Нушала республикализив ил адам бахъли валуси сай. ЦацабехIтани вала Дагъиста пачалихъла далай-делхъла «Дагъистан» ансамбльла директорван, даргантани – пергер далайчиванра.
Пачалихъла далай-делхъла пагьмурти чедиахъуси ансамбль «Дагъистан» акIахъубси саби 1935 ибил дуслизиб. ИтхIейчирад ардякьунти дусмала бухIнаб ансамбльлизиб бузути гIяртистунала дахъал наслуби дарсдиуб. Лябкьуси дуслизиб дурабуркIу бургар ил ансамбль 90 дус биънила юбилей. Баласра: ансамбльла гIяртистунала сагаси наслу, бегIлара дурхъаси байрамличиван, чула юбилейличи хIядурбикIули саби.
1992 ибил дусличивад вехIихьили, ансамбльла директорли узули сай Дахадаевла районна УргIерила шилизивадси Дабай МяхIяммадович Дабаев, Дагъистан Республикала ва Россияла Федерацияла культурала урибси хIянчизар.
Дабай Дабаев акIубси сай 1960 ибил дуслизив Дахадаевла районна УргIерила шила Советлизи кабурхуси Курки махьилизив.
УргIерила урга даражала школа таманаибси, пагьмучевси урши Дагъиста пединститутла музыкала факультетлизи учIес керхурсири. Илаб белчIуди таманаибси Дабай МяхIяммадович Къарабудагъкентла районнизи кабурхуси Манасла урга даражала школализив музыкала учительли узули калун. ИлхIели гьачамцун ахIенри илала гьайбатси тIамали даргантала уркIби разидарибти.
1992 ибил дуслизир ургIеран далайчичи Пачалихъла далай-делхъла «Дагъистан» ансамбльла директорла хIянчи хъардикиб. Дабай МяхIяммадович ил хIянчиличив 33 дус узули сай.
2000-ибил дуслизиб Дабай МяхIяммадовичли Каспийск шагьарлизиб туристунас ва цархIилти бамсриихъутас хасбарибси культурала ва анцIкьи чераркуси центр абхьиб. Илис «Урхьула цIуэри» («Бриз») бикIуси жагаси ура бихьиб. Амма бамсриихънила хIянчицун ахIен Бризлизир дурадуркIути…
Гьалав Дахадаевла районна бекIли узуси, бусягIят дахъал хъулрачилти юртани лутIи-хьулчилизирад сагадирнила шайчибси фондла директорли сайси МяхIяммад ГIябдуллаевич ГIялиевла сипта хIясибли «Бриз»-лизир спортлизир халати гьунарти сархибти дахадаевлантачил гьунибаънибира дурадуркIули дирар. ДурадуркIули дирар илар гIяхIбаркьла шайчирти далдуцунира. Ириъ МяхIяммад ГIябдуллаевичли бархIехъла манзил дуббуцари дихъахъес ифтарличи бахъал дахадаевлантачил вархли нура ила живарибсири.
УргIерила шилизибадти хIурматла адамти МяхIяммадла ва Хамсиятла халаси хъалибарглизив Дабай урегэсил урши сайри. Урегал узира, авал рузира лебти саби. Дабайла узби СягIид, Кьурбан ва Рабазан хабарагарли гIямрулизибад жявлил шалгIеббухъунти саби.
Нуни ункъли валусири Дабайла бегIлара халасигъуна узи СягIид. Илис имцIаливан Фантомас бикIули бири. Гьарил шайчивад бурес хIейэсцада гIяхIгъабза адам вири ил.
Балас нуни илала узби Рабаданра, Дабайра, Ханра. МицIирли лебалтазивад халалгъуна узи Хан дила гъамси юлдашра сай. Нугъуна мугIяллим сай илра. ГIяхIси мугIяллим. Или хIебиалри, илини 35 дус Дахадаевла районнизиб бегIлара халати школабазибадси УргIерила урга даражала школалис бекIдеш дирес хIейри. Хан МяхIяммадович Дабаев Дагъиста урибси учитель сай.
Дабайла итил узи Рабадан политехнический институт таманаибхIейчирад Каспийсклизибси точная механикала заводлизив цехла начальникли узусири. Ил заводла парторганизацияла секретарьлира вирусири. ГIур ил Дахадаевла районна шила хозяйствола управлениела начальниклира узиб. БусягIят ил «Дагдизель» заводлизив узули сай.
Дабаевхъала авал рузира леб. Илди чула хъалибаргуначил хIеркабирули саби, хIябал рузи — Дагъистайзиб, ца -Москвализир.
