чеблализи халбирули сай Дагъиста халкьла пагьму вавалибирхъяхънила ва тIинтIбирнила хIянчи. Ил шайчив узесра ил сеналра умсра умсули ахIен. Илини Дагъиста халкьанала фольклорличи имцIали пикри бяхIчииэс вехIихьиб. Ансамбльла коллективлизиб дакIубиуб халкьла мухIлила пагьмула чебкад бузути адамти. Камси заманала бухIнаб ансамбльла коллективли мягIничебси ва хIяздухъеси концертла программа хIядурбариб.
Секьяйдали илини «Дагъистан» ансамбльличил кьисмат цабарибсил бурасли, гьаланачив далай-делхъла «Дагъистан» ансамбльлизив Дабай Дабаев дарган мезли далайвикIуси солистли узусири. Ил далайвикIули вири сайцунра хорлизивра. ГIур илизир гIяхIси сиптакарла устадеш дакIудухъун диэс, камси заманали Дабай МяхIяммадович ансамбльла коллективлис бекIдеш дирес вехIихьиб.
Илини ансамбльлизир дахъал дарсдешуни акIахъуб. Ансамбль дурала улкназир цаибти концертуни чедиахъес бехIбихьиб. Мисаллис бурахIелли, ансамбль Аргентинализиб, Франциялизиб гIяхIцад замана, концертуни чедиахъули, калун. ГIур илини бегI гьалар Пиренейский фольклорла фестивальличир бутIакьяндеш дариб.
2008-ибил дуслизиб ансамбльли Москвализиб «Дагъистан Республикала БурхIни» бикIуси культурала программализир жигарла бутIакьяндеш дариб. ИтхIейчибад бехIбихьили, ансамбль «Дагъистан» республикализир кадиркути лерилра культурала шайчирти далдуцунала бутIакьянчили бетаур. Илдигъунти ва цархIилти сархибдешуни диахъни багьандан сайри Дабай МяхIяммадович ДР-ла урибси культурала хIянчизарла уличи лайикьикибси.
Илала къайгъиличибли ансамбль «Дагъистан» ахъти искусствола тIалабуначи балбикибси художественный коллектив бетаур. Илини лебил Россияла ва дунъяла халкьани-ургарти фольклорла далдуцуначиб бутIакьяндеш дирес бехIбихьиб.
2016 ибил дуслизив, Россияла халкьанала культурала даража ахъбурцни ва гьалабяхI башахъни багьандан, Дабай МяхIяммадович Дабаев Россияла Президентла шайзибадси Баркаллала кагъарличил шабагъатлавариб. 2021 ибил дуслизив ил «РФ-ла культурала урибси хIянчизарла уличи» лайикьикиб. 2022 ибил дуслизиб илис Дагъиста БекI Сергей Меликовли «Дагъистан Республикала гьаларти сархибдешуни багьандан» бикIуси орден бедибсири.
ИшхIелла аги-кьяйда пикрилизи касили, пачалихъла далай-делхъла «Дагъистан» ансамбль концертла программаличил Украинализиб бетурхуси дявила хасси балбуцла бутIакьянчибачира башули бирар. Чула хасси программаличил илдани бургъантала уркIила гьав ахъбурцули саби. Илдигъунти далдуцунала замана илдани нушала бургъантас кумек гIеббаахъесра хъумуртули ахIен. Къиянси замана, пашмандеш ва децI черардукибсилис халаси кири биур бикIаргу, хIебиалли дила макьалала игитунас вецIнали имцIали кири баэс гIягIнили саби, чула пагьмуртачил адамтала уркIбази разидешла хIялани алкIахъни, анцIкьи черардикни, гьав ахъбурцни багьандан.
ГIебшнила бурхIназибра Дагъиста БекIла хъарбаркь хIясибли, илди Лугансклизиб мерлабиубси саби-гIяхIъулатала батальон «Каспий»-ла бургъантачи гIяхIладли бякьун. Гьайгьайрагу, республикала БекIла хъарбаркь Дагъиста Правительстволи ва культурала Министерстволи гIеббуцибсири.
Концертла дурабад, бургъантачил уркIи гьаргси ихтилат дураберкIесра имканбакIибсири. Дабай МяхIяммадовичли бургъантала уркIбази атIести жагати дугьбира дуриб. Илини бургъантас «Бриз» Центрла генеральный директор Хадижат МяхIяммадовнала, «Стройсвязьмонтаж» ООО-ла генеральный директор МуртазагIяли Мусаевичла ва «Люкс-Алко» ООО-ла генеральный директор ШяхIбан Кьурбановичла шайзибад гуманитарный кумек гIеббаахъиб.
Бургъантас концерт ва илар детерхурти гьунибаъниби дебали гIяхIдизур. Батальонна командир Табир Сажитович Маликовли ансамбльлис халаси баркалла багьахъур.
ХIера, илгъуна мягIничебси бузери саби нушала пергер ансамбльла. Дигулра гьаннала гIергъира чула пагьмуртачил халкьла уркIбази дякь кавдули, илди разибирули. Чесабиуси юбилейличил ансамбльла коллектив ва Дабай МяхIяммадович мубаракбирули, илдас гьатIира дахъ сархибдешуни дулгулра!
ХIяжимурад Ражабов