Бурес чебиркур, ил халаси, уржибси хъалибаргла дудеш МяхIяммад Дабаевличилара. ЧебяхIси ВатIа дергълис гIергъити, къиянти дусмала замана МяхIяммад Дабаев УргIерила Димитровла уличилси, гIур Гъуладтила Чапаевла уличилси колхозунала председательли вирусири. Илини итди къиянти дусмазиб сунени бекIдеш дирути колхозунази кадурхути шимала ва махьурбала халкь гушхIебиахъес халаси къайгъи бариб. ГIур вахъхIи МяхIяммад Дабаев УргIерила шила Советла председательли узулира калун. Дахадаевла районнизив бахъли валуси хIурматла адам вирусири ил. ГIяхIси багьудира бяркъра бедиб илини сунела биштIатас…
Дабай МяхIяммадович Дабаев нушала регионнизив бахъли валуси культурала ва искусствола шайзивад дебали машгьуриубси адам сай. Сунела гIямрула бегIлара халаси чеблализи халбирули сай илини Дагъиста халкьла пагьму вавалибирхъяхънила ва тIинтIбирнила хIянчи.
Гьаланачив далай-делхъла «Дагъистан» ансамбльлизив Дабай Дабаев даргала мезли далайвикIуси солистли узусири. Ил далайвикIули вири сайцунра хорлизивра. ГIур илизир гIяхIси сиптакарла устадеш дакIудухъун диэс, камси заманали Дабай МяхIяммадович ансамбльла коллективлис бекIдеш дирес вехIихьиб.
Илини ансамбльлизир дахъал дарсдешуни акIахъуб. Ансамбль дурала улкназир цаибти концертуни чедиахъес бехIбихьиб. Мисаллис бурахIелли, ансамбль Аргентинализиб, Франциялизиб гIяхIцад замана, концертуни чедиахъули, калун. ГIур илини бегI гьалар Пиренейский фольклорла фестивальличир бутIакьяндеш дариб.
1990 ибти дусмазиб Дабаев Дабай МяхIяммадовичли ансамбльла бузери гIяхIцадла гьалабяхI арбукиб.
Илини Дагъиста халкьанала фольклорличи имцIали пикри бяхIчииэс вехIихьиб. Ансамбльла коллективлизиб дакIубиуб халкьла мухIлила пагьмула чебкад бузути адамти. Камси заманала бухIнаб ансамбльла коллективли мягIничебси ва хIяздухъеси концертла программа хIядурбариб. 2008-ибил дуслизиб ансамбльли Москвализиб Дагъистан Республикала БурхIни бикIуси культурала программализир жигарла бутIакьяндеш дариб. ИтхIейчибад бехIбихьили, ансамбль «Дагъистан» нушала республикализир кадиркути лерилра культурала шайчирти далдуцунала бутIакьянчили бетаур. ИлхIели сайри Дабай МяхIяммадович ДР-ла урибси культурала хIянчизарла уличи лайикьикибси.
Илала къайгъиличибли ансамбль «Дагъистан» ахъти искусствола тIалабуначи балбикибси художественный коллектив бетаур. Илини лебил Россияла ва дунъяла халкьани-ургарти фольклорла далдуцуначиб бутIакьяндеш дирес бехIбихьиб.
2016 ибил дуслизив Россияла халкьанала культурала даража ахъбирни багьандан Дабай МяхIяммадович Дабаев Россияла Президентла шайзибадси Баркаллала кагъарличил шабагъатлаварибси сай. 2021 ибил дуслизив ил «РФ-ла урибси культурала хIянчизарла уличи» лайикьикиб. 2022 ибил дуслизиб илис Дагъиста БекI Сергей Меликовли «Дагъистан Республикала гьаларти сархибдешуни багьандан» бикIуси орден бедибсири.
Пачалихъла далай-делхъла «Дагъистан» ансамбль концертла программаличи Украинализиб бетурхуси дявила хасси балбуцлизир бутIакьяндеш дирутачира башули бирар.
Сентябрьла 23-личиб ил, Дагъиста БекI Сергей ГIялимович Меликовла хъарбакь хIясибли, Лугансклизиб мерлабиубси саби-гIяхIъулатала батальон «Каспий»-ла бургъантачи гIяхIладли бякьун. Гьайгьайрагу, республикала БекIла хъарбаркь Дагъиста Правительстволи ва культурала Министерстволи гIеббуцибсири.
Лугансклизиб ансамбльли концерт чебаахъиб. Дабай МяхIяммадовичли бургъантала уркIбази атIести жагати дугьбира дуриб. Илини бургъантас культура ва анцIкьи чераркуси Центр «Бриз»-ла генеральный директор Хадижат МяхIяммадовнала, «Стройсвязьмонтаж» ООО-ла генеральный директор МуртазагIяли Мусаевичла ва «Люкс-Алко» ООО-ла генеральный директор ШяхIбан Кьурбановичла шайзибад гуманитарный кумек гIеббаахъиб.
«Каспий» батальонна бургъантас концерт дебали гIяхIбизур. Батальонна командир Табир Сажитович Маликовли ансамбльла коллективлис баркаллала дугьби дуриб.
ХIяжимурад Ражабов
